唉～有個學生喺暑假幫我手……但係呢兩日唔見佢出現啦……唔通屋企人唔俾佢黎？？其實我仲有另一個好助手，但係佢媽媽直情係禁止佢過黎……可惡呀～～！！！有啲擔心唔知完唔完成到盤點，連年假都要返黎做埋啲嘢……唔濟呀！！點都好～之前啲學生喺暑假前好熱心幫我執咗好多書，所以都幫咗我好大忙啦……

唉～好想放假，充下電！好想去長隆玩！！好想日日去泳池游水呀！！好想快啲做晒啲嘢呀！！！無奈做咗好多嘢，人變得好攰，今日我已經早啲出門口返工啦，聽日要再好啲，唔！

嗚～～天父呀！！我要放假呀！！！！！！求祢加力俾我、希望啲助手可以返番黎幫手啦！！！

呢排寫嘅嘢咁嚴肅嘅？？係時候寫返啲搞笑嘢啦！帶完歷奇之後，就同大威、瑪珍去游水！本來Miu想去游哩，不過要照顧咁虛弱嘅媽媽冇辦法，過往約咗大家，但係好多都屋企臨時有事，到底佢幾時先順利游到水呢？加油呀，Miu～大家都等緊你架，成班人游到水先至開心丫嘛，快啲學識啦！本來刺蝟都去游添，但係佢表妹嗰邊嘅會所喺假日嘅入場費好貴，所以我哋去返大威嗰邊泳池游時，刺蝟臨時縮沙……嗯……可以了解嘅～因為刺蝟皮膚唔多好＾＾”（不過多謝刺蝟喺瑪珍佢哋面前表示我好想去佢表妹嘅會所游，好開心刺蝟咁著緊我！）

大威嗰邊嘅泳池，水深由一邊嘅0.8米去到另一邊嘅2米，其實好適合學游水嘅人士去游水～中間水深1.2米嘅地方就係淺水區同深水區嘅分界線，我一直貼住呢條分界線練水嘅，從來都唔敢落深水區…因為怕自己體力唔夠，游唔到對面岸就游唔到，腳掂唔到地……大威同瑪珍不斷鼓勵我嘗試逐啲逐咁行入深水少少嘅地方游，初初唔願意，跟住中途入到水位高我少少嘅地方學（我身高163cm），呢個就係我嘅歷奇，經歷新奇嘅嘢，超越自己嘅界限。

係啦，開始寫搞笑嘢囉！

1. 首先，我嘗試喺水位啱啱蓋過我個頭嘅地方，嘗試跳下跳下咁喺水面吸氣、喺水底呼氣，大威喺水底向我扮鬼臉，成隻長舌怪咁嘅水底伸脷！=.=　搞到我當堂喺水底笑到吸咗氣，水入咗鼻，即刻浮返上水面狂咳！
   
2. 眼見大威同瑪珍嘅泳姿咁優美，我好羨慕！大威啲皮膚好白……仲白過瑪珍，瑪珍喺女仔黎講已經算白淨架啦！其實大威好fit，身上一啲多餘嘅脂肪都無，連肚腩都冇，好難得！上身厚身（梗係啦，男性黎丫嘛！），個身係由厚變薄一直到腳尖，好流線型！喺我眼中，佢又白又流線型，我聯想到一樣嘢－－急凍龍脷柳，龍脷柳又係呢啲一邊厚肉、一邊薄肉嘅魚柳黎丫嘛，最重要嘅就係白雪雪！！！只見佢瞓喺水中，好似一條龍脷柳喺水中飄下飄下，我即刻笑到縮埋喺水度XDDDD　「咭咭咭咭～～～！！！」笑聲連全個泳池都聽到咁濟！大威呆咗，俾我呢個傻瓜搞到佢笑埋一份，問：「有乜嘢咁好笑呀……？？」我笑到連嘢都講唔到，好辛苦先吐到一隻一隻字：「嘩哈哈哈～～大……大威佢…佢……佢…XDDDDDDDD　好似…龍……龍…脷…柳……XDDDDD 笑…好辛苦…XDD　佢一邊厚一邊薄……又白喎XDDD ……」瑪珍已經俾我呢個笑樣引到笑架啦～聽到我講之後佢仲笑得更厲害：「婆婆（我嘅花名）啲想像力好恐怖呀……XDDDD」大威亦言：「婆婆又俾人按咗個『笑掣』……」大威多咗個花名－－龍脷柳…而我就笑足５分鐘，先至勉強地忍住笑，繼續練水……
   
3. 不知不覺，跟住大威同瑪珍嘅步伐，我入到再深水啲嘅地方游，佢哋喺對面岸睇住我游過去，當我差唔多游到之後，瑪珍拍掌鼓勵我，而大威佢本來想豎高拇指讚我嘅，點知因為佢嘅動作，令到結果弄巧反拙……就係佢喺水底向我豎高拇指，我個腦又聯想起另一樣嘢……「人人搬屋」廣告最尾出現嘅老伯伯，又係笑住咁豎高拇指……我已經忍住唔笑，點知都係挨唔住……喺水底度笑到不斷噴出水柱XDDD，瑪珍見到呢個情況，又忍唔住笑喎～我又俾瑪珍嗰種笑法引到笑得更加犀利！！笑到呼吸一亂，喺離池邊２米左右笑到浸親～！！好在瑪珍即刻拉住我～！

之後我游到愈黎愈遠離1.2米深嘅分界線，原來已經喺２米深嘅地方游水啦！覺得好開心～多謝大威同瑪珍！當我喺水深２米嘅池游時，佢哋減慢速度陪我，如果我遇溺，佢哋就會扶起我，所以覺得好放心，可以安心游２米～不過未試過來回游咁多次，當堂冇晒力又暈暈地……

突破自己嘅限制，水中歷奇終於成功！亦都有賴佢哋兩個嘅支持同鼓勵！好！下次要游到距離５０米，之後可以安心落公眾泳池嘅主池游水啦！

今日同傳道人、強、細威一齊帶領青少年嘅歷奇活動，呢一次聚會人數唔係咁理想，不過既然主俾呢個數目我哋，咁就只管盡力帶領好呢個聚會。帶嘅過程，既睇清楚自己俾以前進步咗好多之外，仲有好多需要進步嘅空間。

今次聚會係成個歷奇活動嘅第一砲，所以所帶嘅歷奇遊戲係最溫和，只著重破冰（打破隔膜、彼此認識），之後幾次活動，難度將會愈黎愈高。以往我係參與者，係以第一身嘅角度去感受遊戲所帶黎嘅成長；而家以helper嘅身分去協助，變成以第三身角度去認識每一個年青人，視線比較宏觀，以俯視嘅角度去睇晒成個歷奇嘅意義。

以前曾經同傳道人帶領過呢啲活動，但係今次表現得更加淡定，少少緊張梗會有哩，不過比以前表現得放咗好多～有啲嘢仍然需要進步，就係準備不足，下次帶領遊戲時，我要喺腦中不斷想像之後所發生嘅嘢，有得預防嘅就去預防，仲要更加顧及冇咁活躍嘅參加者。

同強、細威合作得幾愉快，由於比較少相處，所以仍需要時間去warm up彼此，不過覺得佢哋成熟咗好多，以前係中學生嘅佢哋，對大家黎講，佢哋係一班好幼嫩嘅年輕人，而家變成咗喺大家眼中，好可靠嘅大哥哥啦～如果可以同佢哋更加熟絡就合作得更緊密。希望而家呢班年輕人，可以成為下一代嘅大哥哥大姐姐，接棒培養更加年輕嘅小伙子～其實我都係咁，中學開始返教會，以前大家都當我係小妹妹，好想大家去關心我，但係而家會喺能力範圍內去幫助弟兄姊妹，亦成為咗兒童主日學嘅導師，成為咗一個小leader～

總括而言，有傳道人帶住，呢次聚會完滿結束，希望下次有多啲人參加啦，而佢哋能夠喺之後嘅歷奇活動中更加有得著！

國家副主席習近平訪港，過程中訓斥香港治理班子，提示佢哋要「穩健施政，精誠合作」，可見中央對香港政府嘅不滿，亦探訪中產家庭，對通脹表示關注。

「精誠合作」，的確喺香港居民對政府嘅期望。因為政府辦事缺乏透明度，今年嘅七一大遊行，當中反映曾蔭權聘用副局長嗰方面缺乏透明度。咁又點樣叫做「精誠」？

被人指示咗錯處，個個部門都互相推搪，好似一站式政府熱線咁，處理市民投訴時，只將有關個案轉介到有關部門，而有關部門互相推搪，叫市民打去另一個部門投訴，好似人球咁踢黎踢去，唔單止問題得唔到解決，更讓事件好似雪球咁愈滾愈大，事情變得一發不可收拾。咁樣嘅場面，又如何論到「合作」？

習近平好關心香港嘅民生，希望香港政府能夠以紓解民困為主要嘅政策，而唔係眼著於政治。而家通脹嚴重，政府應該推出一啲設施去扶助貧窮線之下嘅市民，亦都要控制各行業嘅壟斷行為，例如控制機構減少加價嘅行動。

政府以利為本，為自己利益而妄視市民嘅需要，更加激起民憤，其實讀過中國歷史就會知道，好多朝代點解滅亡，係因為當權者不聽取諫言，好大喜功，誤信小人之言，貪圖宴樂，既然中學生深知道呢個係世世代代嘅教訓，何況現代香港高官，應該明白更加呢個道理先係，但佢哋仍然不知悔改，只貪圖眼前嘅好處，自私自利，但係由遠見而言，當激起民憤時，分分鐘連職位都不保。

政府既然聽咗習近平嘅訓話，呢段代表中央嘅訓話，就應該好好反思，接受中央嘅意見，加強各部門嘅透明度，各部門緊密合作，市民就會感受到香港政府做緊嘢，曾蔭權嘅民望自然會高返，中央對其之評價亦相對提高。

我仲擔心緊暑假時，確唔確定到圖書館會員會唔會喺暑假幫手，眼見圖書館立立亂，覺得好煩惱，因為單係執拾書籍已經咁令頭痛，仲有舊年圖書館裝修之後，啲影碟同埋其他參考書整到立立亂……我仲有十日大假要放，希望整好晒之後，可以放心去放大假，唔駛連放假都要返去完成埋盤點……

但係　神好憐憫我，平時同我好熟嘅學生，佢哋平時要擺圖書上架時，佢哋唔多願意，但係佢哋心地其實係好善良嘅，今次佢哋竟然自動請纓話喺暑假可以日日上黎幫手，我覺得佢哋開始生性啦，連最任性嘅嗰位，佢呢幾日居然由十點到五點半放工時，佢一直幫我執書，而且仲要放得非常準確添！

而之前我深深明白呢份工係　神所賜嘅，喺呢段過程中，我學習只專注喺工作，以主嘅僕人嘅心去做嘢，其他所缺欠嘅地方，我相信　神必會供應，但係我始終都係人，難免仍然有憂慮……　神仍然咁憐憫我，仲要興起呢班小天使幫助我，我覺得好開心，仲要超出我所想所求，本來唔期望有多啲學生幫手，但係而家有多幾個應承幫我手，哈利路亞！我所需要嘅，　神已經知道，亦早已為我預備，透過呢件事情，我內心有顯著成長。

一直以黎，所有嘅工作（唔計學生平日當值），都係由我親力親為，喺呢件事情中，我諗要學習嘅，就係學習對人哋有信任，希望佢哋清楚晒點樣做啦，咁我就可以對佢哋更加有信心完成晒盤點。感謝主！

另外，一班天使們，好多謝妳哋付出暑假呢個咁寶貴嘅時間幫我喔！我會整啲好味嘅嘢慰勞妳哋哩＾＾

每次下雨，我做嘢嗰間學校嘅教職員toilet有一個好得意嘅現象，就係六格廁格會有四格係俾老師嘅遮蓋住個廁格頂……我曾經睇過網上嘅冷知識，話沖廁時會有菌彈上幾公尺，所以一直覺得老師們拎遮走時，實拎走埋啲菌……唔係咁衞生。

仲記得喺上星期TVB播過星期二檔案 - 病從天降，其中一part講到沖廁時，廁所水嘅下衝力激起更多嘅懸浮細菌四圍飄，我心諗，唔知幾多老師睇過呢個節目呢？之後下雨天返工，唔知仲會唔會見到一個個打開嘅遮蓋住staff wc嘅廁格呢？？今日落雨，行入圖書館途中順路入wc洗手，呵呵～真係冇遮打開撐住個廁格頂啵XDDD　唔～原來老師們有留意星期二檔案哩！嘿～終於知驚哩？忽然間覺得啲老師好可愛XD

另外，今日係學校結業禮，亦都係校長宣佈榮休嘅日子，好多同學都唔捨得……喺佢哋進行結業禮同時，我呢幾日都喺圖書館執書準備盤點。小息鐘聲一響，有一位同我幾熟嘅三位中二女學生走入黎，咦？有啲唔妥……見到其中一位個樣喊晒口咁嘅？乜嘢事呢？另一位女學話我聽，原來校長榮休，佢又驚我唔繼續喺學校做，話好唔捨得我，拉住我隻手哭訴：「我唔要妳走！」「嘻嘻…傻瓜黎嘅！我點會唔繼續做喎～除非學校唔駛我再做者^^"」「如果係咁，我哋個個都寫求情信俾學校！」………我應覺得開心還是擔心呢＝口＝　不過真係好可愛呀佢哋XD　佢哋咁唔捨得我，我好開心，真架！

之後我繼續執呀執，希望快啲排好全館嘅書，做埋盤點，希望唔會去到我放年假嘅日子都未做晒最好=.=　希望　神為我預備人手幫我，希望之前應承咗我嘅學生們，佢哋能夠順利地喺暑假幫我手就好lu！相信　神為我預備，因為佢喺耶和華以勒！（意思為　「神必預備」，出處：創世記22章，　神預備咗羊羔代替亞伯拉罕嘅兒子以撒作祭物）

今日睇咗明報嘅健康網，諗下諗下，原來自己日常生活中，不知不覺加深咗散光……

揉眼揉出散光
角膜晶體弧度不均影響視野

文章日期：2008年6月17日

今日睇咗好多人解答yahoo知識，有啲答得好好，好有誠意，但係絕大部份嘅人求其copy維基百科，將一大段嘢copy上去就叫做答過，與其係咁，倒不如叫人去維基睇咪仲好？而且根本就未詳細內容就copy上去，有啲段落都唔係答緊網友問嘅嘢，copy咗一大堆廢話，一心為咗儲分而作答，點解唔可以方便下人，睇清楚其他網頁點樣介紹網友問嘅內容，而取捨答案嘅內容呢？