SORRY呢,我都知我自己好耐都冇呢度出現,原因係因為我近排都係不停飛黎飛去(真係忙架,唔係講笑).我琴晚係北京返黎,今晚7點我又要飛過去成都啦,所以我開始掛住腳踏實地既感覺.

其實除左工作,今年我都有一樣野好忙,就係人地結婚我忙幫人做姊妹呀,伴娘呀.每一次睇見我D朋友開開心心咁結婚時,我就會諗幾時會到我呢?但又諗深一層,我連拍拖時間,對象都未有,又可以同邊個結婚呢?兩個星期前,我去試伴娘衫,試試下個度D人比左D新娘晚裝同婚紗比我試,試完出黎之後仲比佢地狂影相,話拎黎做sample比客睇,個一刻連我自己都以為自己係新娘呢,呵呵.

        首先要講聲sorry,因為自從我生日後一直都唔係香港,所以我而家先得閒再寫野!

        近排發生左好多野,有d係令我好開心,有d就令我好煩惱.先講開心野先啦!今年我過左一個我都覺得好開心但又奇怪既生日......

       原來我係好多心目中都係一個好好既朋友,因為係我brithday party有好多人好忙或者唔係香港都盡量趕黎.由其係我一個8年前既男朋友,我5年前同佢分手到而家先見返佢,發現大家都變左好多,唯一冇變既係,個種感覺依然好親切,好似親人咁!

多謝你地:Lean,BoBo,Joey,Terry,Carrie,Chris,堅堅,Ming,Terence,Eric Lok,Nicole,Ada,Dennis,Katy,華,飛,Mi,Rambo,Jerry,聰表哥,等等.......其實仲有好多新朋友仔,不過我唔記得咁多啦!(因為飲大左好多,呵呵)

     不過有一個人我特別想再多謝佢-Terry.佢係成晚令我最開心既人,同埋佢竟然可以一晚做左3件令我好感動既事,我會永遠都對你咁好,就如你對我一樣......但同時你又係令我最煩惱既人...唉!識到你,究竟係好事定唔好呢?

謊言-

最幸福既女人就係比男人呃左佢一世但到死個日都唔知!

眼淚-

最不幸既女人就係比男人呃左佢青春但仍甘心為佢付出!

    有時我會問自己究竟我要一個謊言定一串眼淚?我知道我想要一個謊言...其實謊言同眼淚都係一樣,都係比人呃,分別只在於你到頭來知唔知道個真相!可惜我每次都係換黎一串眼淚...係我太清醒定呃我個個人根本想我知道真相?

    我而家終於明白點解其他人成日講,女人都係蠢d好......

   我由1月28號直至琴晚岩岩落機,終於今日可以放下假啦,可惜得一日呢...

   近排我發現我想轉行既諗法愈來愈強,可能係我呢排見到既人有關.香港人工作壓力真係咁大?可能香港人唔知,其實好多國家既人已經好唔鍾意香港人(我講真,冇講大話).因為香港人奄尖...計較...井底...身為香港人既我都好唔想見到咁!但冇辦法,係香港人自己造成...我初初入行時,其他國家既人聽到我地係香港人都好開心,佢地覺得我地好nice...有文化...有同情心...但一個金融風暴,一個SARS再加多一個禽流感,令大部份香港人變哂...

   以前香港人有善既笑容,充滿愛既心,有智慧既眼神究竟去左邊,可以搵得返嗎?

  琴晚係我咁大個女第一次覺得原來我真係要好好珍惜身邊既人...同我最親既姨丈岩岩過身!

  我覺得一切既野都好似注定咁,平時我冇九點都唔可以收工,但琴晚我竟然七點就可以收.我亦好心血來潮咁打電話比我媽咪話想探下我呢個姨丈,點知變成見佢最後一面...令我最唔開心既係,我見到我表姐跪係床邊,不停咁同我姨丈話對唔住.因為我姨丈一直都好想佢同佢拍左7年拖既男朋友結婚,但個男人一直都唔肯.令姨丈一直都好唔開心.而當佢走個時,個個都叫佢嗌我姨丈一聲"爸爸",但佢點都唔肯.一個女人用7年青春都換唔到個男人佢自己爸爸臨走時嗌佢一聲!我表姐甚至跪係度求佢,佢都冇講...

原來有d男人,就算你比最好既野佢,對佢再好再專一都換唔到一d就算係假既安慰!

我今日返工只係識得係不停咁喊-我怕...我怕我係表姐,要面對自己最錫既人走,更加怕好似佢咁,投資失敗.好彩地,我發現我比我表姐後生,我仲可以選擇同轉身離場!

  我終於知道自己會係1月28號去南京,然後2月3號係上海返.其實...我好唔鍾意呢個地方.因為個度d人成日以為自己好似好有錢咁,講野大大聲.滿肚腸肥,衰人!!!

  但冇辦法,我做得呢行就預左冇得選擇自己想去邊,唯有希望d客唔好太難服侍啦!唉...

  唔知聽日會唔會有人同我講,我唔洗去呢?!

   點解我會咁講?!我3號,6號同聽日既9號都放假,其實只係証明而家我要做返有腳既雀仔啦,所以我先咁多假可以放呢...

   特此通知各位朋友,我將會有做量地官,你地可以放心搵我出街,因為我一定係香港呢!!!!

   雖然我而家好攰好攰...但我都忍唔住要鬧下呢間泰國東方航空公司(OX).就係因為佢我係泰國機場delay左4個幾鐘-算,我知航班delay好平常.但我真係諗唔明,點解我去程26/12/2005已經delay左3個幾鐘,回程都可以再delay4個幾鐘呢?!

   最慘既係呢間航空公司可以做到咩都冇得賠,只係提供免費巴士比我地返屋企,仲要係先到先得...不過一向識我既人都知道,我一定唔會等巴士咁辛苦啦,我當然選擇坐的士返黎啦!

   呢5日入面,我第一日就已經係機場比人鬧左3個鐘,第5日又要比人鬧多4個幾鐘,我前世係唔係欠左呢間航空公司架?!

   就係因為呢件事,其實都令我要諗下,我應唔應該再做呢行!因為我已經好攰好攰......