http://

 早前看到Phoenix 人手做的作品不錯，所以我搵佢幫我整左幾個生日蛋糕，送俾快生日的朋友、同事。

 30/3/2008 (日) 今朝8:30 起身，因約左RB 10:15 上車，去紅磡漁人碼頭，參加同鄉會飯宴，其實今次既活動我係陪婆婆架，佢好想去但係冇人肯陪佢去呀，咁我就陪佢去啦，點知我話去大舅佢又肯去喇，最後變成六個人去。

  接我既車長都係姓陳，但這個陳車長態度好得多，樂意協助乘客。11:25到達酒樓入到去己經聽到好嘈好嘈既粵曲，點知唱到3:00呀，冇停過呀，好難聽，聽到我、妹、爸爸有點兒暈呀，其實唱粵曲都唔係問題，最大問題係開到個喇叭好大聲呀，勁過睇城城演唱會呀，傾唔到計、聽唔到野。

  會長派利是俾70歲以上耆英，所以婆婆都有份，個會安排幾好丫，唔駛耆英行利是會自動送到呀，抽枱奬禮物每枱兩份 細奬熱水壼、大奬電燉盅 我當然係睇中左個大奬啦，哈我地有6個人即係有1/2 機會，細奬抽唔中，唔緊要，我既目標係大奬俾婆婆抽中，但婆婆俾左我 呵呵 佢叫媽咪燉湯我飲。禮物都係自動送上。對各耆英服務周到。有禮物抽全個人醒晒。

  今次係我第一次參與，LUNCH 58 枱，DINNER 好似6X 枱，TOTAL 131 枱，感覺粵曲好嘈，所有會董對耆英好好，照顧周到，禮物唔錯每人有一份大禮物內有壽桃牌鮑魚麵。

  婆婆最開心，有利是、有禮物。

  今日係君家姐過大禮我冇去，因為我去唔到呀，佢屋企係舊樓要行三層呀，點去??我地派出媽咪做代表，我就留係屋企，小櫻放工後上黎我屋企，叫外賣食，同埋參觀下我既新書枱，我D外賣冇菜，所以叫爸爸煮D菜出黎囉。

29/3/2008 (六) 晴 今朝訓到好晏，阿YIU二點黎到我屋企，幫我搬走舊書枱，六點新書枱及鞋櫃終於送到，阿YIU 主動幫手打點，佢好似住係我屋企咁，打理得整整有條，佢又知我和妹妹心意喎。好好呀。

 想請佢食晚飯，但佢要趕住返屋企，咁下次食自助餐啦。

25/3/2008 (二) 今日同同事講開，我昨天縮沙冇睇我的最愛，同事話YAHOO D影評寫得好差，佢覺得套戲都OK，類似獨家試愛，咁我諗諗下咪打俾小櫻問佢係咪想睇囉，佢話好。

  放工後，佢係我屋企樓下等我，一齊搭馬鐡去新港城，買飛好平$40，扺睇，得番45分鐘食野，極速去仙跡岩，我叫左個雞翼麵線，唔知係咪我好肚餓既關係啦，我覺得好好味，但吐司就...我有食飽恐懼症呀。除左朝早一定要食之外，其他時間我唔想再食飽呀。

 好耐冇去過馬鞍山戲院睇戲喇，對上個次都唔記得左幾時，不過仲記得係同Tammy，套戲都算ok la，比十分愛好，比獨家試愛差少少咁啦。睇完又極速去食甜甜糖水，天氣有d涼，我身體又唔好，所以擇熱蛋白燉鮮奶，小櫻就什果西米露，好快就食完，外賣左一碗蛋白燉奶俾阿妹。

假期開始的第一天，我還以為在這個復活假期裏，躲在家中睡晏覺幾天。怎料

　22/3/2008 (六) 早上盈爸再一次約我到光仔吃LUNCH，還借了他最喜愛的巴士VCD給我欣賞。回家後我立即觀看巴士VCD，他借了兩隻給我，第一隻是七十年代巴士的轉變、第二隻係八十年代巴士的轉變，但睇到有少少頭暈，因D巴士不停轉，旁述不停介紹不同巴士型號，話事話我聽完都唔記得。但都好值得睇，好懷舊，尤其介紹我曾經到過既地方最有親切感。例如美孚、佐敦碼頭、牛頭角下邨巴士站、藍色中巴(我每年只會坐一次，因爸爸帶我到維園行花巿) 我記得坐位不舒適的。 仲有好好笑係旁述話巴士埋總站要飲水。因科技既進步，好耐都冇見過巴士飲水LU。

  23/3/2008 (日) 今天又再到光仔吃LUNCH ，除左我地三個外還約左一個住天水圍的朋友入黎馬鞍山食光仔。好遠呀 但佢好準時我約佢11點左右佢10:30都未夠就到左 哈 食野食到差唔多1:00PM 就返屋企喇。天水圍朋友就搭車走。

  下午我繼續睇巴士VCD及上網睇我的最愛影評，因為小櫻想睇，點知YAHOO d 網友寫得好差又話係垃圾戲、又話係冇思想D人先覺得好睇、又話適合12、3 歲D人睇。寫到好差。咁我咪縮沙唔睇囉。因上次睇過十分愛真係勁垃圾，SIDE錢SIDE 時間。

  24/3/2008 (一) 因節目更改，夜晚去左元綠食壽司，食到十點返屋企LU。牛油煎墨魚都幾好味。

今日係Mr IP 接我地去觀塘參加詠芝既婚禮，一車九人，好攪笑，佢地係車上唱歌，唱左幾首就到目的地喇，我就冇唱啦，因為我唔識唱囉，車長好攪笑呀，話渣緊車唔方便咋，如果唔係佢都拍手掌呀，哈

 到目的地觀塘浸信會，差唔多全部人都去晒練歌，我就同AMY 坐係度聽佢地唱歌，二點半婚禮開始，講道個牧師講野都幾好笑，但我有少少唔認同佢所講其中一樣野啦，佢話妻子要聽老公話，要遷就老公，因為老公係一家之主，要讓老公作主，仲有打左一個例子，關於男人包二奶既理由係，二奶願意用雙手"送"荼老公飲，因此打動到個臭男人喎，又話個老婆唔會咁做喎，我覺得呀，呢D係藉口呀，什麼'送'荼喎，唔好話D男人賤格+咸濕。

 四點開始影相，我影左D相啦。

 五點就搭車返屋企喇，係等車途中我講左俾小彥聽我既憂慮同唔開心。

 返到屋企樓下見到我屋企個黑色大架呀，哈 原來阿YIU 過黎幫媽咪掉左個黑色大架落樓下，不過都有少少唔捨得個黑色大架。

 今晚媽咪買左大家樂俾我地食，之後訓左，九點再起身，因為媽咪煮左飯俾爸爸食，我出廳食餸。

ftp://