才女，為何要苦笑，明明你可以大叫﹗
再搬﹗
March 11,2007
俾意見 [1]
文章URL
引用 [0]
頂點
February 20,2007
(1) press event之前準備press kit，有4份新聞稿，
本來一隻700幾MB既CD放4張相已經好唔符合環保原則
點知 3份新聞稿講product，1份講展覽，
你怕記者唔知果張相係關於個展覽的話
咪o係個word file 插入埋張相
再o係個CD Cover寫清楚囉
結果係點？
佢要我將果一張相分開另一隻碟再釘o係份新聞稿
我原本要燒70隻變左燒140隻﹗
(2) 話趕住send野去時代廣場counter俾記者
但全公司d人都o係度忙緊
咁o岩俾我見到貨倉同事話會去sogo
我：不如叫記者去sogo拎啦
佢：唔得，佢去Times Square借衫呀 (唔可以拎左先借衫？冇腳？唔識行？)
我：咁叫舖頭d女仔拎去Times Square囉
佢：唔得，SOGO好忙唔會幫你拎
我：叫Times Square d女去sogo拎囉
佢：D女仔好蠢信唔過架 (根本就係想我拎去﹗)
結果呢？
貨倉同事話佢去完sogo私人幫我地拎去Times Square
(3) 新來的manager話想o係新聞稿加我個電話
當然要先知會佢以示尊重
佢：下？d記者搵開我個喎
manager：有時你會行開左或者出去做野嘛
佢：咁佢地會打我手提囉
manager：其實我都係想俾多一個contact方便佢地搵姐
佢：你俾咁多個電話佢地，佢地會唔知搵邊個喎 (2個都多？)
佢：你都知有時d記者問題幾咁怪架啦，咁我可以即刻覆到佢地囉
manager：其實搵開你都係會搵你既，都係加多個電話姐，就試一個月睇睇啦~
佢：哦~我冇所謂呀~聽少d電話仲好啦﹗ (分明係發晦氣﹗)
(4) 有一日佢外出開會打電話叫我燒2張相落CD
SEND俾某某PR公司
幾星期後阿姐從房行出來問我地做乜淨係send相唔send 個logo俾人地呀？
咁人地點幫我地印poster呀？
佢：唔係我燒架隻碟
阿姐望住我：你燒架？
我只好話：係呀，我冇放logo
只係我冇講，不過阿姐只係叫我燒2張相，又唔講做乜，冇話過要俾埋logo人喎
(5) 人品又差
話說有日佢話收工要去買六合彩
我就話：死喇，叫左人幫我買，未拎返﹗
佢：哈，我係佢呢，中左就唔話你知喇，換轉係我一定會咁做﹗
結果？
小索子同我一人俾20蚊
仲話我知中左20蚊不如一齊去收錢
我祝你快d中頭獎離開呢度回到火星
世界這樣大唔係個個都貪錢貪到你咁﹗
(6) 話說有一日同事話返工既袋最好就係又大又襟
爛左都唔傷心果隻
佢：係呀﹗我都係搵最cheap果個袋返工﹗爛左都唔肉赤嘛
人地同事用既係幾百蚊利時貨色
佢呢？日日拎住果個叫BOTTAGA VENETA
(7) 夜晚8點幾我o係樹大量影印新聞稿
見佢停晒手又唔走o係樹睇新monday
我：你唔係等我呀可？我影完會自己拎落舖架喇
佢：唔係呀，我o係度等個同事電話之嘛，不過其實佢都可以打手提既，只係我真係好耐冇睇過雜誌喇﹗
份糧可以買幾千本新monday但佢選擇o係公司睇？
到底佢係咪冇屋企？冇朋友？
(8) 聖誕時話要搵支酒送俾記者做禮物 (因為gift set的主題與酒有關)
我：我o係citysuper見到有d粉紅色既酒，幾得意架，又襯我地個product
佢：下？果d咁cheap﹗至少都買moet啦
ok fine 你買moet咪又係買最平$140蚊果隻囉﹗
咁有幾好飲？
(9) 12月時佢放左半個月假
將所有電話飛晒俾我聽
我跟左一個sponsorship所以人地有我contact
幾個月後人地send email來恭喜我地得獎同要send product俾佢頒獎禮放display
我走去問佢
佢：(超大反應)佢點解有你CONTACT架？做乜會搵你架？
我：你果時放假我跟左D野咪有囉……
佢：得喇，你forward個email俾我啦，我自己跟返﹗
你最好就呢一世都唔好放假﹗﹗豈有此理﹗
以後你放假我就狂打俾你問你呢樣果樣
再唔係叫人地直接打你手提同你直接對話﹗
咁夠尊重未？
認真人神共憤
仲有果d等我去旅行一星期放堆雜誌o係我檯要我放入櫃既陳年舊事
都廢事數返咁遠喇
唔係同表姐傾開工作，都數唔到身邊的惡魔原來真係好惡頂﹗
但問題係點解我可以對足佢一年？
相比以皇無知的客戶，佢將我既EQ帶到另一新界限﹗
真係要多謝自己，更加多謝你，你將我磨成利器﹗
我有時覺得佢可能係有被害妄想症的﹗
學姑姐話呢D係頂點﹗你話點頂？
我真係好唔鍾意佢呀﹗>0<
腦筋急轉彎
February 17,2007
除左小索子之外
公司入面我最鍾意就係小妹芝芝
(俾佢知道我又叫佢芝芝實殺死我﹗)
幫得手又醒目轉數又快
呢d part time實在好到極
因為呢個小妹既出現
公司突然有一片「IQ題熱」
成日勁出題考我地﹗
我當然將呢D無聊IQ題發揚光大
一邊打邊邊一邊問
你睇你地諗到野都唔食﹗WAKAKAKKAKA~
結果一人至少都估到一條﹗
而終極無聊王竟然由Noreen以鵝攞多支奪得﹗恭喜恭喜﹗
雖然無聊，但估到仍是充滿快感的~卡卡卡
餘慶節目：NDS AGAIN﹗
用埋檯底插頭都要玩孖寶賽車
下次我唔敢唔帶喇﹗嗚~
闖入維園迫花市
「奪命較剪腳」最爆笑﹗
今年d吹氣公仔幾得意
大大包金象米同卡樂B
仲有真係有水既豬籠入水
行多一陣，頂唔順，都係走返出來
哎呀年青人，都係留番俾你地繼續迫啦
最後當然不能不提艷艷為我地做既年年有魚年糕
艷艷，雖然你估唔到又唔好孖寶賽車
但係你依然都是最好的，你知道嗎？
下次著返套Casual wear就可以著陸地球架喇﹗
是日金句：唔可以嗌出聲係咪好辛苦呢？ (玩NDS果陣呀﹗)
花市
February 17,2007
未去維園，先去花墟公園
本來成個plan唔係咁架
本來plan住去嘉年華個喎點知冇得去
返到屋企嬲到爆炸 (但又不能夠爆發﹗)
結果小睡片刻仲慘到一個人淥杯麵
激氣呀﹗
後尾先落樓食個宵夜
無啦啦話走去旺角個花墟
地方細細人又唔算多行得都幾舒服
豬年連d年宵玩意都得意d呀
原來今年商界sponsor d學生擺檔做生意
不過有d都幾gap，居然o係頂tamama帽上面加個豬鼻
或者整個屈臣氏蒸餾水樽話係「豬籠入水」
最後幫襯左一支橙色「豬花」掛左o係門柄
仲有孖寶賽車隻墨魚同星星電話繩
跟住
我又開心返晒咯 >0<
CALL ME MISS NO CHARACTER﹗
我認呀﹗
雜記
February 17,2007
忙忙亂亂地過左半個月。
工作就係希望快d快d快d走﹗走去邊都好﹗
一朝早返來見到張post it寫住即日lunch前要寫好press release
下？家陣「禁」個制就有喇咩？要有就有架喇？
兩個人夾手夾腳抬部21吋LCD電視返家
嘩，以後唔會再俾人笑個電視機仲細過看更果部喇
又發現原來LUSH係一個Wonderland
明明係藍泡泡咁既樣
放落水走來走去
d水就會變到海洋咁既色
仲有一條條海草飛飛下
不過唔係太敢試佢既雪糕mask
Yoga做左2堂咋﹗實在太少了﹗
但「比其他同事OT得少」的罪疚感
令人唔敢離開
其實做下Yoga都幾舒服
雖然過程中會好想佢快d完結
但做完又幾醒神架喎
仲有d fd話過做得多可以伸展軟骨
人都高d﹗
要再勤力d先得喇﹗嘿嘿嘿
仲買左《錦繡藍田》
總係好羨慕人家對生活有如此細微既洞察
我明明記性都好好
點解淨係記得歌詞同卡通片
連自己做果份零食稿放左o係關島本Take都記得？
仲有何韻詩演唱會VCD
企o係VCD舖苦苦掙扎
VCD好定係DVD好？DVD有The Making Of 喎~
最後因為窮，都係買左VCD >0<
一定可以問到人借DVD既~嘿嘿~
NANA 2
January 26,2007
睇左NANA 2
嘩..............
點解新果個阿八咁醜演技咁差咁作狀咁懶Cute
未習慣之前真係想打佢﹗掟牛丸﹗哼﹗
故事實在太現實了
明白佢想講人係會變
明白佢想講雖然人變但友情不變
但我都覺得如此友情有點變質
而且阿八攻心計既轉變實在令人難以接受﹗(會唔會變得太突然？)
有時我唔介意電影世界假少少
至少會令人覺得現實有希望有好pure既友情丫…
實現夢想同獲得幸福到底可唔可以係同一件事呢？
或者實現夢想要經歷重重難關
但有如此經歷都是一種福氣
唔係人人都有﹗
我的夢想同幸福都很小
所謂「身在福中不知福」
幸福既時候當然覺得獲得幸福好容易
只有失去左再尋找時先會知其實幸福唔係必然
唔知點解每個人都好似需要一個目標去奮鬥
有偉大信念當然好
冇的話，其實生活上仲可以有許多小目標
你確定現在每件事都做得最完美最妥貼嗎？
而我，同一個夢想，同一個目標，一直緊記在心中。
幸運的是，我覺得現在的自己很幸福。
之不過竟然有個傻婆睇NANA 2睇到喊喎
我就知點解呢呢呢
一．語．道．破
卡卡卡~THAT'S WHY YOU LOVE ME SO MUCH﹗
搞到我對住個Mon傻笑
明目張膽
January 21,2007
睇何韻詩之前
自以為自己好熟佢d歌
於是幾日內只狂聽新歌《嘆息橋》
據iPod數據指出
我3日內原來聽左19次
對於好少repeat歌既我來說實屬奇蹟
演唱會時突然聽到令我頗有感覺既歌詞：
若有一天公開明目張膽的愛
我怕會讓你太意外
我的愛 只願縮到最小 彷彿不存在
就算 我最愛你 情願好好遮蓋
化作了密碼 不公開
我一向 都慣自言自語 沒別人愛
難道你發覺我志在 就會肯滿足這期待……
歌詞本來以暗戀為主題
係我斷章取義然後對號入座
嘩，明目張膽喎，我都想。
我發現，原來我有點介意
平心而論我都冇將呢樣野對所有人坦白
至少屋企唔知同事唔知
有時我想一坐低就話俾阿媽知 (今次真係想講﹗)
但怕佢覺得我細，未定性
等多幾年？又怕佢年紀大唔知受唔受得住刺激
至於朋友，通常我都唔會忍瞞
接受唔到的話，都無謂做朋友啦，何必勉強
有同事好熱心要介紹男友我認識
其實我都打算去到最後一刻唯有講
「唔洗喇，有喇，多謝」
然後將其他detail 盡量模糊過去就算
至少，我覺得對自己另一半有個交待同尊重
將心比己，有乜野比對方既感覺更重要
如果呢樣野令對方產生不安感覺
需要時我寧願坦白少少
不過算啦~我明既~
有時d野就係睇天時地利人和
未係時候姐
暫時都係「只願縮到最小~彷彿不存在」先啦
又何韻詩
January 21,2007
好耐冇試過睇演唱會睇到爛聲
但睇何韻詩
你忍得住唔大叫嗎？
睇我隔離嗌大聲少少都會肺癆果位小姐就知
唔知點解一行入個場
已經自動想叫想跳
可能有信心何韻詩做part 2都唔係hea做
覺得一定會好睇
我相信鍾意何韻詩既人真係超鍾意佢的
燈都未熄d人就係咁嗌嗌嗌
d人係咪傻左？
雖然rundown同上次好似d衫冇咁靚
我好似仲投入過上次坐$400蚊位﹗
支pom pom stick 唔夠幾首歌就陣亡
今次為響應《你是八十年代》多了80年代金曲環節
初頭想話「下？仲80年代會唔會太out？」
點知揀歌果個人真係抵讚
o徒氣同熱咖啡超正﹗
金光閃閃既舞台效果同上次紅噹噹梅姐套衫一樣咁glam
仲估唔到佢會show腿添呢~
仲有就係行落個台再走返上台扮葉麗儀
最後仲要好開心咁話「終於可以o係紅館唱上海灘﹗」
有時覺得何韻詩都幾好笑
但始終唔明做乜唔唱《我找到了》，搞錯﹗
突然發現好多歌都係何韻詩自己作架喎
點解果d唱作人獎頒俾劉德華都唔俾何韻詩？真係吹漲
愈來愈鍾意何韻詩添~~~
又有是日金句摘錄：
艷：(拎住支柑桔檸檬) 喂，你係咪要冇汽呀？
欣：下？我有武器喇﹗ (然後o係袋拎螢光棒出來)
