小學同學謝浪平先生要走了..又再度漂泊到美國讀書..係走之前,我地決定留返個小小回憶俾佢...

好開心,又見到一班同學仔,雖然大部份係5,6年級隔離班o既同學,畢竟小學生活真係純真,快樂...話題好快又打開,源源不絕o既小學回憶又充斥住大家心裹面,課餘時間一齊踢波,打game boy,去同學屋企玩,搞生日party...一切一切諗返都好似尋日發生一樣...親切o既笑容,十年後一樣冇變過...氣氛好好呀..我會好好記住今晚..

今日同穎宜一齊已經半年啦..哈哈..時間仲有4年零6月..

落住毛毛細雨,有小小涼風,有時候我都好喜歡呢種天氣...會諗返起好多好多回憶...

但今日呢種天氣,正好反映我近期o既心情...感情真係好奇妙,可以好簡單,亦都可以好複雜...可以令人好開心,亦可以令人好傷心...感情路上1+1 永遠唔會等於2...

我亦曾經失去過我人生中最重要o既感覺..經歷左一次好痛苦,好深刻o既教訓...所以我應承自己,感情路上我唔會再重複犯錯...從前我會努力工作,有時間就會搵朋友,唔會將女朋友擺係第一位...依家我自問好努力去做一個好男友,但係我o既付出同埋努力,就收唔到我預期o既效果...或者一段有成果o既感情真係需要天時,地利,人和,缺一不可...

我依家真係好迷失...唔知道應該點做..你有你o既夢想,工作,屋企人,有時間仲會去進修...我應該去鼓勵你,支持你..我已經盡晒力去迎合你,錫你,氹你,珍惜你..喜歡一個人唔係要佔有佢,係應該讓佢做自己喜歡o既野,見到佢開心就已經好滿足....雖然大家都已經好努力去爭取時間見面..有時候我都係一個人,我都有壓力,我都會攰,我都有唔開心,...去照顧你有時候我都會感到吃力,無論我點樣努力始終得唔到個種感覺,或者無論我點樣努力都唔係你心目中o個個王子...你話你唔識拍拖,已經改變左好多,進步左好多..我話真正愛一個人係會從心散而發..說話,行為,係會直接反映出黎..如果兩個人相處左半年,都話唔識表達俾對方知道..試問餘下慢慢長路,如何可以陪著你走..

我可以話,我已經將成個人押注左俾你..如果你話我係你心目中其實並唔係咁重要,現階段我仲可以接受到止蝕離埸..因為我唔想拖,我要o既係可以陪著我一世o既人....

或者我都需要一d時間,俾自己冷靜一下...停一停,諗一諗...重新將自己定位,重新計劃,條路應該點樣走...

繼續留係家中休養...好得差不多啦..多謝一d熱心朋友慰問..意外冇可避免,日後我會更加小心啦...

<衝上雲霄>又大結局啦...真係好睇o既,我晚晚都追嫁..tvb我最喜愛電視劇,呢套係我三甲之一...

突然之間又變得冇晒方向感...迷失中..

下晝5點半返公司搞埋d手尾...7點過中環接穎宜收工..跟住過旺角,點知撞到余露丹小姐同佢個fd...跟住仲一齊食飯添...係朗豪坊高層間monster sushi食野,呢度開左唔係好耐..一直想試下..就試下佢啦...感覺都唔錯呀,價錢合理o既..食野,傾計,輕輕鬆鬆,咁就兩個鐘啦..11點就各自好回家..

wasabi 一直都想見下穎宜真人,想了解下我識到一個點樣o既女朋友..哈哈..都唔駛特登約都撞到...

另外facebook 又add 多左幾個小學同學...好開心呀

休息的第二天,下晝去左賽馬會診所,洗傷口...

跟住出旺角同陳嘉崇先生行街...跟住係波鞋街見到我地其中一對dream shoes復刻板zoom flight 95 藍色只賣$999..97年當年炒到上天價$3499..冇可能買啦..兜左旺角一圈,只有呢度獨賣..我只係花左0.002秒做決定,咩都唔理買左先算..當自己o既生日禮物啦..因為下星期個價一定唔只咁...同陳嘉祟先生一人買一對...

跟住返淘大,等埋穎宜,三個人係椰林閣晚餐..食完係百老匯睇<蝙蝠俠黑夜之神>..不過冇想像中咁好睇..70分啦..差少少唔知咩咁...睇完就好回家..

呢度返工做野真係好辛苦...由朝到晚,要不停加油...加上我工作位置氣溫超過50度..極有可能,體力透支,隨時暈倒...我經常置身於黑色暴雨訊號之下,d汗由頭到腳,流落去,襪都濕埋...好淒涼..唉..雖然收入可觀,但我怕有錢,冇命享...

晚六點幾..發生意外,被熱油濕到右手,一輪治理,都係去睇急症,明愛醫院..冇咩大問題,攞工傷休息三天..穎宜過左黎陪我..食埋野就好回家..

黎到呢一站,真係好辛苦...工作時間長,不停地工作,抽風,冷氣系統不足..置身地獄一樣,但我依然要堅持落去...呢度d人暫時都唔錯o既..學o既野都多..有d唔同..決定俾三個月時間自己去接受呢度o既地獄式訓練..磨練自己..實行破地獄..

知道穎宜會一直支持我,我已經足夠,咩都覺得值得...

前路是絕地,只靠勇氣..仍然願盡力,不會蝕氣..

今日8點半起身..同穎宜去海洋公園一日遊..知佢痕左好耐啦..所以都要陪佢去..我都想去o既..不過當然唔想星期日去啦..無奈穎宜只放星期日..唯有頂硬上啦..如果唔係,都唔知要等到何年何月先去到..

去到金鐘已經想走,多人排隊到ar...去到海洋公園彷如置身深圳歡樂谷一樣,d自由人多到瀉,要用(people mountain people sea)黎形容 ...嘔血呀..係度bee li 巴啦..排隊打尖,迫得太緊,係咁撞你..騷擾你..簡直考驗緊你o既忍耐力,EQ..加上浩熱警告,氣溫34度..等一個機動遊戲要30分鐘以上,你個人一定會發癲...玩左成日流左10公升o既汗終於晚8點離開..係金鐘食元氣..食完同穎宜好回家..

今日此行總結:

盡可能平日先好去玩..如果唔係排隊多過玩..

海洋公園搞o既炸雞餐可能係世界上最差,難食到嘔電...

依家憑<功夫熊貓>票尾購門票9折...

旁晚時間山下機動遊戲冇咩人排隊..最多排5-10分鐘啫..

如果想燃燒青春&脂肪可以暑假去...誠意推介,大汗人免問我就怕怕啦..

7月20日梅惠玲小朋友生日快樂!!

黎緊又要接受比地獄更地獄o既訓練..阿彌陀佛..冇計,搵食緊要,我不入地獄誰入地獄...