詩君＠農夫

從小就很喜歡Sandy這位前輩，喜歡她的歌聲，清脆得不帶一點俗氣，聽她近年的作品，讓人平靜得出奇，也許是一位唱了20年的女歌手為我們帶來有點看化的人生。這時候，Sandy已經是女人40了，但她的歌聲依然動人、讓人遐想。

碟首是〈一個人〉，以輕快的曲風展示新的林憶蓮，由Mark Lui打造Sandy全新的心路歷程，歌詞再簡單易明不過「我不是不夠愛你，只是偶爾想一個人」，只是不知Sandy這首歌是為誰而唱，背後又是一個怎樣的故事。

有著中國古典音樂包裝的〈面對面〉，帶著點點的R&B感覺，讓唱功如此深厚的Sandy娓娓唱來，特別觸動人心，所有音準都拿捏得很好，每唱到深處就讓人感慨一番，心中只能吐出一個「正」字。

到了〈日子〉，真正的感性的林憶蓮才算重新回歸了。曲詞編都由曲世聰先生全權負責，展示了前輩的功力。但樂器音色的tuning有點old school，讓人以為又回到了九十年代初，但詞實在寫得好，「再過一個夜晚，捎帶幾句誓言，隨著烟走遠」，悄悄帶過結了又分的無奈，由親身經歷過的人唱來，顯得憶蓮更感性。

娃娃填詞的〈南方的風〉繼續把我們拉回舊日的林憶蓮時代。這是專輯中最富意境的一首歌，「列車就要開，奔向南方的風，一站一站的過」，聽著彷彿看得到那歌詞。

這張〈呼吸〉雖好，但卻不及上一張大碟<本色>，更遑論與從前的作品相提並論。但作為樂迷的，只要Sandy繼續推出唱片，我們能繼續聽到她的歌聲就好，像是一種心靈治療；像是軟硬，有人謂他們的新碟不甚了了，但身為Fans的，只要再看到他們站在一起就好了，而且這樣的Fans為數可不少。聽罷Sandy的新碟，又再讓我想起王菲，仔你可以照生呀，得閒咪再俾D 0野我地聽下囉。

推介：面對面、日子、詞不達意、南方的風、放開手、要不要、呼吸

===============================

睇完記住去埋農夫fama個hompy

重遇陳奕迅的首張大碟，你有無一隻0係CD櫃床下底??

Karvitz's DayS blog link

text:陸寶

Forever Grasshopper草蜢06演唱會又開鑼，本人上年有睇Part 1，食過番尋味，再買飛睇埋part 2，仲要專登買山頂位，睇下三位猛人有幾猛，睇下可唔可以令到成個山頂都企滿人，再繼續樂壇奇蹟。

香港人可能平時日做夜做，好大壓力；你有壓力，我有壓力，係時候舒發晒出0黎。我就坐0係尾二果行，演唱會仲未開，我頭頂後面D西裝友已經忍唔住，大力係我個天靈蓋上猛拍打bong bong 棒，係咁bong bong bong， bong到我頭都暈，仲驚我唔夠精神，就越拍越低，得閒就靜雞雞濕我一兩下，搞到我差D起身叫佢「唔好正面挑釁我」。不過佢好彩，個演唱會啱啱開波，我都費事理佢，佢就拍多兩位歌已經無晒力，謝左。我之前都見過類似情況，果次睇林憶蓮演唱會，有D傻炳未開波就high到飛起，不停係山上大嗌「憶蓮憶蓮憶蓮」，結果半個鐘頭後，憶蓮唱慢歌果陣佢就做已經做0左睡寶寶，差D好訓過屋企張席夢思，睇0黎都係志有發洩多過睇演唱會。

我雖然坐得遠，但係可以俯瞰到其他「粉絲」0既行為，見到400蚊位置有一排粉絲，為0左支持草蜢，就高舉「草蜢」光猛燈牌多張。佢地就真係睇得開心囉，難為坐佢地前面果幾位苦主，大拿拿科四舊水出0黎睇演唱會，成晚就好似逃犯咁被人照住個背隻，我遠睇就好係一部大型0既照錢紙機，前面條友件衫有暗花都照到出黎，後面d苦主就仲慘，粉絲0下0下企起身睇，除非佢地有姚明咁高，唔係0既話企成晚睇真係幾攰。幾時紅館可以有企位區比D轟烈0既粉絲放縱下呢？

那邊廂有人珍惜眼前人，同偶像跳到周身汗，那邊廂就有人鐘意睇住個小小screen慢慢歎。唔係睇紅館頂果個螢幕，果四個比鬼睇0既，唔係比觀眾睇，觀眾想睇都睇唔到。果位仁兄就以身示法，非法盜錄，仲要企起身拍，左手跟拍子擺動，右手就高舉手機，但係佢坐0係一佰蚊位，影0黎都無謂啦施主，唔好再將D影到唔清唔楚0既片放上youtube啦，一d都唔環保。

唔知係唔係受到一個月前0既軟硬演唱會影響，草蜢都黎話當年，講下草蜢0既由來，話要為新0既歌迷娓娓道來佢地既歷史，但其實佢地又講得一般啦，可能之前有睇軟硬，睇咩都比下去。佢地之後又大放笑彈，阿細自稱一身藍色羽毛裝係「藍毛阿彌陀鵰」，但係其實都唔係咁好笑，仲令人覺得講0野多得濟，同埋今次Part 2少0左快歌，慢歌多左，整體感覺都係Part 1爆D。

勁歌熱舞先係草蜢0既強項，講野就唔係佢地0既專長，每次佢地其中一個講0左一段說話0既時候，最尾果句為0左加強氣氛，都會360度自轉望住四邊觀眾放聲大叫多謝觀眾，令我聯想到以前大笪地街頭賣藝咁款，只係差0左個銅鑼啫。

相信袁sir睇完會有d野講.......80年代樂隊潮之中，最cult 0既樂隊，非「皇妃」莫屬。佢地0既音樂內容以性及愛情為主，完全無理當時香港社會風氣，亦都無理自己形象，到而家都未有咁有guts 0既樂隊呀。

音樂雜誌 blog link

Text：袁智聰

廣告這回事，總少不免會涉及誇大成份。「唔誇就唔係廣告啦！」曾聽過有人如此說。

去年，有一個音樂手機的電視廣告是這樣的：父母夜歸，在屋企樓下看到家中正在「開P」；打開大門，傳來如雷貫耳的勁歌音量，跳得起勁的兒子與朋友們並沒發覺爸爸媽媽已踏入家門；父親一怒之下關掉了音響組合，但強勁音樂仍在，原來兒子用來「炸機」開Party的，是一台手機。

在這個「機歌合一」(手機與聽歌合一)的時代，這廣告的訊息非常明顯：音樂手機，已成為年輕人聽音樂的工具，甚至可以取代傳統的音響器材── 又或者，有人會相信一台音樂手機真的可以用來「炸機」，其音色真的那麼厲害。

手機與MP3隨身聽結合，其音質大抵已達到相當的水平──當你是用Earphone作隨身聽的話。問題是，我從不相信手機上那「粒」喇叭仔有幾好聲，尤其當你調高音量播放時，出來的只是一堆炒耳的聲浪，拆聲程度仲衰過伯父大叔們用來聽賽馬的收音機仔。

我不是甚麼音響發燒友，但聽音樂總會對音響有一定的要求，至起碼是要聽到音樂的層次感，而非只有炒埋一碟的聲浪。

倘若閣下能滿足於用手機果粒喇叭仔來聽歌，相信你是一名不折不扣的「K歌」世代樂迷，聽歌只聽主唱便行，背後有甚麼編曲配樂已毫不關心。那可稱之為「機歌」世代嗎？

在交通工具車廂內用音樂手機來「炸機」，絕對可以躋身當今10大城市噪音之列，令人火滾。

不遑多讓，是以「炸機」音量響起的歌曲MP3手機鈴聲。用MP3鈴聲不是問題，但要不要響到咁大聲呀。而且這些歌曲MP3鈴聲話嚟就嚟，一入便是Chorus。當你在車廂內閱讀或小睡時，身邊忽然傳來「炸機」式歌曲鈴聲，被嚇一跳之餘也總會令人懊惱，那一刻你好想打人。

而且通常那些朋友們都會響番幾廿秒才肯接電話，彷彿要Show-off他正在用緊甚麼大熱新歌MP3，莫非想做「機歌」之王？

友人問：「佢哋唔會覺得自己有問題嗎？」我想不會喇，反而他們會認為：「我不知幾咁愛音樂呀！」──係囉，啲廣告都係咁講。

詩君＠農夫

認識Dear Jane的Jackal差不多六、七年了，從前我們一起夾band、一起參加比賽，jam過不少歌，當年我們不明白為甚麼天生一副”幅射相”的Jackal會如此受女性歡迎，到得後來才知道他熱愛音樂的精神引起了很多人的共鳴。

因此我想，他選擇的新樂隊成員應該也是很音樂的狂熱份子，所以對於Dear Jane的音樂，我可是抱有不少期望。

終於等到他們的首張大碟《100》，一看封底，11隻歌8個MV，抵到爛。

習慣性地先看DVD，〈男兒當打交〉拍得很精彩，最後的那句to be continue不知有甚麼意思，蠻吊詭的。之後的〈放大假〉算是新派台歌，很傳統的pop punk曲式，旋律搶耳，看著四個穿上西裝的band友通街走，幾過癮。

最愛的MV是〈空中小姐〉，雖然有點抄襲Mr. Children加Red Hot的嫌疑，但是多看幾眼，主音Tim的舉動又幾似Red Hot個Vocal，Adam個尷尬樣仲抵死，看罷會心微笑。

之後的〈一步〉是CD中的第5 首歌，DVD中的Track 04，是全碟最動人的歌曲，詞寫得很好，以「一步」這個名詞帶起跳樓尋死的種種思想鬥爭，聽得讓人眼濕濕，看MV的時候感覺尤其沉重。Tim的唱腔把歌詞表達得不錯，可惜有多少走音，幸好無傷大雅。

全新版本的〈初哥〉改編得不俗，由原本的funky風格一轉而成ska punk，加上阿Paul客串guitar solo，可以此歌為下首派台作品。

CD中的第2首〈黑仔〉是另一首喜愛的歌曲，曲是作得不錯，其實以歌論歌，Dear Jane大碟中的作曲及編曲以至mixing都很有水準，能做到相似外國style的pop punk。而加上〈黑仔〉的詞通順易明，所以就跑出來了。

讚還讚，Dear Jane還是擺脫不了香港band仔一貫的毛病，詞弱。很多時都不甚了了、敷衍了事，可能一來他們的成員都從外國回來，中文根基較弱，二來他們的旋律都幾難填，因此以詞就曲，扭曲了原意，讓人聽得不明不白的，或是講得太白，沒了深度。

其實下次可嘗試交與專業填詞人負責，高水準的曲加上高水準的詞，一拍即合，Dear Jane就能成為大家親愛的阿珍了。
推介：DVD中的7首歌
============================

睇完請你去埋農夫個hompy

TEXT:陸寶

偷拍藝人鍾欣桐案，影視處已經接有千七宗投拆，破晒記錄，閒閒地可以過二千，可以入紙試0下申請入健力士世界紀錄啦，香港人成日都要爭第一，話晒多個紀錄又可以係香港0既娛樂圈生存多幾年。

而家阿嬌已經到灣仔警察總部報案，案件亦由「重案組」展開調查，作為一個納稅人，我終於覺得納咁多年稅都值得，如果直頭可以搵G4特工接手就仲好，搵個馬德鐘咁靚仔0既特工保護阿嬌﹙馬德鐘之前乃係G4﹚，24小時貼身保護阿嬌，有緣的話，就大可共譜戀曲，到時就雙贏啦，咁就真係功德無量，一齊共建和諧社會。

今次咁大件事，點會無婦女團體出0黎抗議呀，大叫罷買罷睇，我就一於響應……d啦，好似同諸位香江義士一樣，一路睇一路鬧，一路鬧一路買，如果本雜誌真係咁犯眾憎，邊得0黎咁好銷量到要加印呀？話時話，加印而家對雜誌0黎講都係一個selling point，君不見某期「新地」，以高難度偷拍黎明樂基兒以作招徠，封面亦如常附上創意十足之標題，結果大賣，15萬本沽清，右上角仲要爆個「再版」兩隻大字出0黎，驚死你走雞添，真細心！係呢，本雜誌個老細咪就係楊生，唔知佢對今次旗下藝人被對家本雜誌偷拍而大賣，又會點諗呢？

我0係網上睇到一段關於泳兒0既報道，真係要同大家分享下：此外 ，泳兒自爆曾試過月經來潮，導致衣服過底，令她非常尷尬，在場記者向她建議用棉條，不過卻問她會否害怕弄穿處女膜，泳兒聞言顯得不知所措的說：「唔知喎，會咩？」續問她的處女膜是否仍完好，她直認：「仲係度，我都冇拍過拖。」再問她未拍拖也可發生性行為，泳兒說：「唔好嚇我啦。」

都係一個循環0黎0既，有點0既藝人，就有點0既記者，有點0既觀眾，就有點0既傳媒。而家記者連呢款問題都問得出，但樂壇新人又竟然會照答如儀，真係吹到啤啤聲，咁樣「縱」傳媒法，無怪乎狗仔覺得偷拍就真係無咩問題，仲以為幫到個藝人上到報紙，藝人仲要多謝番隻狗仔轉頭添。

咁搞法，不如唔好等記者問自己啦，藝人不如自己放多D料，咁D狗仔隊咪會絕種囉，最好遲d藝人可以自動上報行房次數，娛樂版仲要整番版「藝人行房指數表」，丫笨！？

不喜歡感情亂射的大雄，忍過了刺眼的勁歌金曲後，終於了尋回最舒服的古巨基。

alexbb blog link