嘩！好耐都無post過日本嘅天氣喇！即將喺復活節去大阪嘅我當然要為自己準備吓啦！又係呢個未出發先興奮嘅心情……

依家嘅大阪唔算凍，時晴時陰，不過唔緊要……唔好落雨就得喇，話晒去旅行都唔想攞住把傘吖嘛！而且仲要影相睇櫻花呢……雖然新聞話本洲嘅櫻花喺上個星期已經盛開，但係仍有金澤補上，“桜。。。待ってくださいね。。。”

例行公事，玩完返嚟會post吓相同寫吓玩後感，今次呢個旅程係我寒窗苦讀之後嘅“日本の旅行”，希望咩~咩~同咩~啦！

最近真係好攰，喺十二月頭要應付日語能力考試，之後嗰個星期又有校內測驗，連續溫書溫咗兩個星期，無論返工定放工途中，一有時間就揸住啲筆記睇…睇…睇……過咗年之後，公司轉用咗一個新嘅system，我要負責將佢搞掂，所以呢排每個星期六都要返工！

喺天氣凍嘅時候去行山真係好舒服，唔駛行到汗流浹背。啱啱嗰個星期六，行港島徑，喺天色開始黑嘅時候，就見到一個又大又圓嘅月亮，心諗，原來除咗日本之外，香港都有啲好嘅景架！

我一向都係帶媽咪整嘅飯盒返公司做午餐，但係有時帶得多都會悶，所以有時都會同同事出去食，一來可以抖吓氣，二來可以振興吓香港嘅經濟！哈！

喺阿蘇介紹過嘅食肆當中，我覺得最有風味、最平民化嘅，莫過於位於結志街嘅「蘭芳園」，我最欣賞係佢嘅架央西多士同咸檸七，其實早前已經幫襯過幾次架喇，最近帶咗喺加拿大嘅親戚同事同去幫襯，佢哋都好欣賞。

上個月我睇咗壹週刊嘅「坦白講」，題目係「好彩你個頭」，內容係講「蘭芳園」喺九月被選為「咩咩蓮」餐廳，但係阿林老闆聽到「咩咩蓮」嘅人同佢講﹕「你哋好好彩入選了。」林老闆就火都嚟咁講﹕「你話我好彩，好彩你個頭、快快給我滾。」又係嘅，呢個大排檔大大話話都開咗五十幾年，經過咁多風浪，依然咁好生意，仲被喻為明星茶檔，梗係有佢嘅實力嘅！

不過，我都覺得林老闆真係「好彩」架！因為佢有佢老婆幫佢縫製啲絲襪奶茶袋，又有後人幫佢承繼生意，令佢嘅自創嘅港式絲襪奶茶唔會失傳，咁我哋先可以長飲長有嘛！

之但係……都唔可以亂話人「好彩」嘅！

最近大台挖角，好似話用成千萬邀請蘇絲黃做飲食節目，今次真係細台開晒路比大台乘勝追擊喇！

細台嗰陣我都有睇，頭嗰年阿蘇教觀眾一個鐘個內煮三個餸，所以個節目名叫「一粒鐘真人蘇」，後嚟阿蘇病發，停咗一輪，再做第二輯，佢就帶觀眾周圍食好嘢，除咗香港之外，亦有去泰國同馬來西亞；阿蘇強調每次帶觀眾嘅眼睛去食嘅每一間餐廳，都係耗盡佢呢幾十年嘅飲食經驗嚟介紹，並唔係求求其其咁介紹嘅；喺第二輯有一個環節叫「踩場」，各餐廳認為自己嘅食物可以上得大枱嘅，阿蘇就會「踩場」，通常都係失敗收場，比阿蘇嘅銳利詞鋒鬧到狗血淋頭，當時嘅場面令啲餐廳負責人相當尷尬，對於觀眾嚟講就得晱笑！

有一樣嘢仲好笑嘅就係阿蘇最討厭啲人用「口感」呢個詞語嚟形容啲食物，佢話食物可以用甜、酸、苦、辣、鹹、軟、硬等等詞語嚟形容，「口感」即係咩呀﹖又好似有啲道理喎！

其實阿蘇除咗飲食經驗多之外，佢嘅人生經驗亦相當豐富，除咗介紹食物之外，亦會講一啲人生道理，聽唔聽得入耳就視乎個人嘅接受程度喇！另外，貴或平嘅餐廳、香港嘅行山徑同埋一啲香港獨有產品都會介紹，例如鄒健平安膏等……我自己都有根據佢介紹嚟試，真係一個唔錯嘅選擇！

如果有興趣想試吓，可以去以下網址﹕

http://www.cabletv.com.hk/so_new/so_new.htm

至於今次大台做呢個節目，內容係將細台嘅第一、二輯加埋一齊，即係有教煮嘢食，亦有帶觀眾周圍食好嘢；由於主持同創作都係出自阿蘇，所以感覺親切，睇落有似曾相識嘅感覺！

我藉住呢篇文章嚟回應阿「誰々」嘅一篇hompy！

首先我好多謝你用一個post嚟寫關於你對我嘅感受，我睇咗之後嘅反應係–「十分感動」！就如你所講……我哋相處嘅時間話長唔長話短唔短，都有四年。

喺呢段日子，我哋經歷咗好多嘢，由開始我話比你知啲工作點做，到後尾大家係商量啲工作點處理，變得好有默契。當我好忙嘅時候，你義不容辭咁幫我、喺我唔開心嘅時候，你又會安慰我、每次我哋受到一啲無理嘅對待嗰時，又會一齊訴苦、可能喺我哋年紀相約，遇到嘅嘢又差唔多，所以大家好啱傾，感情亦好好；老實講我今次嘅選擇，都忐忑咗好耐，唔捨得嘅當然係你哋一班同事，同埋我建立咗五年嘅工作範式。仲記得……我啱啱入呢間公司嗰時，同上一手交接得唔好，喺嗰時見嘢就做，搞到晚晚都八、九點先放工，諗返起嗰陣簡直人都癲，後來終於順利返，其實靚媽媽應記一功，無佢嘅幫手，我更加嗱手唔成世！

我哋大多數嘅時間都相處得相當愉快，但係當中都有啲事情發生咗，令到我哋有啲爭咬，但係我哋每次好快無事，而感情就有增無減添，其實你嘅脾氣一向都好好，EQ亦好高，係每次都比我激死你喳嘛！再講我都喺你身上都學到嘢架！

有一樣嘢你講得好啱嘅就係﹕我無帶走你依家面對緊嘅「問題」，無辦法啦，呢間話晒都係法國公司，階級觀念極重，只要阿公或者阿爺講一聲，你老闆想反抗都難！唯一可以做嘅就係「聽旨」，希望你唔好做得太辛苦啦！

喺呢幾年，我目睹你一段又一段嘅……哎呀！講唔講得呢……喺呢到祝你同你愛人永遠開心、永遠幸福！

某日突然醒覺……係喎我好耐都無嚟hompy喇喎！就連人哋嗰啲hompy都無睇過。

既然係咁，我今日就的起心機寫返hompy，同埋回應返人哋個hompy啦！

我依家照常每日返工放工，亦有繼續學日文，同樣地都係要面對一啲新嘅環境、新嘅挑戰！工作方面比以前處理更多嘢，責任大咗，但係數量就較以前少咗，所以每日都可以準時收工。

至於日文方面，今次嘅老師都係一位日本人，但係佢上堂嗰時就完全唔會講廣東話，就連解釋啲新學嘅詞彙都用日文解釋，仲叫我哋要用日文傾計，所以上完堂之後，個頭好似塞實晒咁！自從上次考完試之後，我都無乜再無溫書喇！到目前為止上咗兩堂，仲記得我係兩袖清風咁去上第一堂嘅，無溫過書，無備過課，個個同學都O晒咀咁上堂，到咗第二堂，我就係咁咦揭吓本書，都算有啲用嘅，阿sir問問題都識答，而且下次上堂已經要交功課喇，所以今個星期真係唔懶得，要認真做功課同溫書！

依家最想最想最想做嘅嘢依然都係嗰樣–去旅行！因為今年完全無去過旅行，只係去過盤龍峽，啲人話嘅﹕「無搭飛機點算去過旅行喎！」但係去旅行真係要配合天時、地理……但係距離年尾只係剩返兩個多月喳，真係要認真諗吓先得！

有學過日文嘅同學都知道今次嘅主題係一系列嘅課本名稱。

我已經讀到第二本喇，之後會向第三、第四本……進發！其實我哋香港人讀日文係比較著數，至少比起完全唔識中文字嘅外國人嚟講已經記少好多嘢啦，話雖如此，佢哋學法文同德文咪又係著數過我哋！從另外一個角度睇，香港人讀日文亦有弊處，因為日文嘅漢字同中文字係有一點點嘅分別，一個唔小心，就成個字錯架喇！

每學一種語言，最初都係由字母開始學先，然後係一啲簡單嘅日常用語句子、簡單嘅詞語同單字、接著就係動詞、助詞等等……日文同英文一樣有過去式、現在式同將來式，我依家正在學緊將動詞轉form，總共有五變，依家學緊第三變，但係已經有點混亂喇！﹖

今次呢個課程係由一位日藉老師任教，佢同一般嘅日本人一樣都好有禮貌，每晚上堂前都主動同我哋打招呼，落堂嘅時侯亦同每一位同學講再見﹔老師為人好風趣又幽默，經常笑面迎人，令我哋上堂嘅時候一啲都唔覺得悶﹔慶幸嘅係佢識講廣東話，所以溝通大致上都無問題﹔佢又唔會嫌我哋煩，我哋班有一個問題“少”年，佢真係每事問架，但係經嗰個同學竭而不捨咁問，我哋又獲益良多喎！

喺呢度上堂真係唔懶得，皆因我哋每學三課就測驗一次，課程中間有一個大測，再加一個“自我發表”嘅演講，真係密集式嘅訓練呀！依家距離末期考試仲有一個月左右，如無意外咁升到班，再會報中級班，到時唔知會唔會係同一個老師呢﹖

除咗上堂之外，就好少接觸到日文，我雖然會睇日劇去領悟一吓，亦都會上網自學嘅，亂打亂撞之下，我搵到一個網址，解釋得好詳細，亦可以聽埋讀音，絕對係好有用嘅一個網頁。

http://www.geocities.com/languageweb/

呢個網頁除咗有日文之外，仲有其他語言供學習架，有興趣嘅就上去睇睇啦！

原來已經有一段日子無嚟過呢度喇！都係因為太忙，再加上懶……所以就無同大家見面，真係唔係幾好意思喇！

如果你喺呢幾個月發現我個hompy得返兩篇文章，唔駛擔心……﹔其實亦有好位個朋友都有問我﹕「你個hompy係咪有問題﹖」就等我藉住今次嘅機會同大家解釋吓啦！我個hompy無事，只不過我有個mission要做，hompy暫時不能對外開放，心水清嘅人應該知道點解，又或者認識我嘅人遲早亦都知道原因，請大家再耐心等待一吓啦！

講返正題，本人除咗工作忙碌之外，功課亦如是，我喺今年春天再次學我最喜愛嘅日本語，我同自己講今次絕對要認認真真咁讀，年尾一定要考埋個公開嘅語言能力試，所以我呢幾個月，一有時間就做功課同溫書！今次呢個course為期四個半月，一星期兩堂，就連公眾假期都要返，都chur得幾行！

記得開學嗰陣個班房係「完院滿座」嘅，經過呢幾個月嘅「測驗洗禮」，依家各位都座得相當鬆動。老實講，淨返落嚟嗰啲同學都係有心學好日本語嘅……相信！距離個course完結嘅日子唔夠一個月，大家一齊努力呀！