冇血性了！香港特區政府喺曼谷機場事件上冇做過乜嘢，人哋中央政府同隔籬澳門特區政府都可以安排包機過去接載受困嘅同胞返屋企，偏偏香港特區政府諸多借口唔去咁做，令到滯留泰國嘅港人傍徨無助，要自己左撲右撲揾方法返香港，真係令港人丢架！

點解？點解係要等到有滯留嘅港人出左意外，死左人先至急急安排包機過去？點解而家可以安排到，大早又話有困難？保安局做過乜嘢去幫受困嘅港人？曾蔭權做過乜嘢去督促下屬去做嘢？

係咪需要流血，需要死人先至可以俾你班仆街睇到嚴重性？

事件上係咪需要有人背黑鑊，鞠躬落臺先至可以體現何謂問責制？咁到底邊個嘅責任最大？

曾蔭喺近期種種無能嘅表現，睇怕都係時候因心臟有問題要返屋企靜養，弄孫為樂，唔好阻住地球轉，自己又唔使心驚膽跳又出乜事唔知點處理，俾中央 X Y Z ，走啦老曾，唔好留個臭名啦！

呢個星期亂立立，泰國直頭國不成國，貽笑大方。到今日都未有解決方案，最主要係警察無能，咁大棚人聚集都冇嘢可以做到，除非要大流血先收到科。軍方又唔介入件事，都算少見。至於話誰是誰非我地外人都好難判斷。不過我哋特區政府喺安排港人撤出泰國方面認真失策，無能之極真係眼寃。特區官員嘅能力真係使人懷疑，抑或係漠不關心呢？

好慘呀！強積金公司寄左份報告嚟，嘩！我蝕左二萬銀呀，我已經係揀低風險，咁都出事，乜唔係保本基金咩，而家蝕入肉，肉痛死我呀！

話說我呢次俾人呃都唔係第一次，好多年前我坐地鐵返工又係撞到條女，當時喺中環總站，我上左架空車大把位坐，突然有條女着得斯斯文文成個OL咁坐埋嚟細細聲同我講：「先生，我跌左個銀包，可唔可以借廿蚊我轉車呀？」我心諗：「你都黐狠線，你跌左銀包重有錢搭地鐵？(果陣未有八達通，重係用儲值票)跌左銀包重有儲值票？上左車返工，返到公司有同事照住，重使咁瘀通街同人借？我俾廿蚊你，冇散子你都搭唔到巴士啦，咁大個手袋冇散子包咩？你當我傻仔呀？」我望佢一眼，啋都唔啋佢，呢條女醒呀，馬上閃落車！

老千何其多呢！

上個星期某晚，我開緊工出去買宵夜撞到個疑似騙子物體，但係呢個死臭西表演得實在太差，劇本實在犯駁得可以，真係笑恨死我！

話說我點幾鐘行出去買嘢食，過馬路行行吓撲左條女出嚟，喊咁口同我講﹕「先生，可唔可以借25蚊俾我呀，我啱啱係的士跌左五百蚊，而家冇錢返屯門，你俾個電話我丫，我會還俾你，信我啦，我喺ＸＸ寬頻做‧‧‧‧」下柵二十個字廢話，正常嚟講如果你喺大機構做通常會有職員証，為左加強我嘅信心，係咪應該show俾我睇呢？冇喎！

我問：「你唔打電話返屋企？」佢話：「佢吔瞓哂覺。」雖然街上面唔算黑，但係佢喊咁口應該會有小小淚光啩，冇喎，我重覺得有啲輕挑嘅表情。我一路冇停低，佢一路跟住我，佢話：「你唔借俾我就算啦！不過我求先喺巴士跌哂啲錢先冇錢咋！25蚊啫‧‧‧‧信我啦，我喺ＸＸ寬頻做，萬幾銀個月，實還俾你！」佢重跟住我行。我話：「小姐，我做一個鐘都係得25蚊咋！」

掉你老味！大早又話係的士落左錢，而家又話係巴士，無端端已經搭緊車又落乜嘢車？你搭車去邊？又落車做乜？你冇朋友咩？睇你成個 wet 樣，啲朋友都冇咁早返屋企，你又冇話連電話都跌理，屋企人遠幫你唔到，咪打電話揾係條仔囉，銅鑼灣咁旺阿豬阿狗都幫到你啦，使乜隨街搲錢？重有，你又冇話跌埋銀包，而家個個都用八達通搭車，使乜用現金，簡直疑點重重，你當我弱智呀？

結果跟左我成條街，我到左麵鋪入去買外賣，佢喺出便話：「你真係唔借呀？」我都唔狗啋佢，條死臭西就好冇癮咁消失左。

本來幫下人冇乜所謂，但係呢啲騙子利用人嘅同情心去呃錢就認真唔要得，佢哋會令到真係要人幫嘅人受到影響，起碼都令人懷疑，但係我呢單case就肯定係老千！

金融海嘯嘅影響逐漸湧現，幾個大金融機構都相繼大幅栽員，各大機構僱員都人心惶惶，都唔知幾時輪到自己，呢個時候俾人栽出嚟都唔使旨意喺預計日子裏面揾到地方落腳，呢班人過去揾到錢就大吃大喝，趾高氣揚，而家重唔手騰腳震等計數了！

最無辜嘅就係俾殃及池魚嘅人，佢哋職位唔高又唔低，但係又冇乜重要性，對公司貢獻唔大，少一個最多其他人分埋啲嘢做，好景時多個唔多，唔好景時第一時間就俾人叮走，現實就係咁殘酷，乜嘢企業精神，社會責任講就容易，為左保命，縮減支出係唯一辦法，保存實力等復原。唔通每個月等乾蝕呀？

又再講丫，好景時啲人又係一樣咁現實，左跳糟右跳糟，銀紙至上，幾時會講忠誠公司喎！

但係最慘就係金融業海嘯拖累到其他行業，從業員佢哋本身已經揾得唔多，經濟一不景就遭殃，就嚟食都冇啖好食。總而言之，打爛飯碗嘅陰貍揮之不去，失業大風暴將會隨海嘯退潮後嘅癈墟中再一次打擊社會。

好灰咩？我哋唔能夠唔有所準備，到咁唔好彩臨到自己身上心理打擊都唔會咁大！

（哈！呢段係後補嘅：啱啱睇番一個網友前幾日嘅 blog，原來佢係俾人栽出嚟嘅金融業部門巨頭，原來對公司有重大貢獻嘅人，俾人利用完之後，都可以俾人借機放棄，世界就係咁現實，乜嘢都有可能發生，問你做人重使唔使咁緊張呢？今日篇 blog 或者會得罪好多人，不過講到明呢度係我  自說自話  而唔小心俾你聽到，唔好意思！）

今日終於都可以入到 hompy 個首頁，可以正常途徑入自已個 blog，但係過去兩日發生過乜嘢事呢？係咪俾黑客攻入左呢度呢？我覺得 pccw 應該俾一個交待大家，係咪有人上傳左一啲病毒入去個伺服器度令到 pccw 要用三日先可以清左佢呢？好驚呀！容乜易我哋會透過 hompy 中毒，因為我哋個防火牆開左俾 pccw，好危險呀！

有冇人可以話我知到底係我唔妥定係 HOMPY 唔妥？點解呢兩日到登入唔到 hompy 個首頁，我喺屋企唔得，喺公司都唔得！係咪剩係得我先係咁呢？

要入嚟自己個 hompy 要兜大圈，又唔可以去到首頁度，成兩日，而家踏入第三日都係咁，如果唔係我問題即係咩嘢問題？如果係我問題又即係乜嘢問題呢？

問左咁多問題，有冇朋友答到我呢？有冇朋友睇到今日所發嘅嚕囌呢？可以唔可以俾個回應我呢？

問題先生 nemo 留字

搞乜？搞乜嘢？點解要兜個大圈先入到 hompy？pccw 到底做過乜嘢復修工作？搞左咁耐都未搞返掂個 hompy，你哋做過乜嘢？點解剩係 hompy 有事，其他 now.com.hk 分頁冇事？