http://Mobi-Zoo.com

已經開幕!!!

終於有時間再創作扭蛋貓嘅漫畫。
除咗爽滑仔之外，呢排仲有好多嘢忙緊。最哩hair係是要學煲湯，上次煲木瓜雪耳湯，由於落得太多雪耳嘅關係，令到煲湯好"漏"。今日就要煲"紅豆響螺片蓮子淮山杞子湯"，都唔知煲出嚟入唔入得口...我同扭蛋兔一樣好擔心。

點解咁快又一年嘅?好似過咗年冇幾耐咋喎...
呢一年，令我最開心嘅事，係爽滑仔可以上RoadShow，同埋喺報紙登四格漫畫。
最難忘嘅事，係派出扭蛋貓參加比賽,得到好多朋友嘅支持。包括好多hompy上素未謀面嘅好友，同埋一眾參加呢個比賽嘅同志們！
至於最唔開心嘅事.......................忘記哂囉，做人都係開心d有著數！
嚟緊2006年，喺創作路途上，我已經有哂全盤計劃，就係：
衝呀！衝呀！衝呀！

聖誕節喺朋友屋企試玩過部NDS之後，終於忍唔到手買咗！
淨係世嘉隻"為你而死"同埋"BB從哪裡來?"已經玩到停唔到手！
就連平時好少打機嘅老婆仔都唔捨得放低部NDS。任天當果然有佢嘅辦法！
NDS令我對任天堂下一代家用機"Revolution"更加充滿信心，必買！
P.S. 話咁快05年就嚟過去，預祝大家有更加順景嘅2006！新年快樂！

希望大家喺聖誕假期，可以忘記所有煩惱，同你最愛嘅人：無論係屋企人、朋友、情人都好，過一個溫馨難忘嘅聖誕節！
祝全世界聖誕快樂！

見到第四期成績神秘地延遲一日，已經有預感會輸...

但係當真正睇到結果時，都係好難接受...

之前投入咗咁多心機去創作扭蛋貓，仲唸住可以有回報o忝...

琴晚瞓到半夜扎醒咗，突然有種白費心機嘅感覺...

仲有d嘢令到我好心翕，不過唔方便講出嚟...

心情真係好差...好沮喪...

由十二月十九日凌晨開始，就一路留意住"我哋有份創意盤地"嘅第四期成績表，不過等到而家都仲未有公佈。

真係好心急想知道結果，無論輸贏都好。

初時參加呢個比賽，目標係希望扭蛋貓可以打入最後十名。當知道呢個目標達到咗之後，真係好開心！但係一路都冇唸住可以拎冠軍，只係希望可以透過Hompy呢個平台，令到多d人認識"扭蛋貓"同埋我嘅創作！

尤其是見到其他參賽者嘅作品水準咁高，我心入面已經打定輸數。但求大家睇過扭蛋貓嘅創作之後，覺得過癮，記得"扭蛋貓"呢個名，我已經好滿足！

仲記得喺2000年去日本旅行嘅時候，有一晚喺心齋橋，見到個後生仔擺地攤賣自製貼紙，我覺得佢畫d公仔幾過癮，就幫襯佢買咗幾張。一年後，居然見到蘋果日報介紹呢個後生仔設計嘅卡通角色，仲推出咗好多商品o忝！呢個後生仔，就係Gloomy(暴力熊)嘅原創者Chax。

呢件事對我影響好深，喺之後嘅日子，我創作咗爽滑仔、扭蛋貓同埋其他幾個角色，希望自己都可以擁有一個受歡迎嘅卡通角色，同埋屬於自己嘅產品。

不經不覺，創作爽滑仔已經超過三年，雖然佢仲未為我帶來任何收入，但係見到每一個支持爽滑仔嘅留言，我都會提醒自己要繼續努力創作落去。

就好似見到大家留言支持扭蛋貓嘅時候，就會有創作嘅動力一樣。

無論最後比賽結果係贏係輸都好，我都好多謝所有支持扭蛋貓嘅朋友。

我都好多謝NOW.com舉辦呢個比賽，令到我設計嘅卡通角色可以俾更多人認識，仲首次為我帶嚟收入。