呢期迷上了玩facebook呢，搞到冇咩時間同心機上黎呢便update呢。

同埋好似越黎越唔知寫咩好啦，覺得好似日日都係咁過咁，都冇咩特別野發生。

星期五那天到了澳門陪傑傑，我地去左大三巴，觀光塔，好多賭場，仲係新葡京食左buffet，真係好好食，每位都只係2百蚊，好抵食，大家可以去試下，好好味架。

澳門真係好犀利，真係周圍都係賭場，去到邊都有得賭，不過我同傑傑三日都只係玩過百二蚊老虎機，都唔夠十分鐘就輸哂喇﹗

同埋d賭場真係好令，金碧輝煌，極盡奢侈，有水任飲有三文治食，唔使錢，我同傑傑日日行到累就入去拎支水飲，哈哈。

星期五到步已經諗住買定星期日船飛返香港，但係已經冇哂，最早得返星期日晚凌晨1點半，好彩我星期一返下晝1點咋，咁就星期一搭早船返香港啦。

今日公司都係好多野做呢，聽日又要開會，好多野要準備啦。

放左工就同d同事出左去銅鑼灣打邊爐，好彩食左d消炎藥好返好多咋，如果唔係我今晚都唔去得啦。

我地去左食寧記，真係兩個鐘就趕人走，爐都收埋，不過都食得好飽，係冇得傾耐d可惜d啦。

難得傑傑返左香港，星期一晚我地去左旺角食飯同睇戲「奇異恩典」，本來都好地地，食到秋刀魚就出事啦，因為我本身唔係好食多骨既魚，因為我唔識食呀，跟住傑傑就話唔使驚，秋刀魚d骨唔會啃死人，叫我試下，卒之就出事啦，一食就啃魚骨，於是就猛咁食野希望可以將條骨落格，唔夠5分鍾我直情嘔出黎，魚骨有冇落格就唔知啦，只知個喉嚨挖損左囉，痛到今日，去左睇醫生，醫生話個位好入睇唔到，只係開左消炎藥我食，話d骨咁幼會自己落格喎，應該冇事，如果有發燒就先至照喎。

食完野去左朗豪坊睇戲，套戲都幾好睇，大家可以睇睇。

為什麼就不能只維持朋友的關係？

難道真的要斷絕來往才能把糾纏解開？

我真的不知道我傷害了你，

我以為我們只是普通朋友。

我已不知道我還能怎麼做...

很久沒有更新了，因為實在太忙了，公事又忙，私事又忙。

自從傑傑過了澳門後，差不多兩星期才回港兩日，感情反而好像變好了，很奇怪呢﹗比以前更懂珍惜相處的時間，或許人真的犯賤，在你身邊時總變得理所當然，沒有了才覺得可貴，以前他在香港，放假只會在家hea，現在反而會期待他回來時安排點節目。

由於傑傑不在港，多了外出應酬，這陣子也認識了不少新朋友，酒則盡量少喝了點，淺嚐便算，免得把身體都玩壞了。傑傑回來會鬧呀，哈哈

公事也是忙得交關，之前處理完新學期的事，就要做上學期的檢討等事情，真係想做死人咩，又多會開，好鬼煩呀~

今日下晝四點就收工嚕，一個人去左行街街，見呢幾日有d風，又係添新裝既時候，唔使一個鐘，我就買左成千蚊野啦，一件外套，三件背心，兩對鞋同一條薄頸巾，唔好睇我買好多野咁，因為我通常都係鐘意一次過買一堆，我平時好難行街架，唔會逐d買，所以買開就會買多d啦。

星期六晚同彤彤、恩恩返左大陸，去到就食飯，估唔到係大陸撞到我堂哥，食左好多野，三個女仔叫左瀨尿蝦、四隻蠔、半斤花螺、十二隻扇貝、一碟山水豆腐、一碟蟶子，仲有一碗飯同米粉，真係食到勁飽呀。

食完已經十點，我地就叫車黎接我地，去到按摩個度都成十一點，沖完涼，做完腳底按摩，我地就上房嚕，我地三個都選擇做泰式，真係幾舒服，做完差唔多兩點，仲去食埋免費消夜先訓，實肥啦今次。

平時去開呢間野都幾好訓，但係個晚就訓得唔好啦，所以第二朝都冇咩精神，十點起身我地就即刻去沖涼換衫出返東門食野，然後就去左做GEL甲，我第一次整咋，都幾令令既，我整左珍珠白色底，用粉紅色閃石貼左D花，原本想整黑色甲，但傑傑實話我啦，所以冇整到。

返到屋企都差唔多六點啦，執下野都成七點，訓左半個鐘食D野，八點半就出左去搵康康佢地，去左灣仔一間酒吧到飲野，我飲左四杯Cocktails就醉左啦，可能真係訓得唔夠啦，真係出去飲咁多次酒都未試過四杯搞掂我，醜死怪啦，不過我都冇失禮人，哈哈哈。我地尋晚主要都係傾偈，都幾開心，飲到兩點，佢地仲要飲TEQULIA，真係勁，我梗係唔陪佢地癲啦，未辛苦過咩，呵呵。跟住我地就撘的士返屋企嚕，返到去成三點幾，我仲同恩恩講電話，講到五點幾就訓到隻豬咁嚕。