從名古屋到飛騨高山到白川鄉到京都到大阪, 都發現一個不變的現象。  一般食肆商店, 晨早八時才陸陸續續開門營業, 晚上七時半左右便關門大吉, 除了酒店、24小時的金龍拉麵館和銷金窩式的夜店。  在香港這是罕有的, 即使是高竇如蘇杭街的生記, 也會營業至晚上九時。  大阪車水馬龍, 攘往熙來的情況, 絕不會比香港遜色, 為何他們一早收市而不搾盡賺錢的一分一秒呢?  租金便宜?  相信不會。  大阪雖然不是東京, 但也是關西重要城市。  人工低?  租貴人工也不會低。  有理由相信, 是因為他們重視服務和產品質素, 工時過長, 很難維持水準。 

這是一個可怕的國家, 沒什麼特別豐盛的資源, 經濟卻蓬勃發展, FMCG新產品層出不窮, 走一轉藥房, 已經目不睱給, 內銷市場已經足夠企業生存。  年輕的一代都體格強健, 街上很少碰到不開心的小朋友。  沒有人在公車或地鐵上大聲談話, 地方乾淨得無話可說。  美食廣場的顧客, 用餐完畢, 會清理桌子, 將食具送回退卻口, 一切都像他們的鐵路系統, 井井有條。 

覺得可怕, 是因為我們的國家, 望塵莫及。  還有幾天便奧運了, 希望不會是同一個世界, 只一個笑話。

晚飯吃過, 這裡就是我們納涼睦鄰的地方。 家家戶戶門口都有一條這樣的石板凳, 大大小小, 沿巷而坐, 閒話家常。 

在未有電視的年代, 這就是飯後睡前的節目, 加送蚊子、螢火蟲或蝙蝠。 

如今石板依舊在, 閒情不再, 連看電視也要關上大門, 因為戶戶都裝了空調。 

夜涼如水, 天階暮色, 印在國語課本上, 只是文字, 幾乎沒啥意義了。

龍璽十年慶暨傑青在紅磚區舉行, 人不在江湖, 事應不關己, 全因叨SD光, 方能參與其盛, 與業界翹楚聚舊。  最值得高興, 是與孫大偉再碰面, 不覺相隔已經十多年。  還記得初到台灣履新, 改組公司, 冷不防陳橋兵變, 創意部醞釀集體辭職, 六神無主之際, 大偉到訪, 他人又高大, 聲如洪鐘, 在我辦公室門外, 刻意對著創意部字字鏗鏘的講: 假若有什麼狀況, 不用擔心, 要走的人讓他走。 我公司會無限支持, 直到你請齊人馬, 運作順暢為止。

兵變就這樣平息了。 

之後事忙, 人在台灣, 彼此卻很少見面。  大偉不但見解精闢, 創意出色, 俠義之風, 兩岸三地人人仰慕。 

在他面前, 他永遠是一個磊落的大哥, 而我只是一個私縮的侏儒。

有way有say

收生爭客沒有兩樣, 都要做市場推廣。  最近在電台每天都聽到個有way有say的廣告, 連教育事業都要做到如許市井通俗, 可見目標受眾和策略的聚焦何在。  誰說英皇無所不用其極。 

一邊起樓  一邊拆牆

早前, 朝朝被hodie帶住在下雨天出發。  這幾天, 電台卻不斷在晴朗的一天, 針對港鐵對傷健人士的漠視, 不怕米飯班主封殺, 將預算轉投他台。  港鐵市場部及其廣告代理商又充耳不聞, 繼續推廣宣傳, 倒錢落海, 對企業形象百利無一害。  其實聽到有噓聲, 暫停你至精。

Fast food vs Slow food

老麥重播形象廣告, 母親帶著孩子拼命地趕, 又圍棋班, 又游泳班, 填滿空間為止, 但竟然在麥記慢下來, 節奏好大對比。 廣告是否收效, 因為不是促銷, 很難量化, 但令我想起一個師奶。  這個廣告反映了生活。  重看, 我覺得幾中。  Human truth有了, product truth還須靠廣告主的產品和服務。 

求己不如求人

Help is out there, you just need to ask for it.  當然不可以心存依賴, 但找人幫忙, 縱使解決不了問題, 或多或少, 總會得到一些不同的觀點, 觸發不一樣的想法。  我不善聆聽, 更不懂求助, 走了很多寃枉路。

點算

因為彭志銘的關係, 今日跟一個叫David的導演見面, 談民主黨的宣傳片, 給些意見。  訴求已經不堪, 手法更像西九, 我好像沒留什麼情面, 慣常尖酸。  但是一個政黨, 竟然如此, 恕我失言。  政治也是面口飯, 吃這行飯, 語意模糊, 怎能說服眾生。  羅馬非一日建起來, 也非一日塌下來。  冰封三尺, 難怪愈來愈不濟。

"horizontal wind horizontal rain,
number eight wind ball is hanged,
receiving interview change schedule,
me so open heart to no work this morning."

Tribute to the inspiration between the Red Bricks,
now I can write like them.
Who says no one can teach old dogs to do new tricks.
Yeah~*o*

為乜?

工作究竟為乜?  究竟為乜工作?  後生嗰陣, 從來無問過自己一個咁哲學性的問題。  這個問題, 等同“活著為了什麼?  為了什麼活著”一樣, 令人低首沈思, 充滿人生大道理。  我腦鈍, 當時我知道, 工作就是為了賺錢, 有錢就可以過活, 不用再攤大手板, 甚至仲可以幫補下屋企, 減輕父母的負擔, 繼而過一些比較獨立自主的生活。  大學畢業, 如果連這些基本也做不到, 就只談理想、人生、目標, 這麼宏大的話題, 不是太虛, 就是太前。  我係普通人一個, 會行會走, 會講粗口, 但不會太前。 

加入了這個行業之後, 也沒有什麼大想頭, 更不敢妄想自己可以提升本地創意, 衝出香港, 帶領或鼓動業界打進國際舞台。  只求緊守崗位, 做好自己要做的部份, 千祈唔好累街坊。  你可以話我無大志, 但我自己怕自己志大才疏更坎坷。  到咗今日, 更唔敢話作育英才, 班客俾咗錢, 我做足功課, 雖然仲未做到百分百, 但希望不會o徙大家時間。  工作為了什麼?  為了不讓自己成為家人的負累已經很難得。 

新不如舊

阿民早前話我知, 鰂魚涌開咗間生記。  幫襯過幾次, 始終覺得中環先係波。  第一, 呢度啲阿姐好“奪”, 又落單又寫冧把又盛, 都成日賣錯嘢。  第二, 薑蔥豉油孤寒到死。  第三, 啲炒米粉乾而不香。  好彩個粥底都維持番咁上下。  你話我古板又好乜都好, 中環係無法取代嘅, 生記始終得一間。

新ROI

阿Joe搵工報捷, 我贈咗佢三個字ROI。  我話做人要有新嘅ROI, 就係:

Responsiveness 

Optimism 

Integrity

共勉之。 

PS.  ROI是DDB的創意準則牆腳石, 就係Relevance, Originality, Impact。  有ROI的創意, 才有ROI的成果, Return On Investment之謂也。

含又得, 氹又得

嶗山礦泉水有個廣告, 結尾個西人, 各執一枝, 對住鏡頭話: 含嘅!  氹嘅!  硬銷有鹹味和無味可供選擇。  呢行, 應該唔係好多人睇過; 頂籠, 睇過下你精我都精, 飲杯竹葉青。  之不過, 搵個外國人endorse一下, 就自我感覺檔次提升, 呢種心態, 五十年不變, 詳情請參閱各大樓盤廣告。  係咪真係hodie, 好難定奪, 但客buy, 咪有水, 有水咪好啲咯。

BIO

按大會要求, 為自己寫咗個  bio, 大意如下: 

有條醒友講過, 做呢行嘅人, 都會經過呢幾個階段…

仲做得, 就做。 

唔做得, 就做管理。 

管理都唔得, 教書咯。 

我乜嘢階段都做過, 但依然相信“做”呢個階段最過癮, 管理最無癮, 教書吊癮。  頂癮係職銜通脹的今日, 將多過兵。  安於“做”嘅, 愈嚟愈少, 兩三年貨仔就要管人, 佢哋錯失咗過癮嘅機會。  已經無人好似Dave Trott咁, 到退休, 卡片都係印copywriter, 自得其樂到。

重投楊家

跟過楊家、陳家、熊家, 今次又重回楊家, 跟一個唔收錢嘅師傅。  鄭師傅不重形似, 但求神備。 他認為體骼因人而異, 彼之形, 未必合汝之形。  其實各家有各家所長, 一如廣告, 最緊要有一個幫你開竅的師傅。  今勻, 希望可以開竅, 形神俱備。  今日要努力將以前的包袱抛開, 主練鬆沈。  自問尚武精神, 竟是井底之蛙。兩小時下來, 鬆不至, 沈不達, 氣餒甚。