自從小b出世後,日日都係做同樣嘅事,餵奶,同佢沖涼,洗衫,洗奶樽,真係悶死人,,冇哂自由,好似坐監咁雖然都有出過街,但返到嚟又要趕住做嗰堆野,搞到我少左好多時間陪我d貓,次次入貓房,一聽到佢喊,就要出返嚟,想同佢地沖涼都唔得,但最慘都係唔夠瞓,晚晚都係瞓得兩三個鐘就要起身餵奶,一日斷斷續續瞓得6,7個鐘,好慘但好在小b算係唔難湊嘅bb,夜晚肯瞓覺,又冇乜麻煩野連我媽咪都話佢好湊過我細個嗰時~~

頭嗰個半月我大姑拉請左個陪月幫,因為我咩都唔識,開頭請一個月,但佢地見我情緒好差,成日發脾氣,驚我有產後抑鬱症,咁先請多半個月(其實我都覺得我有少少產後抑鬱架)好在呢個屋企夠多人,有時小b好扭計,我就抱佢落去比爺爺,二姑媽湊,星期六,日仲多人同佢玩,咁我就可以輕鬆d,多d時間陪我d貓~~

唉,我幾時先可以一覺瞓到天光?

幾時先重獲自由

小b就嚟兩個月啦,但d人話佢似3,4個月大,自從滿月之後,佢個樣變得好快,完全唔同哂,已經唔似爸爸lu,個個都話佢似我多d,梗係對得我多姐,嘻….....

小b尋日滿月啦,佢收到好多禮物,有金鍊,金鐲,玉鐲,衫仔佢係圍村仔,梗係要擺盆菜慶祝啦仲有卡拉ok唱tim,食緊嗰時,小b特別好瞓,d人唱緊k佢都可以瞓到好''林'',之後俾人捉左去繞場一周都唔醒,真係服左佢但返到嚟唔夠10分鐘,佢開始喊,扭計,正一衰仔

小b已經改好名叫"鎧楠"意思係....幣..唔記得左tim

個衰仔成日都蝦我,成日扭計,飲完奶就眼光光唔瞓覺,要俾個奶咀佢啜,唔係嘅話過一陣佢就會喊,但個奶咀甩左佢都會喊,搞到我都唔敢走開做其他野,最慘就係無覺好瞓

比大家睇吓佢喊樣,似唔似打緊拳呢~~

6月28日小月終於出世啦痛左個幾鐘我已經忍唔到,要打無痛分免針但小b心臟3次跳得唔好,醫生要我即時全身痲醉開刀(心諗:會唔會入左出唔返嚟架)當我醒返,好似得返半條人命,完全郁唔到,個傷口好痛,見到屋企人,d眼淚不停咁流,咁大個女都未試過咁慘到7 月2 日先出院~~

依家要湊小b好忙,等我有時間先嚟探你地,同埋post小b嘅相比你地睇啦

岩岩覆完診,摸肚嘅姑娘話仲摸到小ｂ個頭，即未落哂去未生得（正常係摸唔到個頭仔先代表生得）之後見第二個姑娘話我今日預產期仲未生,叫我今晚或者聽朝自己入院等生吓,唔係嘛,我聽d人話唔知過左幾多日都未生先自己入院,姑娘就話唔等啦,可以入院ｇａ　ｌａ，等陣見醫生，佢會開張醫生紙比我入院，我聽完之後，覺得好驚，好緊張，好想喊唔知點算到見醫生，佢話如果我到７月３日前都未生先自己入院，我即刻鬆一口氣原來一講到要生，我係咁驚架

今日已經係預產期喇,對腳腫到不似腳型,但小b仲唔肯出嚟小b呀小b,你幾時先肯出嚟呀??