個blog好耐冇update啦!

但實在冇時間,兩隻野接力賽咁,

攪完亞女攪亞仔,之後又到亞女,

喪攰~~~~~~~~

呢對雌雄大盜又成日再圍呃飲呃食,

不過兩隻都咁精靈,咁識氹人,

仲可以點呀?!

一家四口入數碼港玩,本來有好多戶外遊戲,

好似吹氣彈床,坐船仔,不過突然落雨冇得玩,

但係玩超大彩虹池,扔d大個塊面既金幣,

仲有好多攤位遊戲,灝泓都玩得好開心!

出年9月灝泓讀K1啦!

前排我仲坐緊月,就由條虫帶亞仔面試,

我o地都有d擔心間學校唔收佢,

因為佢宜家仲係睇心情先講野,

好彩間學校肯收佢!

間學校o係屋企附近,行去大約15分鐘度,

獨立校舍,有圖書館,運動場,室內遊樂場,音樂舞蹈室,

兩文三語活動教學,唔係要死背生字,

而且課外活動竟然會有參觀茶餐廳!

灝泓比較好動同好奇就岩晒佢啦!

各位打算生仔既女仕,以下內容係我個人經歷,有機會影響你地想生仔既決定,

建議思想成熟並作好心理準備先好睇落去!

我之前一直都好唔想o係瑪+烈生第二胎,因為好耐以前試過耳水不平衡暈底,

俾人送左入去,醫護人員態度差,仲要我訓走廊,未暈完就俾d亞姐迫我起身食野,

當時我等珍姐黎到即刻自簽出院轉去浸會!

不過呢期實在太多人o係香港生仔,公立醫院既位都好full,

跟本冇得揀去邊間生,QE已經full左,唯有焗住去瑪+烈啦!

當晚氹緊亞仔訓o個陣突然間穿羊水,我地即刻執齊d野

帶埋亞仔去醫院,call珍姐過醫院接走亞仔,

去到瑪+烈因為珍姐未到,要帶埋亞仔落產房,d姑娘見到亞仔就叫條虫帶佢走,

條虫咪話未有人睇住亞仔,其中一個姑娘就黑面同語氣極差,

要條虫即刻帶亞仔走,條虫出名好脾氣都黑返佢面話返佢,

之後因為d姑娘話產房好忙,唔俾條虫陪產,話生得會通知佢,

咁條虫咪返屋企等電話(又唔敢訓驚我轉頭就生得)

我兩點度入產房,做左一輪檢查就得返我自己o係房,

隔左將近兩個鐘先有人入黎睇我,問我要唔要打止痛針or聞氣,

我想好似生亞仔o個次咁做冇痛分娩,佢就話做唔到,俾左聞氣個罩我就走左,

到差唔多5點先再有人入黎,我當時已經痛得好密,聞氣都冇乜用,

到6點o個陣我feel到自己要生啦,先見有兩個人入黎,我痛到頂唔住嗌,

就俾其中一個話我[嗌咩呀!唔好嗌好嘈呀!]又叫我{忍住唔好自己亂咁生,等陣生到下面爛晒呀!](語氣極差)

到我生左我話餵人奶(快d上奶),初頭話洗乾淨俾我,之後又話要擺保溫箱上BB房,

同一時間第二個又話胎盤多左D野,要俾醫生睇睇,跟住又冇晒人,我就唔知發生咩事一直訓o係度等,

訓到對腳抽根想叫人幫,先發現原來冇救命鐘,嗌出去又冇人應,

等到8點幾,有個亞姐入黎先有人幫我,我問有冇通知我老公,

佢幫我問先知原來冇人通知佢,亞姐就拎個電話俾我,

我打俾條虫講左幾句我就開始喊,覺得自己冇人理好慘,

有個似係高級d既姑娘見到就問我咩事喊,

我一五一十講完,佢就話醫生岩岩睇左個胎盤,話要拎去化驗,

(最驚嚇既事要發生啦!)宜家可以同你聯針

唔好玩啦咁大整估呀!

攪掂晒之後個高級姑娘就同我解釋一輪,話咩今日好忙,

幾個同一時間生,一時疏忽唔好意思.........全部都係我意料中既廢話,

9點幾上到病房o個陣見到條虫,我又忍唔住喊左出黎,有個姑娘見到又問咩事,

條虫咪同個姑娘講返,個姑娘之後見我又攰又咁耐冇食過野,就即刻搵人俾左d餅同奶我食!

如果我呢次係頭一胎,肯定嚇到唔敢再生,仲即時產後抑鬱都似!

 世上每個人心目中既理想生活都唔同,

你覺得以我條件應該嫁個有錢人,

住大屋著靚衫,日日食燕窩鮑參翅肚,

最好關照埋你唔駛做就叫幸福!

但我只要一家人齊齊整整,

亞仔亞女健康成長,就算住細屋都開心!

唔好將你自己想要但得唔到既強迫我去做!

你今日攪成咁都係你自己做成,

你再繼續要咁做人係你既事,但第時唔好問點解冇人理你!

亞女出院之後返健康院檢查,佢地話黃疸高要入院抽血驗清楚!

諗住當年灝泓都係咁要留院幾日照燈,咪近近地同亞女去明愛,方便日日過去!

點知醫生話個度數比較高,驚照燈都唔得,可能要幫亞女換血,

但係要返瑪嘉烈先做到,又要即刻帶亞女過去,再抽血照燈等報告!

到第二日下晝又話個度數落返唔駛照燈,可以同亞女返屋企,諗住安樂晒啦!

過兩日去健康院檢查,醫生話個度數高左D,又要返瑪嘉烈抽血檢查

唔係呀?! 唔好玩啦!

最後報告出左,醫生話度數係高左,不過未去到要照燈,可以返屋企!

我忍唔住問醫生,我過兩日返健康院檢查,如果又話度數高又要我返黎抽血咁點?

到時又搵黎攪,醫生就幫我寫底D度數, 等我返健康院俾o個邊醫生睇!

BB係都要早d出黎玩,

o係28/10朝早提前出世!

早o左兩星期都有3.47KG

因為餵媽媽奶,晚晚都冇乜點訓,

等我抖多幾日先再詳述今次過程啦!