原來令自己開心係一件好難嘅事，想身邊嘅朋友開心係一件更加難嘅事！

事與願違！

^_^

係咪所有人都唔鍾意面對現實，冇錢、扮有錢、充大頭鬼；唔開心、扮開心、扮無嘢；無哂感情、扮殷愛、扮到好似以前咁 ...... 。人真係可悲，永遠都唔會面對問題同主動解決問題，永遠都鍾意將所有問題壓到最緊張、最惡劣、最逼切嘅時刻，先至會捨得解決、去面對。或許，人真係一個煩﹝凡﹞人，永遠心裡面冇嘢煩、冇嘢諗，就周身唔自在，鍾意吊住、吊住！鍾意拖住、拖住！

我真係唔知人究竟係「精」、定係蠢，一有問題嘅時候唔係閃、就避，咩都比人作決定、或者當冇事發生，永遠覺得時間會將問題沖走，獨孤一味 ...... 死拖，諗住拖拖吓.....問題就會解決，但其實問題唔會解決，反而仲嚴重咗。一直以嚟，我都係一個極度優柔寡斷、又冇主見嘅人，特別喺感情上，或者因為驚會傷害到人，所以發現咗問題都唔會出聲，「廢事講多、錯多」、「多一事、不如少一事」，其實自己係喺度「斬腳趾、避沙蟲」，諗住遲啲會冇事、情況會好轉，到頭來 ...... 只有 ...... 哈哈 ...... 兩聲！

喺感情上面，其實自己永遠最清楚、冇嘢可以呃到自己。拖只會將大家嘅問題化大，唔通你認為有問題拖吓就會解決到咩？尤其係大家冇辦法再一齊嗰刻，但雙方又唔肯開口、一拖再拖、大鬥耐性，根本大家繼續一齊就唔開心、冇感情、冇交流，同對住個紙板公仔有咩分別。大家不如試吓諗吓：如果自己已經比唔到幸福對方、比唔到開心對方，「留得住個人，留唔住個心」，倒不如比對方去搵自己嘅將來、自己杯茶，強逼大家喺一齊都冇意思喇！

其實兩個人可以喺埋一齊係一種緣份，要學懂珍惜、要學懂坦白、要學懂聆聽，對方唔係你肚裡面條蟲，估估吓好辛苦，不如攤開哂嚟講，大家會開心好多！

踏入咗07年，今年自己好似比06年更加多嘢諗，喺感情上嘅我真係覺得好亂，亂到唔識去分對、錯，或者喺感情上面根本就冇對、錯之分。你認為啱嘅嘢，未必真係啱；你認為錯嘅嘢，又未必真係錯！呢一切、一切都冇肯定嘅答案。

06年嘅感情事中，有人歡喜、有人愁！但係喺自己身邊嘅，06年確實係一個傷感嘅年份。一向熱冲於愛情生活嘅我，也突然間卻步。過去嘅06年，我選擇咗平平靜靜、空白一片咁過自己嘅感情生活，為嘅係唔想自己好似05年咁......隨隨便便咁開始、草草率率咁結束，希望揾到個適合自己嘅人先開始。或者，自己自以為大個仔喇，唔想再比自己錯嘅藉口，推說自己還是小孩，繼續不用腦地過活。

有時自己都唔係太清楚，人究竟係一種咩嘅動物？尤其係女人。女人所諗嘅嘢，男人通常唔會太明白，男人有時更加會反問自己：「係咪真係要女人同女人先可以溝通到？或者女人所諗嘅嘢、女人先會明白？」或者，呢個係男人比自己唔去了解女人嘅藉口！其實呢個真係唔係大部份男人比自己嘅藉口〈起碼我唔係〉，事實上大部份嘅女人比男人感性，所以令到男人喺好多情況都摸不著頭腦，要去了解亦了解唔嚟。男人其實係一種苦動物，唔去對伴侶好，伴侶就抱怨；突然對伴侶好，伴侶就猜疑。喺自己身邊嘅苦動物多的是，佢哋唔係唔好，佢哋已經想盡方法去了解伴侶，但佢哋往往因為伴侶嘅感性因由、情緒變化，而令佢哋自己喺情海中沉沒。有啲仲可悲到 - 伴侶遇上舊愛侶，發現大家感覺還在，毅然向佢哋提出分手，男方唯有「硬食」！你哋諗吓，教我哋男人點樣去了解女人呀？所以我唯有祝願身邊嘅朋友比自己幸福，唔好玩弄感情，自招惡果。

上天，

我願意用自己07年的幸褔感情生活，換取所有身邊朋友的幸福感情生活，獨個兒面對寂寞，這是真心的說話，承心保佑。

2007年第一天的大清早，人都未瞓醒，就收到一個驚嚇電話，一位相識數年嘅朋友突然致電，她訴說要尋死、亦訴說若她死了沒有人會痛心。聽到她的說話，我便問了她尋死的因由…… 金錢。﹝唉！又係金錢問題，人真係好奇怪，咁鍾意用九個蓋去蓋十個煲，唔爆至奇！﹞我當然冇幸災落禍，我只有不停的安慰她及關心她，她沒有理會，只有不停地哭著，我話亦未說完，突然電話斷了線。因為她沒有來電顯示、她的電話剛遺失了、擔心她真的會尋死，我也開始很焦急及失去冷靜，我只有不停地聯絡她的朋友，最後也安然無羔。

估唔到喺2007年嘅第一日，喺度嘅第一句說話係講：「唔好意思， 希望大家原諒！」

我都知自己衰，成大半個月都冇on blog，冇理過其他事，淨係顧住番工、玩、攪朋友結婚嘅嘢，經個禽晚2006年最後一個瘋狂派對嘅完結，所有都曲終人散。禽晚完全係一個有驚無險嘅派對，"hold史" 嘅我第一次攪個咁大型嘅party，有啲friend聽到包場玩，個個嘅第一個反應係：「包場玩，有冇咁串！」其實，我都唔想咁串，只係想攪一個party出嚟比所有朋友過一個開開心心嘅新年，最緊要大家開心同盡興。一開始嘅我都好擔心個party比一個以前夠哂朋友嘅朋友攪到攪唔成，最後喺啲真正好朋友、好兄弟、好兄妹嘅吹雞聲之下，個場爆到插針都插唔入，攪到班兄弟好冇癮，但我真係唔想、真係唔好意思。所以吸收咗今次嘅難忘經驗，下次 ...... 決定唔做"hold史"，淨係walk in算數，做"hold史"又冇得玩、又係咁比人射，不過禽晚係開心嘅。

2007年1月1號係新一年嘅開始，其實我都冇乜嘢自已望，望嘅係所有身邊嘅朋友開開心心、感情穩穩定定，唔好有咁多交嘈。最後，希望個個Happy New Year!

特別嗚謝 - 阿楝(好兄弟) 、阿Milk(好阿妹) 、阿May(阿嘉朋友)、阿Joe(好家姐)

大家有沒有想過自己應該怎樣對待朋友呢？
我真的越來越弄不清，亦很想去弄清楚。
相信大家亦嘗試過被朋友或信任的人出賣，這種感覺真的一點也不好受。
今天下班後，收到一位女性朋友的來電，她哭訴說被一位交心的朋友出賣了，她們之間所傾談的對話，竟被第三者知道，亦傳入她耳內。
突然間，我也來不及作出任何反應、也不知道怎樣去安慰她，因她哭得真的很厲害、心情真的差透，我也無何奈何。
在她哭泣間，她突然問了我一條問題：「你會不會出賣我？」
我也很直接、亳無掩飾地回答了她一句：「今天，我不會；明天，我也不清楚。」
她聽了這句話後，面色一沉，而我也並沒有作出任何解釋，大家就沉默下來了。
那刻，我也不清楚自己為何會這樣回答，但我真的不想欺騙對方。在我心中，朋友的信任真是一文不值嗎？我可以回答：不是。
但又有誰可以百份百肯定任何事及明天呢？

我仲記得喺細個嘅時候，自己真係好鍾意同人爭嘢、咩都都可以同人爭一餐飽，最鍾意就係同阿妹爭玩具玩，有時我哋仲爭到喺度喊，但永遠爭完之後，自己都係將件玩具擺埋一邊，冇去玩件玩具。或者，由始至終自己一直都唔係想爭件玩具嚟玩，而係想enjoy爭嗰個過程、同埋爭贏嗰種感覺。

其實人越大、想爭嘅嘢應該越多，但相反自己就人越大、越唔想同人去爭嘢，有時自己仲心諗：「係你就係你，洗唔洗同人爭呀！」。其實呢種諗法，我都唔知由幾時開始。或者，自己係因為曾經同人爭過嘢，爭到件嘢之後，又比人爭番，爭嚟爭去，自己都覺得好無癮，又嘥哂啲時間、又攪到自己唔開心。所以我就好怕同人去爭、亦都好憎自己同人去爭，有時爭完嘢之後，都唔知自己為乜同人去爭？爭嘅感覺真係好討厭、爭嘅過程更加恐怖，你完全可以睇到人性嘅真面目，一個好恐怖嘅樣、一個不擇手段嘅樣，佢哋為咗得到佢哋想要嘅嘢、達到佢哋想達到嘅目的，會不停喺你背後打你「毒針」，講盡難聽嘅說話，但唔通佢哋又會開心咩？良心又會過意得去咩？