琴日先拎返回證，今日就返左上大陸。唔知幾多年都冇返上去，估唔到而家深圳同羅湖車站都比以前變左，車站大堂又靚左同大左，深圳橋又有冷氣．．．

今次行程令我有種奔至如歸既感覺，好似參觀玩具廠咁，食飯又去酒店，服務好過香港幾皮，起碼唔會好似香港既人黑口黑面，令人有上賓既感覺。不過工作上就真唔知點咁，要面對語言障礙。

朝早上到去過左一陣先搵到 Client，根住就搭佢地車入廠。搭左約四十五分鐘先到，發現間野都好大規模。首先就係 cash count，睇住部數錢機，由於現金都有幾多，人民幣又煩，一蚊五毫都一張張，都要用左成個鐘先攪掂。之後就點 materials，幾個人根住幫手點貨，有D擺到最頂要3個人先拎到落黎，佢地都唔會話覺得麻煩，好合作，好幫得手，態度好好。攪到十二點佢地就下班吃飯。咁就同 client 去酒店飲茶食飯，叫左幾個小菜一個湯，其中炒牛仔骨幾好味，令我芋蓉飽都係第一次食，仲食到幾飽，真係估唔到上黎做野都有機會食好野！！

食完又點貨，去左貨倉，參觀左好多唔同既工場，每個工場都有好多員工，入電子工場就要搵左個膠套包住對鞋，多一粒塵都唔得。又點左咩麵飽超人組件，玩具說明書等等，另外仲有好多零件同五金，基於唔識聽佢地講咩，簡體字又難睇，所以都幾辛苦下。

返大陸做野係好似好得意咁，但都係少上為妙，因為有時真係好難溝通，有好多人都係識聽唔識講，佢地講既廣東話我都唔識聽，攪到我講又講唔到，聽又唔識聽，睇又睇得辛苦。下星期一仲要返上去，希望到時環境都唔會太差啦．．．

今日開始返工，好新奇，雖然只返左一日，公司俾我感覺都幾好，仲派左 staff manual，working papers，financial statement format等等，扮晒 pro 咁。

夜晚好早就收工，比我預計七八點相差好遠，不過我唔介意收八點，收得早我仲唔慣，好似太著數咁。六點幾俾人趕走，所以都唔可以講係夜中環。

Lunch 有個 Senior 請食飯，希望遲下可以搵班傻仔食飯，例如都去中環一族既男，仲有話會黎中環搵我食飯既 Chris。但係工作上已有難題，個 TB 既 movement 攪唔點，完全唔 Bal，死得，咩都做唔到，唔想咁快失去呢份工呀！！

今日去左小欖燒烤樂園，因節日關係，比平時貴左廿蚊，透爐費仲要收雙倍。收幾錢都好，我都會係咁燒，有部份食物都幾美味，例如雞扒．．．佢地先後分批入到黎，仲好快咁就燒左一包炭。

燒到咁上下，就到好緊張既時間，開始交換禮物，真係唔知會抽到咩野，有少少驚，又唔知邊個會咁好運抽中我既精選禮物．．．我係第一個抽，係由 Kenix 所揀選而又超額既﹙多啦Ａ夢ＴＶ珍藏版ＤＶＤ﹚，有廿四個故事，基本上係一份老少咸宜既禮物，但對我黎講就有少少諷刺，我只可以就咁睇住隻 DVD 囉。阿男就最好彩，抽中我昔日既推介，就係＜危險人物ＩＩ＞，第一個故事係哈囉吉蒂人頭案，唔知會唔會出第三集？！

夜晚班人開始顛，竟然真係由小欖入黎上水食糖水，可能佢地傻左，我就帶佢地去左彩虹甜品屋，好多野食，叫左個彩虹，都算唔錯，好想試下其他甜品，得閒就要去下先。食完之後，佢地唔係搭小巴就係搭火車，不知幾方便，不過相信當勞旅程會幾漫長。

Rainbow Dessert：http://www.rainbowdessert.com/index.html

今日揭幕戰，順利羸左第一場比賽，不過今日我拎左我成世人都未拎過既野，仲要一黎就打孖。

上半場唔小心勾跌對方前鋒，被球證出示黃牌警告，踢咁多年波，第一次拎黃牌。而心理亦有個包袱，因為再黃就要出場。所以下半場我大部份時間都係場外既後備席，去到下半場未段，我再次入場，由於比數已拋離對手，心情比上半場輕鬆得多，但係呢個時間，敵方球員被我隻腳擦過而成個人跌低，球證向我出示第二面黃牌，兩黃一紅出場，令人沮喪！賽前真係估唔到自己會拎黃牌，點知竟然一場比賽拎多兩張。

近兩次踢完波，雙腳都傷得好緊要，返到去真係好痛。下場比賽，我將會坐成世人第一次既波監，咁易就被罰停賽一場．．．　

　＋　＝　

Goalkeeper (Byron)：出迎一流　判斷準確

Defender (Donald) ：兩球助攻　喜出望外

Defender (Lok)：後防重心　射入一球

Defender (Sonic)：兩黃一紅　可謂無辜

Defensive Midfielder (Chris)：有傷在身　勁過冇傷

Attacking Midfielder (Ball)：有前有後　優異演出

Forward (Pan)：極速傳說　後半死火

Defensive Midfielder (Jerry)：處子登場　眼前一亮

Defender (Mike)：後備球員　勇戰受傷

十一月廿二日，國際學位足球聯賽又開幕，上屈亞軍會計隊將於當日上演一場揭幕戰，由於陣中有兩名球員出國到澳洲發展，亦放棄增加外援球員，在兵源短缺的情況下，今屈會計隊後備兵源可謂嚴重不足，但亦增添了一名善於出迎而反應亦不俗的守門員。

不過，在備戰方面，友賽連輸兩場，部分球員亦久疏戰陣，球員狀態成疑，球員體力急降亦是老問題，在可容納數百球迷的修頓大球場比賽，或多或少增加球員比賽壓力，而對手的實力亦全不知情，故會計隊可能需要採取較保守的戰術，歡迎球迷到場觀賞場事。

日期：十一月二十二日

時間：下午四時十五分

地點：灣仔修頓足球場

會計隊重心球員：波仔，Chirs，Panny

Saturday, October 28, 2005

第一次去動感影院，睇『妖夜列車』，明知係睇緊戲，但係效果好逼真，好睇過某某電影學會既戲啦。搭吊車又似高空三萬尺咁，瘋人院有隻似係醫生鬼好型，仲同左佢影相，排左大半個鐘先玩到海盜船，坐第二行好刺激，玩埋翻天飛鷹，已經開始疲倦，玩完滑浪飛船後去左食飛雪冰，呢個時候竟然見到黑暗人，有Carol，Wendy，June，淇同蘭子，真係估都估唔到，呢個世界真係好細，海洋公園真係好細．．．唔知再玩咩野既時候再入多次瘋人院行多轉，出返黎就買左隻好味過大家樂好多既燒雞脾，之後搭吊車落山。

又去左玩攤位，射籃球中兩球已經有細獎，以為好易先會去玩，點知五球全炒，浪費左十蚊。見到電鋸鬼，開電鋸既聲好真，但冇理由拎把堅野去嚇人，我問佢把電鋸係真定假，佢就俾左把電鋸我拎，原來電鋸係真，超重呀！總括黎講都幾好玩，氣氛好好，要彈既就係唔少路段有太多長命斜，令我冇左半條命。當勞唔去海洋公園應該係因為佢驚鬼同機動遊戲，真係可惜！

十二點前走人，搭６２９返金鐘轉９６８返元朗，竟然慢過黑暗人一班９６８，搭到元朗一點，我地兩個竟然仲要去佳記食甜品，我食左西瓜黑糯米，未到２點，我已經冇晒巴士冇晒小巴返上水，要搭小巴去落馬洲，再轉Ｎ７６先返到上水，行到返屋企沖埋涼三點！

October 26, 2005

前日經過 Times Square見到李力持，今日 Sogo 下面見到好型既長毛，佢既頭髮真係好長，不過佢冇著佢平時件紅色人頭 T-shirt。

之後就入左沙田食飯，山長水遠，間野都算係咁，冇咩好讚亦冇咩好彈，食到好飽，燒帶子同甜品都好。食到咁上下時，香港足球隊主教練曾偉忠同足球界人士黎新祥都一齊黎左食飯，佢地兩個都好似唔係咁為食，亦聽唔到佢地講咩，只係見到曾偉忠拎煙三文魚食。