不喜歡看台灣離誌, 例如 Beauty, Choco, 因為相片拍得太「娘」.

卻喜歡看台灣翻譯的日本雜誌中文版, 例如 Mini, Ray, 相片靚, 內容又看得明白.

最近在 7-11 看到的 Yume「記 飾本」, $20, 100% 台灣編採, 水準卻甚高!

雖然某些 styling 還是過了火位, 但介紹的飾物好靚好靚! 真想參考自製!

More info: http://www.yume.com.tw/other/yume_online/index.php

近來開始用幾種沐浴用品, 非常滿意, 有必要推介一下. 左起：

SKII Skin Rebooster $495

Shower 時用, 「好似幫塊面做 Spa 咁」, 真係唔錯!
我習慣起床時淋浴, 順道敷呢個水份面膜, 上妝貼好多.
而且超級抵用, 已經連續用了三個月啦.

Kiehl's Amino Acid Shampoo $195

貴係貴 d, 但係不含化學性起泡劑, 唔傷頭皮及頭髮.
又會令頭髮比較有「分量」, 唔會撻成一塊.

MALIN+GOETZ Body Cleanser Bergamot $195

香味迷人! 「上午用佛手柑涼身, 返工都醒神過人.」
咁 cheap o既形容, 真係配唔上呢支只在 Harvey Nichols 有售的「高級」沖涼液.

Naomi 「炭」沐浴露 $29.9

平野唔一定冇好.
呢支「炭」沐浴露雖然明顯加過 Sodium Salt,
清潔程度不高, 要用的分量較多.
但確有止汗及抑臭作用,
老公用左, 覺得爽過 Neutrogena Rain Bath.

凌晨十二時, 從灣仔合記買到的幼滑腸粉.

自行按喜好加上大量芝麻及少少甜醬, 盛惠 $6!

一星期 call 了兩次外賣, 總結一下：

星期四叫 Pizza Hut 外賣

用HSBC 信用卡有特價, order $183 四人餐 (P511).
其實只係 2 個人食, 預左留一半第二日做 lunch. 

意式風情芝脆批（大批） 1 個（芝心麻麻地, 早知改薄批啦, 留下 3 塊第二日食）
焗芝士白汁龍利柳飯 1 客（出乎意料, 味道唔錯!）
蜜汁雞全翼 4 隻（似「東西燒」, 好脆. 翻焗都好香）
蒜蓉包 1 客（包住太耐, 冧哂）
蘑菇忌廉雞湯 2 客（好! 最鍾意飲 Pizza Hut d 忌廉湯）

30分鐘後送到, 熱辣辣.

星期四叫 KFC 外賣

Order $168 蜜蜜燒雞翼套餐（4–5 人）, 又係預食剩o既.

吃 KFC 比 Pizza Hut「膩」得多, 全部都有食剩.
用 Aeon 卡每 $60 送 $20 cash coupon.
我們有 3張, 下次 order 用, 一次最多可用 4 張.

最離譜是落 order 時 7:45pm,
佢竟然話要 75-90 分鐘送到?!
咁下次未肚餓已經要落 order, 否則餓死冇人可憐.

昨天爸爸給我一封信, 是理工寄來的 HTM Newsletter,
通常我拆開之後從不細看便丟掉.
但昨天那 Newsletter 夾了一封黃色的信, 好奇一看, 名為 Terry Lam's Unfinished Project,
下面有一個銀行賬戶號碼, 我在想, 是什麼呢? 是他的研究 project 籌款?

原來, Dr. Lam 在四月初突然因病逝世, 留下妻子及十歲的女兒.
印象中 Dr. Lam 只有四十歲左右, 怎麼......

Dr. Lam 是我 year 3 的導師, 他的課在 8:30am, 我總是起不了床, 全撇課. 測驗時, 當然不合格.
臨近年終試時, Dr. Lam 找我.

Dr.：你測驗不合格, 考試滿分都冇用 wor. (當時的計分制是平時佔 60%, 考試佔 40%)
我：咁......會點o架?
Dr.：如果你有一科不合格, 要 retake, 就要遲一年畢業o架喇.
我：咁......點算呀? (已經急得哭了出來, 逃了的課無法上返啊)
Dr.：......不如咁啦. 你做返呢 5 年的 past paper, 考試前交給我, 我就比你平時分合格啦.
我：......多謝 Dr. Lam.

某程度上, 這是我與 Dr. Lam 之間的秘密.

因為用了 5年 past paper 來溫習, 終於我的考試也能順利合格.
雖然 Dr. Lam 知道我從來沒有重視他的科目, 但仍然願意幫我過渡......
沒有他的仁慈, 我無法畢業.

那個銀行賬號, 是 Dr. Lam 的舊友為他設立基金, 協助供養他的女兒至 18 歲.

HTM 的校友, 我們齊來出力幫忙吧.

準wor! （雖然我唔應該睇）

從妙筆生花的 ◎『→件健』● hompy copy過來：

魔羯座(12.22—1.20)

愛情忌諱：不能自以為是，不能巧言伶色，不要不切實際，不要行事過快。
<---- 對，自以為是又冇料的人我最憎. 如果自以為是而又叻又OK wor!

感情地雷：不可以故弄玄虛。
<---- 對. 至憎果ｄ成日「睇下點lor」o既男人, 一齊就一齊, 唔一齊就死開, 唔好阻住我識第二個靚仔.

嚴肅認真的魔羯座最討厭自以為是，腦袋空空的人，沒有一定的內涵他們絕不會多看你一眼，而巧言伶色的人更是他們害怕的典型。行事踏實，步步為營的性格又讓他們拒絕幻想，希望每一步都在他們的預料之內，不喜歡有所謂的驚喜或動蕩。
<---- 其實鐘意驚喜o架, 不過只限「Preferred 驚喜」, on my list 果d 驚喜 only, 否則唔會喜, 會好無奈. 

他們精打細算，當然越清楚越好，省得麻煩。讓魔羯座情人最受不了的是滿肚子草包游喜歡故做神秘，不懂裝懂的人，就算你是俊男美女也不能吸引他們喔，所以趕緊去學習吧。
<---- 果d「不懂裝懂」真係......Edison 咁靚仔都唔會 buy, 連淨做 friend 我都唔肯.

今日, 心情平復, 照常工作.

需要搵一個叫 Jo (花名大頭 Jo) 的女仔, 是 Alan 的朋友,
我記得曾記下她手提電話在我的 phonebook 中, 於是我打去...

我：唔該大頭 Jo. 
Jo：你搵邊個?.
我：你......可能我打錯了. Sorry.
Jo：唔緊要.

晚上, 我打長途給身在北京的 Alan, 問他要大頭 Jo 的電話.
寫下, 發覺與懷疑「打錯」的電話一模一樣!

我：頭先我打去, 佢唔認係大頭 Jo.
Alan：你一開聲講人地花名, 佢梗係唔認. 你話你係 Alan 老婆啦.

再打.

我：唔該阿 Jo. 
Jo：我係.
我：我係 Alan 個老婆.
Jo：邊個 Alan?
我：章 XX 呢, Alan 喎!
Jo：唔識 wor, 你係邊個?
我：我係 Apple.
Jo：o我, Apple. 我識你o架, 但我唔識 Alan 喎.
我：下? 你唔係大頭 Jo 咩? 你係唔係有個七個月大o既仔?
Jo：咩呀, 我係 XXX 公司的阿 Jo 呀!
我：......咦?......咁點解......我老公有你電話o既?

後來, 我終於估到原因!!!
可能是史上最離譜的搭錯線事件. 在此向靚女 Jo 致歉.

老公剛升職加薪. 我不禁在想, 我的前路要如何走?

在這公司工作一年多, 開始厭倦, 再沒有滿足感.
是我不思進取? 還是腦閉塞, 沒法變通?

是因為我討厭什麼? 同事好, 老闆好, 公司形象好, 人工都ok,
其實沒有可厭棄的地方啊, 我厭倦的, 其實是什麼?

我估計, 是這一種生活模式.
我由很喜歡寫, 變成看到原稿紙就頭痛.
已經 7 年了, 公司換過, 職位變過, 就是職責沒有變, 完全一樣.

唉, 怎麼辦?