打波先黎落雨既理論一樣！BB蕉先黎落雨！唔係呀麻你！不過唔緊要，你落雨咩我開遮囉！好勁呀，女友連太陽遮都識得搞！就係咁，咪又燒到野食囉！哈哈！今次仲好成功燒左豬頸肉呀！(上次得一舊比我燒燒下整趺左落地)辣雞翼都好好食呀！仲有我想玩左好耐既煙花呀！好靚呀！多謝晒你呀！

行過荃灣既綠楊坊，商場翻新左之後，鋪頭亦都大執位左，見到春田花花開左間McQuarter係度呀！拿拿臨幫佢映番張相先！入去睇呀睇，見到佢既床上套裝6折喎！不過後尾先知，雙人全套連被袋都要成5百幾，好似平左d，不過都係去吉豬島格一格價先！佢既tee折左都係百零蚊咋，仲唔低能有style架！鐘意就去睇下啦笨！嘿嘿！

有屋皮既朋友叫我唔好成日同女朋友去食咁多野，話會儲肥佢，嘿嘿！邊個話我地成日食架，呢期有新玩意呀！砌砌圖呀！先小試牛刀買左個絕版(老闆娘強調)既XO Puzzle，係呀，我女友一鐘意XO，二鐘意Podolly(佢係邊個？噢....)，我負責砌邊邊，嘿嘿，因為我唔叻麻，中間留番比佢啦！兩個人砌砌砌，就一齊完成左呢幅砌圖啦！仲有一個食樹皮1000塊呀！加油！

尋日去左睇呢套六樓後座，我自己就唔係好記得上一集好唔好睇啦！不過咁岩之前睇左dvd既愛鬥大，睇落去差唔多咁，就去左睇呢套戲啦！各位住新界既朋友，我強烈推介荃灣百老匯比大家，位又闊落又有斜，唔怕比前面既人遮鬼住！不過尋日我去左葵芳，因為仲可以行街街麻！套戲好過愛鬥大好多好多，suzie令人好感動，仲有曾志偉，有佢除左搞笑之外，多數都係傷感既！1班新演員不過不失啦，不過有d位好似好hea咁，你話佢扮現實又得，話佢求其又得囉！結尾既位連我都差d眼濕濕，笑中有淚果隻啦！平日平平地既時候都推薦比大家睇呢套戲！

好開心第2次睇詹瑞文，亦都係同好友比利同佢女友一齊睇，今次仲多左我既女友添！嘿嘿！今次係由經典莎士比亞既作品改編，用左嘻笑怒罵既喜劇手法去探討同帶出一d幾深既野，你當喜劇去睇都得！今次由詹瑞文帶住一班新演員去演出，當然仲有好出位既朱凌凌，白只既受歡迎程度令我覺得人肥都可以好得人鐘意！哈哈！成套劇3個鐘都矛悶位，劇本幾好，演員幾好，當時詹瑞文都好好啦！冀望黎緊既萬世歌王！

三號風球之下同女朋友諗住出去搵食，一諗就到開飯啦睇下荃灣有咩野好介紹，比我地搵到呢間冰室！唔出由自可，一出把幾火！一出到去就黑雨，倒水咁呀！係褲腳一邊膊頭濕晒既情況下，終於搵到呢間只係每日開早上十點到晚上七點既冰室！有咩野特別呢佢？好多網友都讚佢既火腿奄列好大份好抵死，一早有心理準備既我地就緊係叫佢$15蚊既細奄列啦！黎到，嘩，真係兩個人食都有少少飽飽地，最少有4隻蛋囉！不過唔係滑蛋，似乎希望太大啦！再叫左佢咖哩牛腩配鹵水雞翼米線，牛腩好腍雞翼都幾入味，不過因為有咖哩汁，試唔到佢d湯好唔好味啦，呢樣都扇幾好！不過最驚喜既係佢有好立克同阿華田奶昔，黎到其實即係沙冰咁囉！邊個好飲d？睇你鐘意飲邊樣多d囉平時！食飽飽！行程去睇戲！一個好爸爸！足兩粒鐘，好張艾嘉！