兩日內已經用左六千幾蚊, 好勁呀, 不過唔洗 O 咀, 只不過係D必要開支啫, 學費, 管理費都三仟幾, 佩眼鏡又用左二千蚊, 呢個係四眼人必要開支, 而家副眼鏡已經殘到不得了, 鏡o既面層都甩左幾塊, 所以一定要換.

老公,要節衣宿食喇, 唔係今個月點過呀, 哈哈哈.....!!!

成個星期冇寫, 迷玩ac, 迷睇金田一, 又要周圍去, 日日好似好唔得閑, 但又講唔出忙d乜, 呢種就係我想過o既生活 ??

星期五程程去做左個叫感覺統合o既評估,佢表現又比同年o既小朋友差左半年, , 唉, 囡囡真係好多唔掂, 至於乜叫感覺統合, 如果想知我下次先再講, 但要做訓練, 上堂, 要好貴, $600/50分鐘, 每個課程10堂, 即$6000.

死得.

病病病, 病魔幾時先會離開我們一家三口呀, 好煩呀!!

今日陪程程上語言訓練, 佢肯出聲講冚蓋個冚字, 又肯學老師咀形, 真係一個大進步, 連老師都話佢叻, 不過下次都係唔同佢一齊上堂, 因為佢見到我就全程要我抱實, 唔肯自己坐, 又唔聽老師話, 但亦可能佢今日有病o既關係, 老師話佢好燥呀, 爸爸話明天唔好返學, 俾佢休息下, 咁都好, 休息下先啦.

想左好耐, 終於買左對crocs膠涼鞋著, 因為怕唔好著, 而且價錢唔平, 但著左之後, 就覺得值得, 因為隻鞋輕身, 唔焗腳, 又唔會腳疼, 而家日日都著, 夠快, 好過著波鞋, 而且同程程一人一對, 一齊出街時著, 好開心架.

琴日打左篇心煩野, 今日心情好左好多, 其實程程係好得意, 但真係曳得好得人驚, 但佢都有好多好處, 除左有病之外, 由細到大佢瞓覺好少扭計, 食藥唔會扭計, 好似今次醫生開左d好苦o既藥俾佢, 姑娘重叫我撈d好味o既野俾佢食可以減輕苦味, 但我直接俾佢食,佢都冇扭計, 照食可也, 我都有試到少少藥味, 因為用藥粉加水開, 即係等於將藥丸整碎加水, 大人都會覺得好苦, 佢由第一日返學到依家都冇喊, 所以, 上天真係公平, 總唔會俾晒d衰野一個人,點都有 d d 好野 ge.

之前話唔見左個人八達通, 今日收到信, 退返11.6元俾我, 個人八達通o既好處就係當你唔見左之後咭裡面d錢如果冇被人用左o既話, 係可以原銀退還.

呢排我壓力好大, 好唔開心, 日日程程都俾老師講佢呢樣唔得, 果樣唔得, 搗蛋, 坐唔定, 真係好煩, 程程幾時先生性, 幾時至學乖, 我就黎要搵心理醫生, 真係頂唔順, 有時夜晚老公響度, 我真係唔想理佢, 我都知老公好辛苦, 但我真係唔知點面對佢, 有時真係想喊, 但喊都冇用, 老師要我教佢d野我都有同佢做, 但佢點都唔肯做, 咁點啫, 真係想打死佢, 燥都死冇仇報, 點算.

咁快就一個星期, 但呢個星期一d都唔好過, 因為全家一齊病, 先是程程, 跟住老公, 最後琴日我都領左野, 屋企變左疫區, 睇黎都唔好叫媽媽黎食飯, 唔好野多個, 天氣時凍時熱, 真係幾好身子都死, 我可能係行去接程程放學行到成身汗又走入冷氣地方, 所以就病, 都唔關程程事, 但老公就話佢被程程野到.哎......大家要一齊快d好番先得, 唔係就煩.

程程過左這幾天學校生活,老師話佢開始適應到少少, 開始肯午睡, 都要掙扎一陣, 唔肯坐低聽人講野情況很嚴重, 老師無奈地要經常帶著佢到其他課室上堂, 令老師很不便, 食飯時候也怕佢走出位碰到拿著熱東西的老師及工友, 十分危險 ,我就提議左一個方法給老師, 就是用我平日出外食飯時用的安全帶, 把程程安置在椅子, 老師也同校長傾過, 話可試但不可長時間使用, 我回家的時候一直想這件事, 忽然想喊, 當然無喊出來, 覺得教人駁著自己的女兒, 感覺很傷心, 但佢太唔聽話, 亦怕佢騷擾到同學,老師, 變成不受歡迎人物, 所以無法子, 希望佢可以快d學習坐定定, 唔洗再受束縛.