想左好耐, 終於買左對crocs膠涼鞋著, 因為怕唔好著, 而且價錢唔平, 但著左之後, 就覺得值得, 因為隻鞋輕身, 唔焗腳, 又唔會腳疼, 而家日日都著, 夠快, 好過著波鞋, 而且同程程一人一對, 一齊出街時著, 好開心架.

琴日打左篇心煩野, 今日心情好左好多, 其實程程係好得意, 但真係曳得好得人驚, 但佢都有好多好處, 除左有病之外, 由細到大佢瞓覺好少扭計, 食藥唔會扭計, 好似今次醫生開左d好苦o既藥俾佢, 姑娘重叫我撈d好味o既野俾佢食可以減輕苦味, 但我直接俾佢食,佢都冇扭計, 照食可也, 我都有試到少少藥味, 因為用藥粉加水開, 即係等於將藥丸整碎加水, 大人都會覺得好苦, 佢由第一日返學到依家都冇喊, 所以, 上天真係公平, 總唔會俾晒d衰野一個人,點都有 d d 好野 ge.

之前話唔見左個人八達通, 今日收到信, 退返11.6元俾我, 個人八達通o既好處就係當你唔見左之後咭裡面d錢如果冇被人用左o既話, 係可以原銀退還.

呢排我壓力好大, 好唔開心, 日日程程都俾老師講佢呢樣唔得, 果樣唔得, 搗蛋, 坐唔定, 真係好煩, 程程幾時先生性, 幾時至學乖, 我就黎要搵心理醫生, 真係頂唔順, 有時夜晚老公響度, 我真係唔想理佢, 我都知老公好辛苦, 但我真係唔知點面對佢, 有時真係想喊, 但喊都冇用, 老師要我教佢d野我都有同佢做, 但佢點都唔肯做, 咁點啫, 真係想打死佢, 燥都死冇仇報, 點算.

咁快就一個星期, 但呢個星期一d都唔好過, 因為全家一齊病, 先是程程, 跟住老公, 最後琴日我都領左野, 屋企變左疫區, 睇黎都唔好叫媽媽黎食飯, 唔好野多個, 天氣時凍時熱, 真係幾好身子都死, 我可能係行去接程程放學行到成身汗又走入冷氣地方, 所以就病, 都唔關程程事, 但老公就話佢被程程野到.哎......大家要一齊快d好番先得, 唔係就煩.

程程過左這幾天學校生活,老師話佢開始適應到少少, 開始肯午睡, 都要掙扎一陣, 唔肯坐低聽人講野情況很嚴重, 老師無奈地要經常帶著佢到其他課室上堂, 令老師很不便, 食飯時候也怕佢走出位碰到拿著熱東西的老師及工友, 十分危險 ,我就提議左一個方法給老師, 就是用我平日出外食飯時用的安全帶, 把程程安置在椅子, 老師也同校長傾過, 話可試但不可長時間使用, 我回家的時候一直想這件事, 忽然想喊, 當然無喊出來, 覺得教人駁著自己的女兒, 感覺很傷心, 但佢太唔聽話, 亦怕佢騷擾到同學,老師, 變成不受歡迎人物, 所以無法子, 希望佢可以快d學習坐定定, 唔洗再受束縛.  

今日好可憐, 肚子因月事不適, 一早帶程程返學小巴冇位, 跟住同同學仔一齊飛的返學, 放低程程後, 去到街市發現陪左我10年o既個人八達通已經離我而去, 立即報失!

傷心中 !!!

一來唔見左幾十蚊, 二來又要被人哦死............

無奈中!!!

其實都預計到遲早有一天, 因為實在太多野拎, 又要抱程程上車, 又要拎書包, 小巴又唔等人坐定先開車, 又要扶住架車, 又要嘟八達通, 拎左八達通出黎唔記得放番落袋, 終於唔見左喇 !

苦惱中 !!!

這個問題每日都要自問自答起碼一次, 實在好令人頭痛, 我相信亦是每個家庭主婦每日最煩o既事, 每次要煮o既野又要arm程程食, 最好係有湯或汁o既餸, 又要程程食得到, 即使要剪到碎濕濕, 都係要佢肯o趙及肯吞, 所以每日送佢上學後, 我就似喪屍咁響灣仔街市遊來遊去, 都買唔到d乜野煮.

上次同姨甥女阿wing講開食飯之類o既話題, 及看到程程學校的餐單, 給我少少啟發, 我會試下今日開始諗定下星期一個星期o既餸, 咁就唔洗日日諗啦, 而且可以捉住老公一齊諗, 唔洗咁煩, 定左果d野果日真係買唔到或者唔靚o既話, 都只係變少少, 唔洗自己R爆頭啦, 試下先, 下星期再作檢討.

這星期程程返左三日學, 咁又過左一個星期, 佢都係唔太習慣在校睡覺, 兩日瞓唔到, 今早早餐響屋企食左至返, 因為早餐係食烚蛋, 佢唔鍾意食, 而且每日都會食, 所以唔食就算啦, 但下午老師都話佢唔肯食, 唔知係咪早餐食得多所以冇胃口呢 ?午睡時重大喊, 好在最後佢都收聲, 但就坐左響度, 我去到就見到佢坐響門口張床仔, 佢今次見到我就笑, 我諗佢要過多一兩個星期先可以習慣到.

跟住又放三日.