假期後工作已有個多星期啦，但我無論心理同生理上都好似未適應咁，哎！

尋日開始老細睇堂啦，好似點燈咁，佢會突擊殺到，只係早五至十分鐘見嬸嬸通知你，無得準備！慘！唔知幾時到我呢？

今日知道左一d消息，聽後唔多開心，亦幾嬲怒，點會有人咁樣架？......雖然件事唔係直接發生在我身上，但仍然改變左我對某人的睇法......

P.S.今日係nana生日，在此祝你生日快樂！永遠都靚靚！早日生番個小米奇、小nana呀！亦深盼你能早日康復，要保重身體呀！

開工大吉！

今日返到去，老細一早就上到staff room，派開工利是！呢封係我咁大個女第一次收到的開工利是呀！之後，兩位主任亦好好人咁派利是比我，有結左婚的同事亦有派利是，真係好意外！yeah!我都係好鍾意收利是呢！

每逢長假之後，我都會瞓唔著，所以我昨晚都無好好睡覺，同班仔女一樣，一臉倦容，猶幸佢地今日都算乖，所以都唔算太辛苦！

今日比左好多功課，聽日有排改，希望今晚能好好睡一覺啦！

農曆假期話咁快又過去啦！前幾日已經開始倒數，今日終於到左last day啦！

今日在家中改作文，效率極低，不過我同自己講今日無論如何都要改晒佢，唔係積埋積埋就仲大鑊！下午，就同Calbee食tea，然後繼續返屋企改文，備課，整powerpoint。我覺得自己好似d仔女咁，臨急抱佛腳，哎！

呢過假期，有玩過，有做過野，又有利是，都算係咁啦！不過，一諗起聽日又要面對非人的生活，同果堆未完成的工作，就覺得好煩啦！

各位好友，聽日開工大吉啦！

今日一早就起牀，準備到柴灣同Calbee的嫲嫲、姑姐等飲茶。話晒都攞左人地的利是，點都要現下身，頂硬上啦！

到達茶樓後，嫲嫲呢？原來佢唔記得今日飲茶，仲自己在家中食左飯！所以，我同Calbee之後就上佢屋企探佢，而佢媽媽同姑姐就到大姑姐屋企打牌。

屋內，剩下Calbee、我、嫲嫲同工人。um......你眼望我眼，都要搵話題講下！嫲嫲一向都好錫Calbee，所以佢一見到我地，佢好開心。以下係我地主要的話題：

嫲（單刀直入）：你地幾時結婚呀？

我地：儲夠錢先啦！

嫲：咁即係幾時呀？

我地：過多一兩年先啦！

嫲：咁結左婚同唔同阿媽住呀？

我地：（靜默）......應該會搬出黎住！

嫲：咁搬去邊？

我地：近住兩家的地方啩！

嫲：私人樓？咁係咪一次過比晒錢呀？

以上的對話，由於老人家的關係，好似個cycle咁，重複了三次以上，嫲嫲每隔幾分鐘就會問番相同的問題，好搞笑！當然，我地知佢都係為我地好！佢仲不停強調好想飲我地杯茶！講到眼有淚光，我當時真係有點驚架！如果佢真係喊，都唔知點算。到最後我地走時，佢仲堅持要站在lift口望住我地走至肯返入屋，真係非常唔好意思呀！

今日，爸媽要返工啦，Calbee又返工，正好比我收心養性的機會。我起牀後就開始改四仔的默書簿，越改越火滾，唯有邊改邊睇電視中和一下。

約四點幾，我到上水同舅父一家食tea，因為佢地我幫佢save d games比表弟玩。表弟安仔食量真驚人，佢一個人食左兩個tea set，分別係牛肉烏冬同海鮮炒飯，仲食左一個手卷同雪糕，勁！我真係甘拜下風呀！

之後，就幫媽媽拎野比姨媽，順道喺佢屋企食飯，同表妹聚下，都幾開心呀！就快考mock同會考了，阿毛，你要加油呀！

瞓到中午至起身的我，食過bunch後，就努力改簿，今日的目標係三仔默書。

雖然背默的範圍有點長，但佢地都算默得唔錯，抵讚！

爸媽到二舅父家拜年，但礙於對方家中有狗，加上我有少許唔舒服，所以就無去了，唯有叫佢地幫我代收利是吧！哈！

晚上，到上水會合爸媽、姨媽等，到兩家飯店食左兩餐晚飯，好搞笑！亦食到好飽呢！

今日初四，Calbee要返工了！我亦都在家中開工了！

今日中午，我特意回校攞簿，一返到去，竟然見到東老師，哈！佢好搞笑！一個人坐在黑沉沉的房裏。至於我張枱，由於早排員工洗地的關係，竟然將好多原本放喺地上，但唔屬於我的物品放晒喺我張枱上，好誇張！我唔打算將佢地搬走啦，等物主自行認領吧！

好彩我帶在一個超大環保袋返去，我發覺我堆積在唔少工作未做呢！結過，我就好似個聖誕老人咁，拎住一大袋（仔女送比我的厚禮？！）返屋企了。

黃昏，同家人一齊睇劉華套墨攻，都唔錯呀！不過套戲就有點長。

今日係年初三，終於訂到飛睇戲啦！

我地先到尖沙咀shopping，竟然碰到姨媽一家，真湊巧呢！

黃昏，到黃埔睇翻生侏羅紀，真係好好笑！我覺得最爆笑係原全無諗過富有中國特式的物品，如秦俑、玉獅子，甚至皇帝也會在西方電影中出現，真係好得意。我都好耐無試過睇戲時，去到一d gag位，全場觀眾竟然同時拍手大笑，好有氣氛，fit晒過年的熱鬧感覺。我身後的小朋友，由於看不懂字幕，不斷問爸爸劇情，而爸爸只不停話："一陣至話你知！等我睇埋先！"真攪笑！