賴靜子說：

1. 生吞100粒安眠藥的年輕女子

對我那時懷了你但我沒勇氣也不敢去墮胎

在你六個月時我就試吞100粒安眠藥誰知動不了你的胎氣

然後我倒了肥皂水在樓梯讓自己滑下去

星期日，原本幫人買飛自己心諗唔蝕底都篤多一張所以買左

"No Direction Home" http://www.hkiff.org.hk/chi/events/06pops/pops07.html

馬田史高西斯拍卜戴倫的紀錄片。

睇戲前生怕睇完無節目都約定生日的傑仔（話會去游水）食飯。

同行的朋友入場前仲話全部都係講野同埋套戲好長所以如果你睇到悶就自己去附近行下街。事後發覺呢位朋友好要不得（簡直係以退為進之極點）。

開頭食左糖果，去左一次廁所，心裏記掛一件家事所以發左一個短訊（認識電話皇后的人先至明白呢句話）。觀後感如下：

1. 好好睇呀好好睇呀！

2. 以我音樂盲以我阿差都唔識以我乜差都無聽過都覺得好好睇呀！

3. 呢個Bob Dylon原來後生都幾靚，尤其是baby fat 散左之後瘦樣出晒都幾唔錯，雖然好似唔夠高但勝在瘦。咁既年紀（我再重伸我係好嚴重既音樂盲）把聲都好特別喎。

4. 人地六幾年出黎行就拍落咁多照片同片段得到你今日先玉成呢套紀錄片都有咁多料用不知幾威（我成日買片ｄ人同我講無相用所以得到我鄙視真係無錯）。入場前朋友話淨係講野完全係謊言兼流言兼人言可畏！

5. 片入面好多人物訪問，穿插著這些人年輕時的演出片段，我要認得呢個黑人爆炸頭肥婆係剛剛台上既60's拱頭圓面歌星黎都唔記得個名喇，但都係好好睇！

6. 人言可畏朋友睇睇下又問我知唔知鏡頭前呢個四眼阿伯係乜水佢話聽完Bob Dylon的歌喊了。睇睇下字幕話叫Alain Gainsbourg都係唔知乜水。散場後的解釋係已故名詩人。哦！　查實真無相干，因為真係好好睇。

7. 人言可畏睇睇下又話同Bob Dylon坐同一架車中人係阿導演馬田史高西斯御用既音樂人，因為阿史高西斯好得流行音樂，所以呢個人咁重要，我當然已經不復記得呢位人兄尊姓大名喇。

查實套片208分鐘長我都係去廁所時睇牌先知。睇完戲已經五點幾，致電傑仔當然未去游水，我推了同事去石澳游水BBQ都覺得好值得，除出事後尖東某茶餐廳的波蘿油好唔得呢個星期日都好在美好中渡過。

我一向喜歡用一段時間去總結和回顧自己做了甚麼，不是因為Jan-Mar, Apr-Jul是大公司工作的我的Quarter 1 和Quarter 2的關係，而是今年四月的電影節以來是一生人睇戲睇得最多的日子（大大話話原來睇左七十套）。所以四至八好特別，春夏之間，無無謂謂，無無聊聊，睇戲可無憂，睇戲可忘懷，睇戲可發夢（呀我最鍾意係發夢！）。

上星期，用左三日睇劇（愛情魔髮師）傾價錢講數簽約論交帶，史上最快史上話知你無劇播未死過咩唔發力你當我死架？！不過，如果我真係要做明道經理人我真係會請張叔平來做做。俾我就先剪過成個頭再削面骨！

如此這般，週末放工復又去左睇戲。

星期六，睇伊朗片”越位女球迷”。http://www.hkiff.org.hk/chi/events/06pops/pops06.html

朋友（好鍾意睇粵語殘片既）話呢種”好心地”的事現在已經很少在我們日常看的無論日本電影港產片中看到，很可惜。我自問做野做人都好惡死所以都暗暗伸了舌頭，呢幾年榮升了自己細妹的兒子的大姨媽查實都好惡地鬧過小朋友所以都萬劫不復了。廿年前做著第二份正職的工作是就見過一些很惡的同事自稱惡人谷，這幾天忽然想起他們，不知是否還那麼惡和是否看看伊朗片和好心地片會有用？

因為工作的關係時常要看電視劇。有時看得很辛苦。

都是亞洲的電視劇，沒有看過很多但是決定自己銳意喜歡的就是解拆那作品為何可以受歡迎的原因。

在家的時間都是夜裏在床上看的。那14”的電視機是10年前買的。人生第一次褒碟也由那時起。當時的家在麥當奴道，層數又高，窗台可以令人入迷和失神。那些年月，是人生中唯一一份工作時間固定的歲月，下班後的精力過盛，都沉醉在虛耗青春和令人失神的活動上了。

海豚灣之戀覺得是自己慧眼看了 10 分鐘片花就覺得台灣青春劇的可能性可以在自己的平台試試的新品種。

MVP情人，買的是動感加偶像。

鬥魚是郭品超的招徠。

中國式離婚看兩次是為見陳道明作的準備，結果很成功，我問他假如他是宋建平他會如何，他說假如我是宋建平我會更早離婚！

金三順你出得好，所有中女都鍾意！

A Love to Kill 原本並不喜歡阿 Rain 的我都看喜歡了，決定買下來。

昨夜頭痛著去大會堂看加拿大電影（赤裸真相），冷氣凍得要死，旁邊的男人還自己同自己講話，我頭痛著回家，頭痛著睡去，頭痛著醒來。

夢見自己離職，還混雜搬Office一起發生，似是健康院似是教員室的室內都是人和東西，這應該是我的 last day，所以這之後我和這公司不拖不欠，所有多年來跟我有關的人和事都不再聯上關係。

離職這事還有一條”尾巴”，就是不明所以地我得到一個去美國西岸的旅程，我驟眼一看是乘中華的班機，心想這趟一定得轉機了，必然是一個累極的行程。

離開了公司，我忽然發覺我要”澗水”才能離開這地方，我以為自己乘在船上，卻原來我是踏在水上，水深在我小腿位置，我的身後才有仿似是船的物體隨我而推進。我發覺自己穩定前進，滑水而行，還好像看到水中的游魚，好有”生機”。前面有水有其他浮標有遠處的橋和其他東西，我繼續看到水中有跳動的魚。我身邊不遠處有一個我認識的人，也是跟著我前進，但我仿佛看見他在踏步而並非像我一般滑行著，我看著，卻不感如他一樣舉起腳踏步，生怕站不穩。

它的名字叫點點，它住在南京，今早我發夢他的主人的表弟（應該也身在南京）告訴我他做得很辛苦，人也瘦了很多，但他好像並不認得我是誰。夢的後半部我留在同一個室內，同著一家我也並不認識的人食著飯。晚上九時，那個男主人和他的家人就進房間並不再理我們了。

一年零三個月前的外蒙古，甚麼時候我可以再度遠去？

1994年開始電那種那捲很長的髮型。第一次還用上8+小時。

2002年是上一次了，這些年都好像因為電了髮而長年都不再梳頭了。上一次那把已然長了的電了的頭髮失落得好傷心，卻沒法把這件事告訴相關人事而就此讓它成為記憶的一部份。星期六約了髮型師不為電髮，告訴他只是要染髮的，當他會錯意而拿起較剪時我就罵起他來，結果找來時髦的technician商量好就傖促地決定要電髮了。就這樣，一把不太長的頭髮又被電了起來。