今日一整個上午豬標標都無搵我，甚至連食午飯都無搵我；或者咁，應該係話連我都無搵佢，夠鐘就立即同朋友去食飯．一點十八分收到連續打入嚟嘅無號碼電話，唔知係唔係你用公司電話打比我，不過我無接聽，因為如果係你打嚟都無意思，而且我亦都唔想聽你把聲．工作一直忙碌到下午四點幾，忽然你用內線電話打比我，唔想聽都唔得．你一開口就問：〔尋晚打電話比你做咩唔聽？點解唔打番電話比我？〕好想回答你，係我唔想聽咪唔聽囉，不過我無咁做，只係回答你一句：〔咁又點？〕跟住你只係通知我，你老闆已經批准咗你申請１２月１９號嘅假期，我用冷淡語氣講咗一句：〔咁得啦〕跟住你就好無癮咁收線，而我亦急不及待比你早掛斷電話．

鬧亦鬧過，只不過兩個星期時間，點解仍然鍾意就打電話嚟，唔鍾意就一個電話都無，你真係好忙咩？呢種冷戰都唔知會幾時結束．

觀察呢兩個多星期其實無太大改變，以為吵完一鑊之後佢會明白我點諗；或者豬標標都有嘗試過想做我所提出嘅要求，不過過程當中我仍然覺得有問題．上星期差不多日日都打電話比我，但係奇怪在，我好似係佢上半場情人，大約傾十多分鐘佢就話收線要打電話比其他人．呢個星期比上星期差，星期一同埋三放工後連無一個電話都無打過比我，星期二同我傾咗十分鐘就話要打電話比人，究竟有咩事令你忙得咁緊要？連傾個電話多幾分鐘都咁難？定係循例打電話比我當係了結我件事呢？星期二約我下個月一齊放假去玩，講真我唔係好想同你一齊放假，而且我有幻想過不如當日同佢講分手．

今晚預咗你會打電話嚟報到，但係我已經唔想聽你電話喇．與其同你傾十分鐘左右就收線排隊到下一個，甚至乎想利用我嚟攝你時間，倒不如留你一線自由空間，又或者將用嚟同我講廢話嗰十幾分鐘豪比下一個人重好啦．其實我需唔需要諗吓，將每星期兩次饉餘嘅午飯時間，都送埋比你啲同事，朋友，重有〔特別朋友〕好唔好？

今日有個同事終極失戀，其實應該係一早已經分手，不過佢唔面對現實．作為大姐姐又有經驗嘅我，當然扮演過來人角色開解佢．明白當人唔甘心，你點講點解釋都無用，而且呢個細路仔思想上實在太幼稚，有時傾傾吓真係想摑佢兩大巴！廿四歲仔從未經過任何風浪，好似失戀就係大哂一樣，走去擔心未發生嘅事，但又唔去諗解決方法，覺得人一出世就係要受苦，成日講〔如果唔做就唔會變成咁．．　等等〕真係想打佢幾拳！下午又話請假讀書，點知走去搵舊女朋友，到後知道人哋同緊新男朋友去旅行，佢就打電話比我同事訴苦兼發癲發神經，真係比佢激死．失戀唔係大哂，呢段時間會好傷心好痛苦，但係時間亦都會慢慢去治療你失戀嘅傷口．〔留得青山在，那怕無柴燒〕？

今個星期實在太唔開心，屈住屈住，搵唔到理由點解會咁唔開心；雖然比七個同事一齊投訴我工作表現唔好，但係我有上司頂力支持，而且我亦都知道係佢哋呢班人太過攻於心計，所以我唔覺得有幾咁大不了，唔知點解我真係覺得唔開心．無計可施下，約朋友出嚟飲番兩杯，借醉麻醉自己一下．當到達酒吧時，被安排酒吧角落一個慣常坐嘅位置，為自己倒咗一杯紅酒；唔知係唔係酒精關係，就算一邊打遊戲機兩眼仍然不停流淚．到十點幾忽然收到豬標標嘅電話，話題上仍然離唔開無聊，公事，時事，天氣，非常無聊．比上次好少少，放大假前知會咗我一聲，不過又有咩用？不斷問我公司嘅事，究竟你有無想過要關心我？

真係多謝酒精帶比我嘅勇氣，終於忍唔住鬧佢：〔可唔可以唔好當我係秘書？〕佢語氣帶有點笑意回應：〔好多人當你係秘書咩？〕聽完呢句之後無名火起三千丈，正所謂佛都有火，我不斷鬧佢唔關心我，唔理我，拋低我，我連續發燒五日你唔知，我幾時開心，幾時唔開心你唔知，你鍾意一日可以打幾次電話比我，你唔鍾意可以兩三個星期都唔搵我．佢回應只係兩句：〔我知你唔開心，但係我以為你唔想講出嚟，所以我咪唔敢問囉〕；〔我忙呀，你知我忙架！〕我知你忙，就係因為知你忙，我點唔開心都要同自己講：〔我要體諒你〕但係你又有無體諒過我呢？跟住佢完全無辦法回答我，剩係問我星期一同唔同佢一齊放假，佢跟本唔明白問題所在；或者佢明，不過佢唔想解決問題．

心裡面不停同自己講：〔分手擺啦，爆埋隻貓啲衰嘢出嚟一次過炒大鑊〕但係我一直忍忍忍．或者將呢件事當係最後籌碼，總有機會再鬧過．

今日老闆無啦啦同我傾計，原來我比七個同組同事投訴，最攪笑就係呢七個人，將對我不滿嘅事分開七個人去講，就好似做戲分劇本一樣，一人講一件事．如果老闆唔係講咗其中一件罪證比我聽，而投訴人竟然唔係平時問我嗰個女人，我就已經覺得，呢班人玩辦公室政治真係幼稚得要死．不過我都有佩服佢哋有團體精神，咩都一齊．算啦，我玩慣〔獨家村〕，好難得見到一班人咁團結，失敬失敬．幸好得到老闆支持，慶幸佢明白我為做，知道我辦事能力，呢一點係值得我感激同埋開心．

終於今晚都同你去食飯，期間我無任何發問，就算你講咗幾多嘢都好，我仍然保持住沉默或少少咁多嘅面部反應對你，其實滿腦子都有好多嘢想講，但當面對面時，我發現自己竟然開唔到口問你．直到連你自己都無嘢講，竟然發覺我同你，就如一對貌合神離嘅男女，坐同一張餐桌食飯，但係就相對無言．

忽然你攞起電話，顯示某啲你曾經影過又得意嘅相；唔知點解好有衝動想偷睇你電話裡面嘅嘢，自知呢個係唔要得嘅行為，不論同你關係係如何親密，但係心諗而做不到．一次，兩次，三次不斷地去忍住唔去做呢個想做嘅事，直到你幾次都將電話完全交比我睇．．．　我終於忍唔住去睇你電話來往紀錄，好奇怪，呢個電話我曾經用過，當由你手中接過嚟，我發現對呢個電話嘅功能感到陌生．當見到電話紀錄時，發現裡面有一個名叫〔Leung Siu Ling〕嘅人經常出現．原本我以為你一早將其他人嘅來電刪除，但係我都重見到你上星期五打電話比我嘅紀錄．講番呢個名，其實我好早已經知道你太太叫〔呀玲〕，其他嘅就咩都唔知．如果呢個係你太太，點解你會用英文全名呢？莫名其妙．以為你用其他人名但係用隻貓嘅電話，不過我見到呢個又唔係隻貓嘅電話號碼，真奇怪？睇完幾頁覺得最奇怪嘅係，我亦都發現唔到裡面有太多其他人嘅來電記錄，始終覺得有部份人已經被你刪除．近期其實都唔係第一次有意無意比你個電話我．究竟，你係唔係有心做定準備比我睇？

一直都想知我喺你電話簿裡面係用咩名，用一個男人名？用愛人稱呼？原來只係過係英文名連姓氏，無任何特別，以為你連電話簿都唔紀錄，靠記憶去記住我電話號碼．今晚始終開唔到口同你講清楚，如果今晚係星期五，相信我可以同你傾，就算想喊，起碼第二日係星期六，想點喊點醜都可以．唔好似為我而家會好開心，以為清楚了解謎底，我重想去再睇多一次．又白白錯過一個大好機會添．．．

今晚約咗兩個同事落酒吧飲酒，由於其中一個男同事失戀，做朋友嘅，我哋又點會唔理佢？因為意外地早咗出門，未到九點半就已經到達目的地．可能今晚係萬聖節，呢間酒吧比我平時星期六，日去時還多人．兩位朋友大約等咗一個鐘後就出現，我哋叫咗支紅酒同埋小食，飲多兩飲，唔知係真癲定假醉，失戀嘅朋友已經開始失控，佢唔係喊，亦都唔係發爛咋，而係問埋哂啲奇怪問題．

再叫多一支紅酒後，大家都帶有少少倦意，呢位朋友就開始諗埋一大堆跟本唔係事實嘅假設．唔知點解呢，當見到其他人失戀，就會覺得自己見番當時嘅自己，好似一面鏡倒影十一年前所發生嘅事，而佢哋所問嘅問題，亦都係當年我曾經問過人同問過自己．諗番起當年喊到呼天搶地，失控．朋友，當唔開心時想喊就盡量喊，想點就想點，但係你要好好保重自己．

其實今日有段小插曲；臨出門前接到豬標標嘅電話，之前佢不斷打電話比我，但係我一直都唔肯聽佢電話．佢問我點解唔搵佢，又唔回應佢比我嘅訊息，我無答佢呀，由得佢估啦！跟住佢又想知道我去緊邊度，同邊啲人去，後來佢竟然提出一個從未做過嘅大膽要求．佢問佢可唔可以一齊嚟飲嘢，於是我狠狠地拒絕佢，我同佢講會有公司同事，繼而又再問邊個同我一齊去．奇怪，你介意咩？你嫉妒咩？由於唔可以跟住我，於是佢又要求下星期同我一齊食晚飯，唔知點解，我好嬲好狠地不斷鬧佢，又講咗一大堆悔氣說話．無法啦，你係要忍受我嘅脾氣．

今日睇吓個月曆，忽然記起一段差啲遺忘咗嘅記憶；今個星期日，就係我同白皮豬分手十一週年，算唔算紀念？原本唔算係啲咩嘢，最覺得巧合嘅，就係連日子都係一模一樣．一九九七年十一月二日星期日，當日同你喺電話講分手，當日抱住好朋友同埋屋企人喊到呼天搶地，當日問自己幾時至可以忘記呢個人，當日曾經想過要自殺，當日仍然好愛你．．．　十一年前嘅呢個星期，係我最唔開心嘅一段日子，成個星期你連一個電話都無，當我打電話比你時，你只係用咗幾句說話就打發咗我，嗰個星期自己不段咁去聽〔歡樂今宵－那樣動搖不如擺了〕；到咗今時今日，我又會點呢？無喇，已經唔係當日嘅我，唯一可以令自己舒服嘅，莫過於消失你眼前，同埋唔聽你嘅電話．

點解男人對逃避女人嘅模式永遠係一樣？完全無身體上嘅接觸，減少約會，盡量縮短每次約會時間，避免送對方返屋企，開始講大話，話自己好忙唔需要打電話比對方，求其講幾句點樣辛苦，幾咁唔舒服，好疲倦等等趕住收線．難道呢啲又係咁巧合發生喺每個男人身上？唔好當我小妹妹啦，我已經唔係第一次拍拖，屬於有經驗人仕喇；或者，試吓用啲新方式對付我啦，好唔好？