權力真係會令人腐化同墮落，所有野都係神比架，我覺得得到越多恩典、擁有得越多o既基督徒，更加要謙卑感恩。希望如果有一日我得到好多野o既時候，唔會驕傲自大，而係充滿感恩謙卑o既心。

基本上人o既本性都係欺善怕惡、鍾意爭做大、得寸進尺、好嫉妒o既~神真係好偉大、好有愛心，咁公義、咁良善、咁有大能o既神，竟然會愛我地呢d咁有劣根性、咁自以為是o既罪人。

凡較力爭勝的，諸事都有節制，他們不過是要得能壞的冠冕，我們卻是要得不能壞的冠冕。 哥前 9:25

唔知係咪最近奧運呢，我成日都聽到呢句說話，上堂阿sir講，崇拜又講，公司聽節目又講，節目仲用左個好好o既寓言故事黎講，令我諗起一首歌喎~~

冷冷的空氣 把心緊緊的封鎖
舔舐著傷口 拒絕再試著彼此溝通
愛太重 才讓兩顆心受折磨
心太遼闊 不願為愛而忘記自由
兩顆心倔強的拔河
誰都不示弱 誰都不願先放下自我

我點先可以做到攻克已身、叫身復我呢?

今日終於都同阿芝&阿霍選定gathering o既場地喇，阿霍同阿芝仲好勇咁打左比d同學仔，勁，有成二十個同學仔出席，我連訂都落埋喇，希望d同學仔唔會甩底啦~~~

開始諗，其實我應唔應該搞呢個gathering呢???!!! 我驚我會變左甩底果個，自己負責做coordinator但唔出席~~haha~嗯...真係估唔到阿芝會叫阿霍打比小儀喎，不過全班gathering就梗係越多人越好o既，嗯....仲會見到其他人架喎，嗯.....好似整左個氹比自己踩落去添，希望果晚個個都會開開心心喇。

******************************

不斷出現d令我感到無奈o既人，"留一步，誰都好" ，呢d，可能都係試探。

前日發生左一單幾令人唔開心但又幾欽佩o既新聞，就係有兩位消防員為左救人而犧牲左自己o既性命，其中一個仲得廿五歲添。

佢地o既行為無疑係值得人尊敬，但係係咪真係最明智o既決定呢? 或者佢地都估唔到自己會冇左條命，又或者佢地係預左會冇命。不過實際d睇，一個廿五歲o既消防員，如果佢今次唔係咁搏冇死到，佢起碼仲有幾廿年去救人，幾時都話救人都要顧左自己安全先，o係呢個原則下，可能今次盡左力但都救唔返一d人，但可以保住自己條命，未來仲有幾廿年要救，仲有好多命等住要救，咁後生就死左真係好可惜。

另外一個四十幾，雖然比較成熟，但仍然可以有好多年比佢繼續去救，而且佢有老婆仔女，佢咁樣死左，佢老婆同女都好慘。男人o係做英雄之前，都請考慮一下自己o既屋企人。懂得愛惜自己o既生命，懂得保謢自己，先有資格、有條件懂得愛人同保護人。

我咁講好似好衰，但其實我係好尊敬佢地，佢地o既行為係可敬o既，但唔係好適宜效法。

唔知係咪天氣熱，加上自己心情唔多好，有d燥底，想玩自閉，而家習慣左有野都唔會同人講，尤其是公司o既野，講又好似講人是非咁，所以我只好沉默，冇錯，沉默的羔羊就係我，yeah~~

我要學習唔好為太多未發生o既野憂慮，將來o既野冇人會知，亦唔到我控制，所以我要學習專心仰賴耶和華，唔好諗太多，諗太多亦對身體唔好，搞到自己胃抽筋左2日，為咩呢~~

果日上個人成長，講師話好多時我地對住外人同對住屋企人係2個樣，對住外人就eq好高，但o係屋企就好似變左個人咁，我覺得呢個係我，講師話原因係我地恃寵，覺得阿媽一定會忍我地，其實我都覺得阿媽係幾o鍚我o既，咁當然我都o鍚我阿媽，不過我唔明點解我阿媽對住我就硬係要擺個家長樣我睇，明明覺得我好都唔會讚我，我o既完美主義性格可能唔多唔少都係因為受佢影响啦~~

我好想去玩，記得去左北京果個星期，雖然唔算好開心，因為始終都係公幹同有老細o係度，但都可以暫時忘記左香港o既野，投入大自然 o既懷抱，但返返香港，d壓力又返晒黎，我好想真係自己放假咁同d朋友去旅行散下心，可惜我呢一年都唔會有年假，救命呀~~~~~今日放工好似擔完泥咁，個膊頭好似比d磚壓住，原來壓力係有重量架。

有好多野，我除左等，仲可以點，其實我好唔鍾意呢種感覺，好被動，好似等判刑咁，但係神要我忍耐同等，咁我就等，愛是恒久忍耐嘛，ok~~~

呢排可能壓力大，心情有d緊張，所以少左禱告同靈修，少左同神好好咁去溝通，但係感謝主，主透過尋日第一堂o既個人成長，同今日聽o既節目，同孩子講左好多好多說話，比左孩子好多o既提醒，講左好多我o既問題；今晚靈修o既時候，主仲比左我好大o既安慰，感謝主！     主寶貴o既地方係，有時人會多野煩到自己都唔知自己為咩煩同唔開心，以為自己最擔心o既事係蘋果，但主卻反而比自己更了解自己，話比自己知原來自己最驚o既事係橙，主會一一將人心裡面o既問題，犯過o既罪都話比人知，又會比人及時o既安慰同幫助，以及心靈o既醫治，呢d就係主深不可測o既智慧同大愛。只要願意完全o既信靠，主就會用佢o既愛同大能，賜比人喜悅同豐盛o既生命。

去完北京個trip返黎喇，去之前因為接近奧運怕有危險，所以都低低調調咁，終於都平平安安咁返黎，個camp都好順利咁進行，感謝主。

好感覺到成個trip神都係與我同在：

day 1： 落左機都成三點幾，攞埋行李就比司機接左去酒店，咁我同partner就係酒店抖左陣就會合向老師佢地去食飯喇。o係香港答車去機場時自己有d擔心，但車經過一間學校o既時候，我見到學校外牆句標語係 ： "你們認識神，就有平安"，感謝主o既提醒。

day 2

朝早去左一間三自教會o既崇拜，間教會好大幾靚，分好多堂崇拜，但都好多人，感謝主。崇拜完就去負責搞今次youth camp o既家庭教會，同果度o既人見面同食lunch。完左後，其他人要去天壇對面個商場行，我同partner唔行，就去左天壇，好感覺到呢個係神o既安排，因為我地冇咩時間觀光，天壇係唯一去到o既，但去左後比我認識到原來中國人o係古代已經有上帝、覺得天係萬物主宰、人要祭天敬天o既概念，證明基督教並唔係西方o既教，甚至可能舊約時代，福音已經傳入中國。

day 3-6 ：入營地，營地係o係個山谷度，幾偏遠下，但果度環境好靚，空氣好清新，好涼，我地瞓o既係木屋，我一直都想試下住卡通片入面d木屋，今次真係比我試到喎~~haha~果度有雞、有羊、有兔、有狗、仲有好多昆虫，d羊朝早會出黎食草，雞會啼，真係好大自然 feel。

o係camp 度向老師分享過三次信息同呼召，感謝主，每次都有朋友仔決志，最尾一日呼召完，我地跪 o係度禱告，聖靈再一次感動我 (唔知係感動定充滿) 為自己o既罪痛哭認罪悔改。   另外我發現主呢排要我關注o既事都係要同家人融洽相處同為自己o既婚姻禱告。其實我係仲未有心理準備，但神既然有咁o既提醒，我諗主已經為我有安排，而家係要我禱告預備自己o既心同等候主o既安排掛。

總括黎講今次o既trip一d都唔辛苦，仲好健康，唯一辛苦係o係camp度朝朝要六點幾起身。另外奇妙o既係，向老師個仔 & 另外一位台灣o既同工，都係同我同一日生日，果然一切都係主o既安排啊~~