送上以下嘅歌俾一位好朋友，希望佢可以振作～唔好忘記雖然我哋只係網友，但係我哋一直都喺人生中努力討　神嘅喜悅，我哋係同路人，所以方向一致，只係面對嘅嘢唔同者～終點始終都係一樣架！（將來喺天家入面我哋要排排坐，食果果XDDD），唔……到時可以隨時面對面傾計lu~我哋要努力走我哋嘅一生，然後實踐呢個承諾，一齊約定好冇呀？？將來妳得賞賜嗰陣，我一定會更加落力為妳鼓掌架！

本來呢度已經荒廢咗，一直用xanga寫blog，但係xanga播唔到音樂，係咪我唔識用呢？？=.=　唯有喺返呢個hompy嘅背景音樂度播歌俾呢位同路人聽下啦！

請繼續支持My Xanga!!Click 上面嘅RSS可以睇到最新一篇日記，但想要睇晒全部日記，就要click呢個網址：http://www.xanga.com/penguin_avis

星空的光芒

若你每次看到星空的光芒，願你找到那永不止息的希望，
無傷感，天有不測時，仍緊握這是生命鑰匙，
容讓我為你譜出美麗的詩；

在你遠處發現歌聲的飄揚，願你找到在你一生中的驕傲，
無傷感，當天你失敗，仍緊握這是生命起跌，
能令你點起心裡的熾熱。

原來在你我天空，有著阻隔不同，
存在宇宙空間，總有孤單的面容。
容讓每次的創傷，不會搖動你方向，
迎著你是急風追趕路漫長。

隨歌聲，微風中，飄到遠處進入你的夢。
留心聽，全相信，凡塵之間總有處可容。
無緊張，亦不用，誰人可將你一生斷送？
仍飛奔，存衝勁，常為世界之光努力地傳送！

由今日開始，唔再用呢個hompy啦，以下有條link可以link往新blog嘅，以後請多多指教！

http://www.xanga.com/penguin_avis

本來琴晚應該係可以用電腦嘅一日，點知電腦無啦啦故障，咁啱媽媽早返工，所以早咗食晚飯，於是洗埋碗就去泳池游水。

今日俾星期一稍為暖咗，落到水都唔覺得凍，池中只有兩三個人游水，而且係有心練習嘅泳客，覺得好開心，冇人阻住～上一個月明明迫到水洩不通架。

假如呢個副池長25米嘅話，咁我應該可以一口氣游250米左右，如果係２米深嘅池，由於心理質素關係，未必游到咁多……呢一晚可以盡情游，唔駛避忌撞到人，真係好舒暢。游到攰，企埋池邊抖抖，回想起瑪珍同我講嘅一句話：「唔好俾藉口自己，以前我識游水不過好驚水，俾大威教導下學識踩水，唔再怕水。」其實我個心真係好想突破啊！一直留喺安全區域嘅我，怕好似上次游到半路遇溺哩！所以俾呢啲經歷框住，咁樣真係可以嗎？會甘心嗎？

好多道理係知道，但實踐有難度，然而唔突破自身限制係會後悔……所以，我決定……！！雖然可能會遇溺，但願　神嘅能力喺我身上顯得完全，叫我能夠克服對水嘅恐懼同陰影！

喺前日嘅領袖退修營中，討論到教會要復興，條件係教會每一位弟兄姊妹都認同同一個目標，加上唔好白費資源於冇希望嘅事工上，求主俾我哋清晰前面要走嘅路。

感謝主！喺過去嘅星期日，有好多位弟兄姊妹成為傳道部嘅禱告勇士，為各弟兄姊妹身邊未信主嘅親人朋友禱告，福音本是　神的大能，莊稼已經成熟（即係主已經準備好部份人嘅心接受福音），願我哋禱告祈求同時，我哋亦盡好本份，伸出鐮刀，努力收割呢班莊稼，帶領佢哋信主。

假若未信主嘅讀者，你哋遇到基督徒向你哋分享信仰，希望你哋明白我哋只係想將最好嘅禮物同你哋分享；即使會諗到俾對方拒絕而覺得沮喪，但基督徒們仍然鼓起勇氣同身邊嘅人分享世上最大嘅福氣，因為你哋身邊嘅基督徒視你哋為最重視嘅人，更加想你哋活得更加幸福！受到感動，將hompy嘅音樂轉為以下呢首：

恩典太美麗

這天同聚於主聖殿    來數算我主恩典

他以性命來使我完全    來使我兩眼重見光線

這天同聚於主聖殿    來數算我主恩典

他賜盼望重生的泉源    還給我勇氣面對挑戰

恩典太美麗 無什麼可取替    唯求將心全然給主

來彰顯主愛多珍貴    終生愛神 傾心傾意愛別人

才覺生命沒有枉費

這天降服於主腳前    留心聽我主差遣

深信這日勞苦不徒然    神終會賜我榮美冠冕

衷心去讚頌 神極重的恩惠

獻我一生傳揚福音    來證實主愛何寶貴

請觀看稻田 主的莊稼在面前    遼闊收成 沒法估計

忠於使命 不惜一切來回應    能事奉您是最尊貴

唱片/詩集： 團契遊樂園IV

出版： Music 2000

本來同屋企人一齊掃墓，但由於同教會領袖退修日相撞關係，家人叫我下年先至掃墓。

今日可以同各領袖們一齊退到郊野退修，去到道風山，幾年前同團契去嗰度參觀，今年三月參加jess佢哋嘅婚禮，到而家已經係第三次黎到～道風山嘅建築好中國風，我哋一入到活動室，隨即俾木香吸引，連有關聖經嘅畫都用中國國畫嘅風格表現，別有一番風味。

去退修，當然唔少得有訓勉時間，今次講道嚴重超時，用多咗一個鐘頭嘅時間去聽，陳牧師好有心，呢個訓勉能夠帶俾一班教會執事有新嘅刺激，亦特別重點在於青少年事工，正是我哋教會最頭痛嘅地方。但對今次主題「重整，再出發」黎講，好似關係少啲，本來應該係個人生命嘅重整，但變成咗教會重整嘅主題=.=|||

道風山裝修過之後，變得整潔大方，兩個月後我哋將會喺嗰度舉行讀經營，能夠喺咁幽靜嘅地方退修，實在非常感恩，盼望當日天氣好之餘，大家有渴求　神話語嘅心，能夠透過讀經會查考「在世嘅僕人（耶穌）」更加了解。

嗚嗚～琴晚去酒樓食飯食得太多，好驚肥返呀～＠＠　今朝食麥皮做早餐，夜晚惟有放棄打online game嘅機會去游水啦=.=　無計啦，同哥哥共用一個電腦，星期一輪到我用……

今晚去邊個泳池好呢？反正過咗免費期，天氣涼咗，人應該少好多，應該冇乜所謂掛？

點都好，今晚要游盡佢～減多啲卡路里！（喺度苦惱緊要唔要帶埋保暖衣去，還是就咁著泳衣中……）

今日崇拜後冇返主日學，係因為我哋四個人趕住出上環文娛中心睇魔術表演……

星期四嗰晚，同刺蝟通電話，佢話家姐俾咗兩張正票同兩張換領劵，於是星期日搵埋瑪珍仲有大威齊齊去睇啦。啲魔術幾好睇，但十個有七個喺表演過程中包括變火、花同魔術棒又真係悶咗啲，最精彩就係詼諧大師嘅表演，佢誇張嘅表情、鬼馬嘅雜技令人無一不捧腹大笑！

由朝到晚不斷落豪雨，令到我哋幾個都好狼狽，由上環坐電車去到銅鑼灣落車，唔能夠行更多地方，惟有入去一間酒樓食飯，啲食物好靚，炒牛奶好好味！多謝大威同刺蝟～佢哋嘅選擇真係太好啦～下次不妨多啲作主啦！

食完飯入銅鑼灣SOGO行下，諗緊會唔會見到喺嗰度做嘢嘅網友，心裡砰砰咁跳，因為相就見得多，但係從未試過真人會面，後來喺佢工作嘅counter搵唔到佢，可能放咗工或者休息啦～

行街一直擔遮，返到屋企附近居然唔駛擔遮，唔係咁大整蠱丫嘛？？

今日達入十月，時間過得好快，仲記得兩年前嘅十月一號跟刺蝟、瑪珍同miu四個人去澳門，發生咗搭唔到車＆搞笑嘅「褲仔事件」；一年前同教會弟兄姊妹入camp參加退修……今年十月一號參加教會嘅康樂活動日，都係鍾意郊遊多啲哩！

十月，係康文署開放室外泳池嘅最後一個月，換言之下一個月，可以選擇嘅泳池少咗。所以把握機會游多啲水～今朝好奇之下加上天氣唔穩定，去咗瑪珍同miu曾經光顧過嘅室內泳池游水，據知嗰度池水超凍，於是著埋保護衣落水，果然超凍！@@係時候俾保護衣發揮功效啦！真係好有用，上咗水都唔覺凍！

個池好細，成班公公婆婆、師奶迫晒喺個池度游，游三、四步已經撞到人，甚至唔知點解咁多人游背泳＝口＝自由式已經睇唔到前面架，何況背泳！其實大家已經好忍讓，不過實在游唔到＞　＜　對腳唔敢踢得太大動作，今日不斷踢到尾隨嘅太太個泳鏡=.=|||　下次唔再去嗰度游啦！

去沖涼，更衣室嘅設計係新嘅，沖身間門後有一個空間掛嘢，再撥開浴簾就係花灑，設計得唔錯，花灑水力充足，沖身沖得好乾淨。下次再物識其他好嘅泳池游水先得～