有一日﹐我小息的時候﹐大話王無端端同我講話佢有部NDS﹐因為我同佢講我生日禮物係一部NDS﹐佢就話玩Mario賽車只要撞破D木箱就可以拿到很多武器﹐又可以吸其他車入去﹐但係我回家玩的時候﹐根本就無呢件事。仲有係幾個月前﹐我到他家開生日會﹐我根本就見不到他有部NDS﹐咁我就同佢講點解你家沒有NDS o架﹐佢又同我講﹐我部NDS比阿媽鎖左係部夾萬入面﹐我問佢係邊度o架﹐佢話係我家條秘道入面﹐仲話有部gameboy係佢阿媽個衣櫃裡面比個夾萬鎖住﹐我就心諗係海X花園無端端點會有條秘道起係度﹐十成十講大話啦﹗佢仲話識得Harry Potter 個作者﹐仲話佢住係雲X花園﹐咁媽咪同我講﹐羅琳咁有錢點會住係雲X花園呀﹐我咁樣話返比佢聽﹐佢又話其實係羅琳個仔住係o個度﹐我偷偷地笑﹐係人都知羅琳住係雲X花園無可能啦﹗佢點會留低個仔係o個度呀﹐你估佢會唔理個仔咩﹐咁我就無理佢喇。

星期五上美勞堂的時候﹐老師要我們做一個錢箱﹐我想用老師派給我們的手工紙包住隻紙杯﹐但我唔識包﹐大話王話幫我包﹐咁我就比隻紙杯同張手工紙給佢﹐當差不多完堂的時候﹐佢整好了和還返隻杯給我﹐當我返轉隻杯睇下有無爛的時候﹐個杯底原來爛晒同比釘書機釘了幾下﹐D釘凸晒出來﹐隻杯都有咁多個洞﹐你仲要我拔晒D釘﹐你想我死咩﹐咁我就送隻杯比佢﹐大話王仲係到哈哈笑﹐雖然佢隻膠杯唔o岩用﹐想要我隻杯都唔使咁呀﹗

今日參加左呢個暑期班 - 歌遙舞步劇中人。有好多野玩﹐好開心呀 ﹐

有個十二歲o既大哥哥同佢個弟一齊參加呢個班﹐不過佢呀弟大過我o既﹐有個肥仔七歲大﹐食左三碗飯。大哥哥幫我斟水﹐我就負責派碗﹐D湯好好飲好甜﹐D餸都好好味。

咁多遊戲最好玩係踢膠波﹐猜輸左果個要企係度比人用膠波踢﹐我輸左兩次﹐比大哥哥踢中左個pat pat.

哎呀﹐我好慘呀﹗你估點樣慘法﹖睇完咪知囉。

我考到全班第八名﹐退步左呀﹐所以呀媽罰我兩個禮拜無得打機﹐其實唔係呀媽唔比我打機﹐呀媽話你求其搵樣野罰下自己啦﹗咁我咪羅打機呢樣o野o黎罰囉﹐忍左兩個禮拜﹐終於到最後一日啦﹐等呢日等左好耐啦﹐我就爆炸啦.....激死人。

公公今天擺大壽﹐我同表哥食到中途就講喇﹕我地想出去睇魚﹐當時表弟無端端彈出來嚇到我地雞飛狗走﹐原來佢要去洗手間﹐佢嚇親我地之後﹐仲係度笑。佢去完洗手間﹐表哥就抱住佢周圍走﹐然後返番我地張檯﹐食完啦﹐我地就係酒樓周圍走﹐最搞笑既就係表弟差D扯甩我條底褲﹐大表哥係張檯下面爬出來﹐大表哥個弟弟羅住個有尿褲既膠袋周圍嚇人﹐所以咪話公公既大壽係小朋友既遊戲日囉﹗

今天是母親節﹐我和爸爸在媽媽洗澡的時候﹐悄悄地走到樓下的花店買花給媽媽﹐媽媽說在洗手間裡聽到關門聲時已經覺得有古怪﹐她收到花後很開心呢。

晚上吃完飯回家的時候﹐媽媽說也要買些花給auntie﹐因為auntie好像媽媽般照顧我﹐買完花後媽媽問為甚麼不買這種花給她﹐我說我覺得媽媽那種花細些﹐所以可以開得耐一些﹐媽媽說不一定是細花就可以養得耐些﹐我說我是男仔對這些東西不大熟悉﹐這些同花有關的東西都是d 呀嬸清楚些。哈哈﹐激死媽媽。

今天和爸媽去尖沙嘴﹐爸爸說要到海運中心看看萬事得車展。到場後我和爸爸迅速的走到萬事得5的車旁﹐他走上司機位﹐我就拉起擋門走上後排坐位﹐上上落落真是好玩﹐爸爸問這架車好嗎﹐我說唔好講咁多啦﹐行動才是實際﹐就呢架啦﹗結果被媽媽問我知唔知廉錢艱難喎。

子﹕媽﹐我今天幫老師把要做的家課寫在黑板上。
母﹕是嗎﹖好叻喎。
子﹕看你的表情好似唔係覺得我好叻咁喎。
母﹕你真係好叻呀﹗(當媽的即刻四萬咁口說)
子﹕媽﹗你好假。