本來以為踏入十一月就可以鬆一口氣，誰料之前申請的課程全部獲批 ，結果直至聖誕假前，我都要過著每週進修十二小時的生活，下半年的課程申請批准與否，尚未知道，但我知道今年上半年我已經可以達標了。之前本來想取消其中一個課程，但取消了又不知道將來甚麼時候才可以有機會再修讀，暫時來說，還覺得可以應付到，所以決定三科一齊讀。但這星期我們科被大老細「照肺」(只是因為中三TSA合格率不是百份之百(97%)，而且比去年少了一個人合格，…… )，涼茶更明指我們初中太寬鬆，否則沒理由低班及格而中三不及格(其實他之前也提過是顧客的態度問題，而不是能力問題) 。我知道我的上司一定會將壓力轉卸下來，她一定會要求全部初中的售貨員「做好些」、「做多一些」、要達到100%合格率……，加上我高中今年正式計算校本評核分，所以可以想像到未來的日子都很難熬(現在已經是每晚八點多才回家……)，看來我都要去買六合彩，看看能否早日脫離這種日子呢(但我怎樣才會記得去買和對六合彩呢？)

番左黎啦，食夠買夠，係時候要想下減肥既問題……

尋日運動會，我地社又贏左啦啦隊冠軍。我地社已經雄踞左啦啦隊冠軍超過十五年啦，一直無人贏到我地。但呢兩年，有一兩個社開始威脅到我地，所以我地更加小心，每次都全力以赴，不敢怠慢。今年其實都有d壓力，因為每年坐鎮看臺既老師請了日半假，看臺無老師跟，今年既低班學生又好曳，玩到癲晒，我見勢色唔對，即刻同幾個同事合力分工，由於我地都有職務在身，所以佢地三個輪流上看臺幫d幹事手，我就係下面用電話遙控。請假既老師只係番左第一日既上午，但就指示左d幹事點樣係第二日變招應敵，加上d幹事好落力咁帶班師弟，所以第二日既形勢大好，新既打氣板掛左出黎，金光閃閃，瑞氣千條，班啦啦隊亦都「脫胎換骨」，軍容大整，皇者之風重現。

第一日校長同兩個副校已經俾左分，但最關鍵係第二日家教會代表既給分。係家教會代表逐社給分時，我地社簡直轉左turbo自動波，班啦啦隊簡直判若兩人，將小宇宙發揮到極限，佢地一表演完，我就知道我地又掂左啦！

有同事話我地社霸左咁多年冠軍，唔使博咁盡，應該俾人贏下。佢地咁講對我地都好唔公平，我地每年無論對手係強係弱，我地都絕不欺場，一樣盡力。我地社係運動方面唔夠人好，啦啦隊既勝利成為我地社既驕傲，所以個冠軍對我地好重要。我地社員既歸屬感係六社之中最強既，我地每年都有社員自動組閣，從來唔使老師煩惱，師兄亦會幫師弟忙(上屆社長今年就一直都係看臺幫手)，我地每個老師會出錢出力，年終時慰勞社員(箇年成績好就叫慶功宴，成績差就叫慰勞宴)，我地一早同社員講左，如果佢地輸左，我地都會多謝佢地既付出，我地重視既係大家有無認真盡力，而唔係名次獎牌，我地亦都知道無可能永遠贏，但即使係輸，都要輸得體面，唔會不戰就認輸，我地唔會讓個冠軍出去，但真係輸左，我地會恭喜對手，然後一定會係下一屆再贏番黎。

我好高興自己社既同事都有相同理念，我地一向都好和洽，大家群策群力，完全唔會介意邊個著數蝕底，最可惜既係我地既其中一位好老師係暑假逝世，希望新接手既同事都會一樣咁支持就好啦！

尋晚同d朋友食飯，居然收到生日禮物，但係收到既唔係d乜，而係herbal life(康寶萊) 既減肥奶昔餐……，嗚……太過份啦！未食飯就叫我減肥，人地只不過係比肥左更肥左一d之嘛，使唔使出到代餐先？咁咪即是叫我無晒d人生樂趣？我跟住呢個星期仲要上雅居樂玩四日，已經plan定左到時要去灣仔食海鮮，澳門食自助餐，依家我究竟食唔食代餐好呢？

今日番工，原來有四個同事請左病假，此外淨係我間辦公室已經有三個帶病番工，睇落我間公司既衰氣好似未退晒咁bor……

p.s.今日仲係好唔掂，鼻塞打噴嚏，咳到飛起，成身好重，覺得自己好似擔完泥咁……

一放假就病，依家喉嚨腫左，不停咁咳嗽，鼻水不停，頻頻打噴嚏，頭痛，睇落又係感冒啦……

前晚用用下電腦，個mon突然黑晒，但主機仲郁緊，而且喇叭仲有聲出，我以為自己踢親d電線，搞完一輪都係唔掂。問左人，話可能係個mon壞，又可能係display card既問題。由於尋晚係一年一度做佈景板日，好夜先番到屋企，今日儸個mon俾人睇，原來係壞左火牛，結果只係用左$250就搞掂左。今次我本來以為要買新既mon，因為部腦已經用左五年，如果要換過部腦，我d仔依家個個要番工，仲邊有時間黎幫我搞機，而且我仲要俾種牙尾數、交稅，邊有錢換腦呢？今次$250就搞掂，真係好彩呢！