放左幾日假，我終於都返要返工啦！放假既時間，真係過得好快。

4/9 )因為係本人生日既正日，所以呢一日祈祈都放假一天，一大朝早，我地一齊落街食左個早餐，之後我地就去左超市，因為答應左個朋友，整"咖哩雞"比佢老公食，所以食完早餐就去左買材料啦！返到屋企坐左一陣就開始整野食…。當我煮好左我要整既野時候，祈祈就問我幾點出去，我話6點出門口囉，咁佢竟然…整砵仔糕。好啦！食小小都ok既…。食完又無咩好做，睇下電視，打左一機，上左一陣網，就準備換衫出門口，去到美麗華…嘩…使唔使咁多人呀！唔使錢架。不過呢一晚我要去照顧肥妹，所以我都唔係食左好多野，不過我食得最好既係…長腳蟹，我大大話話食左2碟，不過我最鍾意既"梳乎厘"我只係食左一個，之但係肥妹話飽話飽佢反而食左2個。比佢激死。到我地食到最尾既時候…我地就準備食蛋糕啦！食睇下當晚既相，就去我facebook啦！

5/9) 呢一日我訓到10點幾就起身，又無咩好做，咪上網睇下報紙囉，睇左陣電視竟然做"廟街孖兄弟"嘩…我放假有克勤陪又唔錯啵！開心死我啦！放假真係好，因為媽咪返晏，所以可以同佢食個lunch，食完佢就去返工，我就去做gym，大約5點零鐘就返屋企準備晚飯。之後就乖乖咁坐定定煲我既電視劇。

6/9)呢一我大約11點先起身，嘩！好訓得呀！今日又係做同一樣野，上網睇報紙，睇睇下媽咪起身整野食，問我食唔食，嘩…死就死啦！陪妳食小小(我呀媽出名煮野難食)，好彩一個麵姐，無問題，食完野媽咪佢就返工，我就繼續打機等祈祈放工，大約3點鐘祈祈就打返黎，話去剪頭髮，問我之後去唔去睇戲…好啦！好耐都無去戲院睇戲啦！當去拍下拖啦！上網睇下邊間有得睇﹖幾點有得睇﹖嘩4:30，打比祈祈先，佢話睇完先剪頭髮，好我即刻去準備，用最快既時間出門口，去到太古都4:20分，好在祈祈買左飛。我講左咁耐都好似無講我睇咩戲啵！登！登！我地係去左睇"80分鐘死亡直播"。呢套戲無悶場，夠激，我比佢80分。無流灘位。不過我睇到想嘔！想嘔唔係因為內容，係因為拍攝手法，手提DV走走走…跑跑跑。我暈呀！老細。睇原戲之後祈祈就去剪頭髮，我就係太古行一陣，再去美心囉月餅返去比老豆同媽咪食，其實都唔係佢地想食，係祈祈個大佬話要食冰皮，呢D野我好識做既，無問題！囉返野返屋企，兩老食緊飯，飲左柸涼荼，去走人，買野返屋企食。之後睇怪談。

7/9)呢一日我同祈祈9點就起身，因為今日我媽咪生日，我地要返黎準備晚餐，所以釣魚呢個指定節目，我地提早左，10:30am，北角等。因為一行4人囉。開頭諗住2:00pm走，點知大家都唔願走，結果3:30pm要急閃！底死。一落船4個人9'9"去完洗手間，即去碼頭買海鮮，好彩買到大蝦同鮑魚。閃上的士去胡生(祈祈表哥)屋企囉雞，因為佢整左隻咸雞，返到屋企我地就分頭行事，大家分頭開工，大約8:15分，爸爸突然話去投票，原先話飯後先去，好啦！我都行，做個好公民，佢地兩個就選返自己喜好，而我當然都有自己喜好啦！當我地投完票行返屋企既時候，頂…落雨。3個人又急步返屋企，返到屋企，開枱食飯，因為尋晚媽咪正日生日，所以我個好同佢男朋友都返左黎食，我圍8個人，8(食送)1湯，仲有紅酒添。一餐豐富又好味既晚餐，就咁就食完啦！

仲有下文架……待續……

呢個星期一定係我既勁食星期啦！首先講下今日先啦！今日公司同事book左灣仔Novotel Century食Buffet，因為呢個月係我同另一個同事既生日月，雖然我地都未到生日，不過…我既慣例生日正日同之後幾日都唔會返工，所以公司同事同我提早慶祝，當然好多謝咁多位啦！不過今日呢餐Buffet就真係麻麻啦！因為半Buffet形式，所以其他野食都小之有小，因為我已經介牛幾年，所以可以食既野就更小，等我簡單介紹下有咩食啦！

前菜

1)火腿(2款)，生牛肉(2款)，炒雜菌(1款)，煙三文魚(1款)，芝士(2款)，沙律菜(3款)。

主菜

1)長通粉…太膩，芝士味太重。

2)煎鴨胸…太老，好咸。

3)羊鞍…肥同肉比例唔平均，太老(同事講比我知)

4)煎爐魚…無魚味，有小小"聲"。

甜品

1)蛋糕(6款)-我覺得唔好食，2)生果(4款)，雪糕(2款)

總括

呢間Buffet我只會食一次，再有下次有人請我都"NO WAY"啦！

由於我生日同我契女Emma同一日，所以呢幾年我地都係一齊慶祝，當然今年都唔會例外啦！而且我地都已經訂左尖沙咀美麗華酒店地庫既"TODAI"食Buffet，我仲好記得呢一間Buffet我最鍾意食佢既"梳乎厘"，唔知佢地有無退步呢！我每次去都可以食3個以上，真係有D期待…﹖

今晚兩個契女終於都係加拿大返黎啦！唔知佢地有無唔同到呢！不過聽佢媽咪講，肥妹見左好多呀！下…咁我仲邊夠力抱妳呀！Hannah妳返黎一定再減肥先得啦！肥妹妳返加拿大時又話會Miss契媽既，妳電話都無打比我呀！掛死我啦！

我正式宣佈，我老細同佢細佬由即日起正式分家了，其實我地都好耐無見過佢細佬啦！不過對我黎講，當然開心不過啦！因為唔使再對住一個又扮野又無料到既人，其實呢一日，我已經等左7年啦！希望佢細佬一路順風，有咁遠走咁遠，除左返黎囉返d野，其餘時間都唔可再返黎啦！喂~喂~以後唔見啦！

仲有8日，我就要去另一個階段啦！唉

唔講咁多去片…… 呢個傻仔…呢！

話說今日公司所有人，如常返工，各有各忙，不過到10點幾，都未見老細返工，哈哈，開頭仲以為佢去睇醫生，遲小小返啦！點知！11點半既時候，大門~咔一聲門左，我地個個都向門口看，就係呢個時候，我見老細囉住"把姐"，篤篤下咁行返黎，嘩~~唔使玩咁大下化，扮跛佬呀！見佢係個門口用左12"88行返入自己個位，個樣仲好痛咁添，我地都無人彩佢，怪就怪佢把口衰到無朋友啦！不過~我點都係逃唔出佢魔掌，鬼叫我係佢秘書咩，唔使3分鐘，我就聽到佢叫我啦！

我︰老細咩事﹖

老細︰妳可唔可以落去幫我買個麵包同比柸水我呀！

我 ︰哦！好呀…

咁我咪去買比包比佢囉…返黎比左個包佢之後，我又唔理佢返埋過位睇下報紙，過左半個鐘多d，見佢係房打左幾次電話…就見佢係間房爬返出黎…。Alice我唔得啦！我打左3條9叫左白車，唔使下化，佢之後就坐左係門口張"梳化"等。大約15分鐘後，3個救護員就推住架車上黎…我即係去打開門比佢地黎帶我老細走啦！不過~當我老細比帶走時，個3位救護員囉左塊白布出黎，佢未死架唔使用白布包下化，哦！比佢"姐"下對腳姐。之後救護員哥哥佢都仲囉條"安全帶"hold住我老細添…嘩！我老細成日話佢有頭有面，比呢度其他租客見到佢咁樣比人帶走…(火羅)爆啦！我老細呢頭落樓，我地個Project Designer就話去食飯啦！我當然係有隊跟隊啦！食完飯之後，呀Designer問我一陣有咩做，我話老細唔係office我無咩urgent野做架，諗住返去打下機囉，點知Designer話︰不如去會展睇美食博覽囉﹖咁近，而且今日最後一日，我話咪去囉。就係咁，我地又慶祝…沒有BOSS的日子啦。唔知…BOSS聽日返唔返到工呢！不如…休息多幾日先返黎啦。

今日係一年一度既7月14日，大家今晚唔好咁夜返屋企啦！

仲有記住，如果有人從後叫妳 / 你，記得唔好應呀！！

祝大家平安過度。

大吉大利…百無禁忌

消防員對我黎講從來都唔陌生，因為我呀爸都係一個消防員，細個既時候，我唔會明白消防員有幾英勇，因為我成日都覺得佢地好得閒，每日返到局睇下電視、打下排球、囉條水喉周圍射下水同食下飯又話落間，不過當人大左，知道佢地既工作崗位後，我不得不對佢地改觀。

自從嘉利大廈大火之後，我對消防員更加有一份講不出既敬意，雖說香港唔係成日都有咁多大火災，不過每一次係電視入面見到，當我地市民有需要時，所有消防員都"義不容辭"咁幫助我地，呢一份無私既精神，我相信唔係人人都做得到，起碼我一定唔得。

不過有一次對我黎講，可以話係親身支持，呢件事已經係10幾年前發生架啦！我當時仲讀緊書，而且仲住係柴灣，如果大家仲記得柴灣有一次大雨引發既山泥傾瀉，呢一件事就係發生係我屋企後面，而且呢一次係我第一次親眼睇住我呀爸同佢一班師兄弟好努力咁救人，記得個日朝早我起身(我仲未知發生左咁大件事)，見到出面落好大雨，個天好黑下，咁我咪走出露台望下囉，點知呢個時候我見到屋企後面山邊條馬路，比D山泥埋晒，成條馬路淨係可以睇到D山泥，咁我當然企定定睇下發生咩事啦！過左一陣，我見到一個好似我呀爸既人行埋黎，呢一個果然係我呀爸，我當然第一時間八下咩事啦！我呀爸同我講山泥傾瀉呀，仲有人比D山泥埋左添，我當時有小小驚，咁大件事，我呀爸會唔會有事架，我呀爸當我講完咩事之後，佢又走返去佢既工作崗位，當時我都唔知可以做到D咩，淨係識企係個露台望住我呀爸，不過…我企左一陣，我終於都知道我有咩可以做啦！我即係走去廚房，打開個柜，囉左樽咖啡同奶粉出黎，之後煲左煲熱水，急急腳咁走左去刷牙洗面，之後又急急腳咁走返去廚房沖咖啡囉落樓比我呀爸同佢D師兄弟飲，之後我返到屋企我走返去露台，等我呀爸有咩需要既時候，又可以叫上黎等我囉比佢。我都唔記得左自己係露台睇左幾耐啦！不過呢一次就係我唯一一次睇到我呀爸做野。

兩位殉職既消防員，希望你地一路好走，你地既祟高同無私既精神，我值呢一個機會向你地致敬，亦希望你地既家人早日平伏心情，積極人生。

尋晚我真係玩得好開心呀！點解﹖

咪就係去左Special 既 Hello Kitty Black Wonder囉，呢一場有咩咁特別，特別在唔使錢啦，因為係買milk換Hello Kitty送既，而且呢一場大部份人都係為左一件軟硬 x Hello Kitty 既 Tee，呢一件Tee係要milk既頭300位讀者，入去呢個Hello Kitty Black Wonder 玩入面既遊戲而且仲一定要囉到 A Grand先可以得到，呢一件Tee當然係靚靚啦！

尋日同祈祈一早起身食左個麥記早餐，係屋企無咩好做，咪開左隻碟睇囉，呢一隻碟其實我想睇左好耐架啦！係咩﹖就係"柴犬奇蹟物語"，我之前都講過呢一套戲我真係好怕係戲院睇，因為我一定會到"豬頭"，果然呢一套戲好"吹淚"，我竟然開場無耐就，嘩！又比祈祈睇到，佢仲笑我添不過佢都有囉定紙巾比我，戲入而隻柴犬"麻里"佢就係一個好媽媽，呢一套戲真係好感人，人同動物個份深厚既感情，真係好難講到出口，我仲好記得上次睇"愛與狗同行"時有一句說話"係人既一生可以有好多唔同既朋友，不過係狗既一生主人就係佢一生一世既朋友"。希望大家日後會加更愛惜你地既朋友啦！

睇完碟之後，祈祈就去左洗風扇，我就去左整沙律啦，嘩~把風扇洗完之後好涼呀！因為之前把風扇有好多貓毛，依家布甸同啫喱又可以吹得涼快D啦！

大約5點幾我地就向Hello Kitty Black Wonder出發啦！我地今次仲有另一個目的，就係買過一個大D既"沙盆"比布甸同啫喱，當然我地做到啦！

講返呢個Special Hello Kitty Black Wonder 先，我同祈祈7:15分去到e-max，聽到個求d職員講，有人已經係3點幾黎排隊，唔使下化，我同祈祈就用急速既腳步去搵返條龍尾先，哦都未係好多人姐，大約80幾日姐，不過…過左一陣開始越黎越多人啦！嘩，望唔到龍尾啦！等…等…等…8點鐘…開始啦！可能由於人太多啦！要分批入去，唉，排到陣啦！8:15分，嘩…到我地啦！由於上一次已經玩過，所以我同祈祈入到去就好快搵到d密碼，而且仲好快咁解左碼添，唔使15分鍾，我地就返左出黎啦！當然我地換到件軟硬 x Hello Kitty 既Tee 啦！

祈祈多謝你陪我去多一次呀！我玩得好開心呀。