有人話我個ｈｏｍｐｙ已經變左旅行日誌，冇晒Ｄ寫日常生活既文章．．．咁人地真係除左飛就冇乜野做過丫嘛．．．一係寫我今年既遊船河次數啦！

呵呵！我今年已經遊左３次船河啦．．．完全上左癮，邊個有得遊船河記得問下我去唔去呀！！

第一次：

第二次：

第三次：

講完．．．．其實我而家o係檳城既酒店．．．半夜三更訓唔著．．．因為好興奮呀，我後日就會去浮羅交怡陽光與海灘呀！！！

雖然之前已經飛過悉尼，但係今次所有ｃｒｅｗ都好好人，好好玩，好到連亞姐，甚至Ｃａｐｔａｉｎ都紆尊降貴，可以同我地打成一片呢～

第一晚，八點幾落機，同另外５個同事出去食飯，食飽飽行緊返酒店既時候，Ｃａｐｔａｉｎ提議去飲野，初初以為會去酒吧飲，不過又有人提議不如買酒返去酒店房飲啦．．．

跟住就買左２枝紅酒，１枝Ｊａｃｋ　Ｄａｎｉｅｌ，１枝Ｂａｉｌｅｙｓ，同埋半打啤酒去左Ｃａｐｔａｉｎ間房飲．．．o係玩樂途中，仲嘈到俾人投訴．．．我o係我班酒肉朋友入面，通常都係做輸o個個，不過同佢地玩，我就變左最勁o個個，呵呵呵，勁有滿足感．．．結果，玩到凌晨４點，直至所有酒都飲晒，大家先肯返房訓覺～

到左第二朝，就約埋一齊去Ｆｉｓｈ　Ｍａｒｋｅｔ食早餐．．．ｗｈａｔ　ａ　ｈｅａｖｙ　ｂｒｅａｋｆａｓｔ？！

不過食完之後返酒店，我就開始發燒ｌｕ～原本諗住一個人上Ｂｌｕｅ　Ｍｏｕｎｔａｉｎ行下，影下相．．．不過o個邊而家係冬天，我又發燒，一陣死左都冇人知，所以就留左o係酒店休息，夜晚出去食左一個ｐａｎｃａｋｅ～

雖然今次冇乜特別地方去過，不過同事們真係好好呢，簡直係一個完美既組合呀！

上次去完巴黎囂張完一輪，俾比佬咀咒我之後，果然．．．

去印度班機，連０．１分既浪漫都冇．．．

先係５日ｐａｔｔｅｒｎ但係有６次升降，由香港去曼谷再去孟買，休息一晚，第二日飛一飛去杜拜再返孟買，再抖兩日再返香港．．．．

今次唔再講印度機有幾辛苦，總之就做到想喊啦！今次講留o係印度既事．．．

o個邊而家係雨季，成日都水浸，ｄ印度人又污糟喎，行行下街如果一急尿就拎轉身除褲向住個牆痾，當街當行都係咁！又周街都係牛屎羊屎狗屎喎，咁一水浸，ｄ屎屎尿尿就會浮起晒！我著住對拖鞋，唯有夾實晒ｄ腳趾黎行，好驚ｄ腳趾會唔覺意“跌”左落地！！

不過，有同事帶我去一間餐廳食晚飯．．．嘩～！仲好食過重慶大廈o個ｄ　５０倍呀！

講完印度，講法蘭克福！

第一日去左有舊城堡既海德堡，雖然冇乜特別野做，不過都幾靚

夜晚就同同事們一齊出去食飯，飲啤酒

第二日，同Ａ小姐o係萊茵河邊踩左５個鐘頭單車（呵，浪漫始終要返黎我身邊）

不過踩完５個鐘，到第二個個蘿柚有Ｄ痛呀 >.<

８月Ｒｏｓｔｅｒ：

８月個ｒｏｓｔｅｒ，爛到不能再爛．．．．．

３－６／８　－－＞　悉尼

８／８　－－＞　吉隆坡

１０－１３／８　－－＞　檳城（原來好近浮羅交怡架，咁都好ｄ）

１６－２０／８　－－＞　紐約

２４／８　－－＞　台北

２６－２９／８　－－＞　曼谷＋卡拉其（大家知唔知卡拉其即係邊度？即係巴基斯坦．．．完全覺得公司o係度挑戰緊我既底線，睇下我幾時會ｐｏｒｔ　ｓｉｃｋ．．．不如下次俾我去盧旺達啦！）

巴黎好似係個個女仔都好想去既地方，因為好似好浪漫．．．

但係我由細到大最想去既地方好似唔包括法國在內，我最想去希臘，埃及同埋西藏（不過全部都冇郭太直航機去到）

講返巴黎，我原本都以為真係好浪漫，一行落飛機條樓梯就見到好鬼大條彩虹，心諗一定係好既開始啦！

但係一返到酒店，我個夢就開始幻滅啦，因為巴黎間酒店最出名既就係ｄ　ｃｌｅａｎｅｒ會入黎偷野，就算你掛左個“Ｄｏ　ｎｏｔ　ｄｉｓｔｕｒｂ”出門口，佢地都會試下開下度門睇下係咪真係有人o係度，我一入到房就要搬晒ｄ茶几呀，櫈呀去頂實度門（淨係呢個舉動都已經一ｄ都唔浪漫），因為我一個人一間房，好驚架嘛，所以我沖涼唔會閂廁所門，萬一我沖沖下涼有人開門入黎咁點算？

第一日日頭，去左著名既名店商場都行街街

成個巴黎唯一一個浪費既地方就係呢個特別版既巴黎鐵塔，本身夜晚係黃色燈既，但係唔知點解呢排變左藍色燈，仲要識閃既添，美得要死

不過巴黎夜晚治安好差架，當我同另外一個女同事睇完鐵塔準備回程既時候，就目睹一個女仔當街被一群黑人欺凌，嚇到我地兩個ｔｕｒｂｏ腳咁走，我o個晚仲發惡夢俾人追打添呀（浪漫又再一次被催毀）

第二日去到以前皇帝既皇宮－凡爾賽宮

留意下面第一張相，o係佢地個後花園，大到就算如果你想用一條最短既直線行出出口，都要三個鐘（我諗，哈哈哈）

其中一個浪漫既事情係距離我地集合既時間個有一個鐘有多，我同一個同事就去左個花園個湖度划艇，浪漫得要死

仲有去左達文西密碼．．．個門口

（我o係呢度跌左我個戰利品－ｍｉｕ　ｍｉｕ銀包落我身後面個水池，所以我呢張相係面有難色）

夜晚就去左食好野同埋去凱旋門影相，看似浪漫，但係我地要企o係一條汽車稀來嚷往既大馬路上面影，仲有路過既死剷司機不斷刻意地嚇我地．．．真係一ｄ都唔浪漫！！！

與其話法國係一個浪漫之都，倒不如話佢係一個靚仔之都，因為真係好多靚仔，成街都係，就算o係酒店隔離間老麥賣包既都靚仔到令我暈得一陣陣呢～～

林大小姐，你睇下呢個法國買既布丁幾時過期？！

４－８／７　香港　－＞　巴黎（嘩～！好感動呀！）

１２／７　香港　－＞　曼谷　－＞　孟買

１３／７　孟買　－＞　杜拜　－＞　孟買

１６／７　孟買　－＞　香港（嘩～！呢幾日真係搞死人！一啖沙糖一啖屎．．．）

１９－２０／７　東京

２１／７　曼谷

２３－２７／７　法蘭克福（十萬個期待同Ａ小姐２５號一齊遊德國）

３１／７　台北

都唔知點解我每次離開香港，香港都係落雨．．．唔通個天真係咁鍾意我？

今次去左溫哥華．．．終於都有一個地方係冇朋友架啦．．．（其實有，不過完全唔熟），而家加拿大又係一個出左名悶既地方，都唔知點死！

第一日，同ｄ同事出左去，去左一條好牙煙既吊橋，有畏高既我，都幾驚，因為只要有個肥少少既人o係你側邊行過，條橋都會ｆｉｎｇ下ｆｉｎｇ下，嚇死人咩！

之後o個日，就自己一個人出左去，去左水族館（因為發現自己唔係咁鍾意同事Ａ）

下面呢條鯨魚叫Ｂｅｌｕｇａ，唔知好似（記住係好似）係加拿大特有既，成條白色，好得意，仲ａｒｍ　ａｒｍ幾日前生左個ＢＢ

原來自己一個人出去都有一個人既好處，我實在係太鐘意動物，鍾意o個隻野會去睇完又睇，如果有人同我一齊就唔可以咁做ｌｕ！！

本身諗住一個人ｊｏｉｎ　ｔｏｕｒ出海去睇鯨魚架，即係好似拍戲咁，１２個人坐住隻船出海，睇野生鯨魚，Ｄ鯨魚成條跳出水面再躂返落水，十萬個壯觀！不過一個人去，實在好似係有ｄ危險，同埋太貴啦，最平o個個ｔｏｕｒ都要１２０蚊加幣呀！不過我下次一定一定會出睇！

嘩～！呢班機真係黑到呢～～

去墨爾本既時候，飛左１２、３個鐘，好攰，不過就黎到既時候，Ｃａｐｔａｉｎ話墨爾本好大霧，成個機場ｃｌｏｓｅ左，要ｄｉｖｅｒｔ去阿德萊德．．．．．飛去阿德萊德要個幾鐘，又留左o係阿德萊德兩個鐘，飛返去墨爾本又個幾鐘，即係ｄｅｌａｙ左４個鐘，眼訓到差Ｄ暈低．．．

返黎香港既時候，諗住就黎返到屋企，好開心啦！正當我好開心緊既時候，阿Ｃａｐｔａｉｎ又話香港而家黑色暴雨緊，降落好危險，可能又要ｄｉｖｅｒｔ去第二度．．．

唔係嘛？又黎？好彩都安全降落到，不過冇巴士搭，咁就搭機鐵去中環諗住轉的士，點知的士站有個保安o係度話佢８點到而家都未見過一架的士（o個時係１０點），咁試下行去睇下有冇小巴啦．．．有呀，快ｄ行啦！！

o個兩個ｇｉｐ，好鬼死重，好彩有壯男幫我拎落樓梯，如果唔係我都唔知點踢個ｇｉｐ落去．．．行到去小巴站，個司機行左落車，佢話薄扶林水浸，香港仔隧道又封左．．．．下？我得呢兩條路返屋企咋喎，咁點呢？喊住口打俾媽咪，問點算．．．佢叫我坐低食個早餐先啦．．．企左一陣，有司機肯開車，叫１６個人上車，不過我拎住兩個咁死重既ｇｉｐ，我話我唔夠力拎上車，個阿伯司機就話：咁冇計啦，我係唔會幫你拎架！

嗚嘩～！跟住我就著住套制服，企左o係小巴站嚎哭，有個女司機走埋黎問我做咩喊呀，我話我好攰呀，好想返屋企呀．．．跟住就有個後生Ｄ既司機好英咁行埋黎話：我幫你拎，１６個上少一個！！嘩～！都未見過Ｄ咁型既小巴司機架！（不過我話俾媽咪知我點樣先上到車，佢笑到反艇，仲話：我都估到你喊就會上到車架啦）

o個架小巴平時返屋企只需１５分鐘，但係o個日用左兩個幾鐘！我訓醒幾次都仲o係上環．．．．．．雖然咁黑仔，不過好彩我又有朋友o係墨爾本，仲玩得好開心呢，第一日去左一個叫Ｐｈｉｌｉｐ　Ｉｓｌａｎｄ既地方睇淨係澳洲先有既皇帝企鵝，好細隻，成堆咁o係個海灘度衝上黎返屋企，好鬼死可愛！

第二日就去左動物員睇一路行一路痾屎既長頸鹿，有毛既豬（袋熊），會錫錫既獅子．．．．

我真係好彩．．．連去到咁冷門既荷蘭都有朋友帶我去玩

我好鍾意鬱金香架，諗住可以o係荷蘭會見到好多一大片一大片既鬱金香田啦．．．點知原來五月十幾號已經完滿結束左鬱金香既季節．．．．．．．．．．即係我一朵都見唔到

不過原來我間酒店唔o係阿姆斯特丹，而係海牙，一個距離阿姆斯特丹個半鐘車程既地方，跟住我就一個人搭電車再轉火車咁去搵我個朋友，不過有ｄｄ驚呀，因為之前次次都係我ｄ朋友去酒店接我，今次係第一次自己走出去搭車，不過又幾好玩喎

去完荷蘭，好想移民去荷蘭，因為ｄ屋好平啦，好靚啦，個座Ｈｏｕｓｅ都只不過大約３００萬港幣．．．另外空氣又好啦，生活又悠閒啦，ｄ人又好啦．．．如果你企定o係度睇地圖，一定會有人走埋黎幫你．．．

不過，o個度ｄ動物好鬼死惡架．．．o係短短兩日入面，我就分別俾一隻貓同埋一隻本身應該好優美既天鵝兇過．．．

結果今日好似俾人打完一身咁，散晒，周身骨痛