一向自己的廚藝唔算叻，更知道自己應該學下煮野食，近日，終於的起心肝，諗住周末學下煮一樣餸，慢慢學下煮.....因為咁樣做，唔係為依家，而係為將來。

雞翼係我的拿手好菜，可以好快整起。但其他的要整好耐，但都好俾心機諗下點整，可以加d咩，少d咩，改下原本的菜色。

上星期整左煎鹽焗雞翼，自己就自創獻汁。 今日就整左生菜牛肉卷，整獻汁時俾油彈親，好痛！！其實我最怕就係炒野時俾油或水彈中，仲怕用不锈鋼鑊添....所以每次我都會諗下點放野落鑊度，仲要適時左閃右避，真係少d武功底子都唔得！！~~~

好似今日咁，下午訓左一陣就去準備d野，因為如果太遲入廚房就會同媽媽爭野用，同埋好大機會俾人趕走.....

今日整呢味餸就足足整左我成2個鐘， 睏少左晏覺，頭暈暈咁走去搞東搞西......

終於係6點幾完成左.....好開心、好滿足，好想俾某人第一個試菜，除左留番幾件俾某人之外，其他的我就同媽媽食晒，好厲害....不過，呢樣唔係我最叻的一樣菜.....

真係覺得自己係一個名副其實的傻婆！！！

前日k仔拎番行李箱過黎俾我，之後very happy咁去街街lu....

呢日補送番一份特大生日禮物俾k仔，我同佢去左買PS3，因為我知道佢想要好好好耐，所以無咩考慮就決定買呢份生日禮物送俾佢，因為我怕唔識買，俾人呃，所以一定要帶埋佢去.....我地買左部白色ps3，同埋買左3隻game，之後我地去左食北海道.....

唔知點解無論係行街又好、等緊位又好，我都覺得個心好甜，覺得好滿足，好想時間可以慢一點，因為我好想多點時間跟他在一起！！前日行街見到一個好靚的樽，約$35，雖然唔值，結果最後某人都買左俾我，因為某人話只要我鍾要就無所謂啦。我覺得依家的我好好好好幸福，因為我有一個好錫我的人在身邊哦！！

近日聽到結婚的事，為左大家將來，我地從下個月起要努力儲錢，否則結婚就遙遙無期喇....所以要努力哦....

3月15日-18日係我同K仔去台北玩的日子，真令人期待，為左第一日出發的方便，14號放工就即刻同K仔返屋企執埋我o的行李，去K仔度過一晚。

去左很多地方，包括西門町、台北地下街、饒河街夜市........

好開心！

好開心！

好開心！

18號係Kelvin's birthday....正日生日的他我俾唔到生日禮物佢，因為可要時間準備，同當事人在場先可以哦！！！

下星期六，同K仔去台北玩4日3夜，好期待、好期待、好期待~~~

星期四放工後，K仔陪我去買行李箱，買左個粉紅色，哈哈哈！

因為我要浸溫泉，前幾日姨媽仲未黎，好驚會撞正旅行黎，搞到我要問人點做可以等佢黎......

星期五綜合意見後，返到屋企樓下買左綠茶，夜晚飲左幾杯，加埋好傻咁做運動.....結果.....第二日一大早就黎左...仲要好好好痛添....可能綠茶太寒啦......

真係從未咁期待呢個姨媽黎，哈哈~~

我的大廳，好長，足夠放一張乒乓波枱，地下黃色的係Winnie the Pooh豆豆梳化，媽咪同K仔都好愛坐的。

廳的另一邊。

廚房膠門，好鍾意呢，因為覺得好有宮廷feel。

廚房的空間都好大，可以舒服地煮野食呢。

洗手間都ok大架，而且好實用。

我間屋主要以紫色為主，係媽咪的主意，因為好浪漫。

我的房間︰K仔話我一個睏雙人床喎！張床係用史迪仔床舖架，我鍾意呀！

電腦枱及我的私人大衣柜。

這是我的私人天地，可以享受一個的寧靜。

2月14日雖然係好好好浪漫的情人節，同K仔簡簡單單咁過......

既冇收花、亦冇豆腐花，哈哈！

其實我唔係一個好稱職的女朋友，唔識諗去邊度食野，好多野都決定唔到、做o既野通常都冇咩特別.....但...我覺得用心做已經係一份好好的禮物....

o個晚同K仔一齊收工，返屋煮飯仔，我整左豆豉鯪魚煮芥蘭及茄汁雞翼，湯係媽咪整O既，媽咪都好識做，佢自己食完飯，就返房睏覺，留番d空間俾我地煮飯仔....哈哈！！

平平凡凡咁過都有好處，唔駛同人迫、食得健康d同可以享受2人世界.....不錯的！！

本來想影張相俾大家睇下的新居，真係好好好鍾意呢個窩，雖然唔係咪大屋，但我同媽咪都覺得好舒服！！

昨日好唔開心，因為聽到人係我面前彈我的好好好朋友...

shit~~~

感覺好難受，因為相識左好多年，係好好的朋友，當聽到d咁難聽的說話，好唔舒服，最後忍唔住喊左出黎......仲要嚇親K仔，結果昨晚又入黎陪我.....後來同媽咪再講番件事，仲係有d激動，又忍唔住....不過，今日我冇事喇，只係唔係好想講野.....啫~~

今日聽到肥肥離開左，其實開頭唔係好信，諗可能又係d吹水新聞，點知係真，覺得好意外~~

肥肥係陪住大家長大的電視人，以前住深木土步時，最鍾意睇佢同盧海鵬，因為覺得好好笑.....習慣聽肥肥的笑聲，不過佢真係好叻，雖然生病，但就好努力生存落去，結果都係敵不過病魔......所以睇電視時，忍唔眼濕濕.....媽咪話對o個個人有感情先會喊喎...我十分認同。

屋企終於搞好個寛頻lu....自從用左無線上網後，覺得差d，因為好似好慢咁.....

今個新年好開心，因為好多人俾利是我.......哈哈！！

年初一

零晨12點20分同 K仔去睇【長江七號】，開頭諗住可能會睏著，但係真係好好睇，笑死人喇！！

返到屋企，己經好鬼夜lu.....第二朝K仔好早就走左，我繼續好努力睏，中午出發同媽咪去黃大仙，每一年的習慣，唔去唔舒服~~~

今年老鼠年犯太歲，加埋求左下下簽，真係衰到貼地....所以買左個福袋，諗住可以"袋袋平安"....師奶的行為！

之後去左阿姨屋企拜年，食完飯返歸，冇咩特別！！

年初二

一朝早去左拜年，仲要去柴灣咁遠，又係每年的例牌活動，仲有好多利是添！哈哈！

夜晚去左K仔屋企食飯兼拜年，食日本野，好好味，特別係東京牛肉火煱，暖烘烘！！

之後拜年兼過夜，哈哈！好開心！！

年初三

一早同K仔屋企人、grandma、其他親戚飲早茶......

之後返左K仔屋企，成日打牌，我唔識打架，到依家明D唔明D，好高深的學問。

好想學哦！！

年初四

朝早同K仔返我屋企，因為有好親的親戚黎拜年.....

年初五

返工努力撲利是，橫掃人力資源部，識的都唔放過......仲有特大老闆黎o個陣，真係好多人搶利是，嚇死人！！

年初六打後

開始愈來愈少利是，不過間唔中都有1、2封...